ខេត្តបន្ទាយមានជ័យ៖ កំលាំងអាវុធហត្ថក្រុងប៉ោយប៉ែតឃាត់ខ្លួនជនសង្ស័យ២នាក់ កំពុងនាំគ្នាធ្វើសកម្មភាពលក់ចែកចាយថ្នាំញៀនជាកស្តែងនិងដកហូតថ្នាំញៀនម៉ាទឹកកក២ថង់តូច កាលវេលាម៉ោង៤ល្ងាច ថ្ងៃទី៣ ខែវិច្ឆិកាឆ្នាំ២០១៥ នៅក្នុងចំណុចផ្លូវ៥០ ក្នុងភូមិព្រៃគុបហ៍ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកវរ:សេនីយ៍ត្រី ជា ដា មេបញ្ជាការមូលដ្ឋានអាវុធហត្ថក្រុងប៉ោយប៉ែត បានអោយដឹងថា ក្រោយទទួលបានព័ត៌មានពីប្រជាពលរដ្ឋថាមានយុវជន២នាក់កំពុងនាំគ្នាលួចលក់ចែកចាយគ្រឿងញៀនយ៉ាសកម្ម រូបលោកបានដឹកនាំកម្លាំងចុះទៅបង្ក្រាបឃាត់ខ្លួនជនសង្ស័យទាំង២នាក់តែម្តង។
ជនសង្ស័យទាំង ២ នាក់ដែលសមត្ថកិច្ចឃាត់ខ្លួនមាន ៖ ទី១/ឈ្មោះ រិន ណាង ភេទ ប្រុស អាយុ ១៦ឆ្នាំ មុខរបរលក់ខោអាវ រស់នៅក្នុង ភូមិ ក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ទី២/ឈ្មោះ គុណ តួ ភេទ ប្រុស អាយុ២០ឆ្នាំ មុខរបរជាងដែករស់នៅក្នុងភូមិពិការ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។ ដកហូតវត្ថុតាងមានគ្រឿងញៀនមេតំហ្វេតាមីនទឹកកក ២ ថង់តូច ម៉ូតូ១គ្រឿងទូរស័ព្ទដៃចំនួន ៣ គ្រឿងប្រាក់ខ្មែរ៥៣០០០រៀល និងប្រាក់ថៃ៨០០បាទ ។
ជនសង្ស័យទាំង ២ នាក់បានឆ្លើយសារភាពថា ពួកគេពិតជាបានលក់គ្រឿងញៀនពិតប្រាកដមែន ។ ជនសង្ស័យទាំង២នាក់ត្រូវបានកំលាំងអាវុធហត្ថកសាងសំនុំរឿងបញ្ជូនទៅតុលាដើម្បីដាក់ទោសទៅតាមផ្លូវច្បាប់ ៕
