តាកែវ៖ ប្រជាពលរដ្ឋជាច្រើននាក់ មានទីលំនៅស្ថិតនៅមូលដ្ឋានសង្កាត់បារាយណ៍បានសំដែងនូវការនូវការរិះគន់មិនសប្បាយចិត្ត ចំពោះភាពមិនប្រក្រតីនៃការចុះធ្វើអត្តសញ្ញាណប័ណ្ណជូនប្រជាពលរដ្ឋដល់មូលដ្ឋានសង្កាត់បារាយណ៍ ក្រុងដូនកែវ ខេត្តតាកែវ រយៈពេលប៉ុន្មានថ្មីៗនេះ ដោយមានមន្ត្រីនគរបាលស្ថិតិរបស់អធិការនគរបាលក្រុងដូនកែវជាអ្នកទទួលភារកិច្ចធ្វើកិច្ចការនេះ។
ប្រភពព័ត៌មានពីប្រជាពលរដ្ឋបានប្រាប់អ្នកយកព័ត៌មានយើងអោយដឹងថា ពួកគាត់អរគុណនិងត្រេកអរជាខ្លាំង នៅពេលទទួលដំណឹងពីសាលាសង្កាត់បារាយណ៏ថា មានការចុះធ្វើអត្តសញ្ញាណប័ណ្ណដល់មូលដ្ឋាន ព្រោះកាត់បន្ថយការចំណាយសោហ៊ុយម៉តូ ឌុប មិនចាំបាច់ទៅធ្វើដល់អធិការដ្ឋាននគរបាលក្រុងដូនកែវដូចមុនទេ។ប៉ុនែ្តទន្ទឹមនឹងនោះ គាត់ក៏សូមសំដែងនូវការរិះគន់ចំៗក្នុងន័យកែលំអរ ចំពោះមន្ត្រីមានភារកិច្ចធ្វើ អត្តសញ្ញាណប័ណ្ណ មួយចំនួនតូច ដែលឆ្លៀតគេងចំណេញដើម្បីផលប្រយោជន៍ផ្ទាល់ខ្លួន ធ្វើអោយមានភាពមិនប្រក្រតី ប្រព្រឹត្តអំពើពុករលួយ ដោយពួកគាត់ត្រូវ ចំណាយលើសពីតំលៃកំណត់របស់រាជរដ្ឋាភិបាល ដោយអ្នកខ្លះត្រូវចំណាយពី ២០០០០ រៀល រហូតដល់ ៣០០០០ រៀលទៀតផង ដើម្បីបានធ្វើអត្តសញ្ញាណប័ណ្ណនេះចប់សព្វគ្រប់។
ប្រភពផ្សេងទៀតបានបង្ហើបថា បើចំណាយប្រាក់លើសការកំណត់របស់រដ្ឋកាន់តែច្រើន ការធ្វើអត្តសញ្ញាណប័ណ្ណក៏ធ្វើបានកាន់តែលឿនដែរ បើពុំនោះទេពួកគាត់ត្រូវចំណាយពេល១ ថ្ងៃពេញទៅ ២ថ្ងៃ ទើបធ្វើរួចរាល់។ដូច្នេះហើយទើបពួកគាត់ត្រូវបង្ខំចិត្តចំណាយលុយលើសការកំនត់របស់រដ្ឋកុំអោយខាតពេលរកស៊ី អ្នកខ្លះមានកូនតូចៗរឺមនុស្សចាស់ជរានៅផ្ទះពុំអាចចោលផ្ទះបានយូរ។
ប្រភពបានបន្តទៀតថា ពួកគាត់មិនត្រឹមតែចំណាយ១០០០០រៀលចូលថវិការរដ្ឋទេ សូម្បីកន្លែង ផ្តិតមេដៃ កន្លែងយកភិនភាគ និង កន្លែងថតរូបក៏ត្រូវចំណាយដែរ ជាពិសេសត្រូវចំណាយច្រើននៅកន្លែងថតរូប។បើចំនាយច្រើនម្លឹងៗពួកគាត់មានសមាជិកច្រើននាក់ តើត្រូវធ្វើដូចម្តេចទៅ?។
មតិភាគច្រើនរបស់មហាជនបានបញ្ជាក់ថា មន្ត្រីធ្វើអត្តសញ្ញាណប័ណ្ណខ្លះ គាត់មានចេតនាធ្វើអោយមានការយឺតយ៉ាវចំពោះដំណើរការធ្វើ ដើម្បីមានឳកាស ទទួលប្រាក់សេវាពឹងពាក់ក្រៅផ្លូវការ មានមន្ត្រីខ្លះអង្គុយធ្វើការបណ្តើរលេងហ្គេមបណ្តើរ ក្នុងពេលដែលប្រជាពលរដ្ឋកំពុងឈរចាំត្រៀបត្រា។ពួកគាត់បានបង្ហើបទៀតថា ប៉ុន្មានថ្ងៃនេះពួកគាត់ឃើញមានជនបរទេស ជាជនជាតិចិន រឺ តៃវ៉ាន់ មកសុំដាក់ពាក្យធ្វើអត្តសញ្ញាណប័ណ្ណផងដែរមិនដឹងថា មន្ត្រីប៉ូលីសបានពិនិត្យនិងសំភាសល្អិតល្អន់ដែររឺអត់?
ពាក់ព័ន្ធនឹងការរិះគនើខាងលើនេះ អ្នកសារព័ត៌មានយើងបានសុំការស្រាយបំភ្លឺពី លោក ឆុក អេងលី អធិការនគរបាលក្រុងដូនកែវ លោកបានបកស្រាយថា មិនពិតដូចជាការចោទ ប្រកាន់នោះទេ គាត់តែងបាននែនាំកូនចៅគ្រប់ពេលវេលាមិនអោយជំរិតទារលុយកាក់ពីប្រជាពលរដ្ឋឡើយ លើកលែងតែប្រជាពលរដ្ឋអោយ ទើបយក។លោកបន្ថែមទៀតថា ពេលខ្លះប្រជាពលរដ្ឋសំណូមពរអោយមន្ត្រីលោកធ្វើការលើសម៉ោងរដ្ឋបាលដោយពួគគាត់ស្ម័គ្រចិត្ត ជូនសាគុណថ្លៃបាយទឹក។ល។លោកនឹងចុះទៅពិនិត្យនិងក្រើនរំលឹកមន្ត្រីលោក បន្ថែមទៀតពាក់ព័ន្ធនឹងបញ្ហាលុយកាក់នេះ។ចំណែករឿងមានជនបរទេសដាក់ពាក្យសុំធ្វើអត្តសញ្ញាណប័ណ្ណនោះគឺមិនមានទេ។
ប្រជាពលរដ្ឋគាត់សំណូមពរដល់លោកអធិការក្រុងដូនកែវ លោកស្នងការខេត្ត ក៏ដូចជាលោកអភិបាលខេត្ត លោក ឡាយ វណ្ណៈ មេត្តាជួយលុបបំបាត់សកម្មភាពពុករលួយក្រៅប្រព័ន្ធទាំងនេះផង ដែលជានិច្ចជាកាល លោកអភិបាលខេត្តថ្មី តែងតែប្រកាស អោយមានតម្លាភាពគ្រប់ស្ថាប័នរដ្ឋចាប់តាំងថ្នាក់ខេត្តដល់ភូមិឃុំ ដើម្បីទទួលបាននូវការទុកចិត្ត ជឿជាក់និងមានភាពកក់ក្តៅពីសំណាក់ប្រជាជនចំពោះអាជ្ញាធរ ស្របតាមយុទ្ធសាស្ត្រកែរទំរង់ស៊ីជំរៅគ្រប់ជាន់ថ្នាក់តាំងពីថ្នាក់លើរហូតដល់ថ្នាក់ក្រោម សំរាប់រាជរដ្ឋាភិបាល អណត្តទី៥នេះ។
