ខេត្តរតនគិរី ៖ កម្លាំងការិយាល័យនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តរតនគិរីសហការជាមួយកម្លាំងនគរបាលនៃអធិការដ្ធាននគរបាលស្រុកវើនសៃ និងស្រុកបានលុង ចុះបង្ក្រាបករណីជួញដូរគ្រឿងញៀនមួយករណីឃាត់ខ្លួនបុរសសង្ស័យម្នាក់ចំណោម ២ នាក់ និងថ្នាំញៀនម៉ាទឹកកកចំនួន១គីឡូក្រាម ចាប់ពីថ្ងៃទី៣១ ខែតុលា ឆ្នាំ២០១៥ ដល់ថ្ងៃទី០២ ខែវិច្ឆិកា ឆ្នាំ២០១៥ ស្ថិតក្នុងឃុំប៉ាកាឡាន់ ស្រុកវើនសៃ ខេត្តរតនគិរី ។
ក្នុងប្រតិបត្តិការនេះ សមត្ថកិច្ចបានចាប់ឃាត់ខ្លួន បុរសសង្ស័យម្នាក់ឈ្មោះស៊ី វីអាយុ៣៨ឆ្នាំ ជនជាតិឡាវ មានទីលំនៅក្នុងឃុំប៉ាគៀប ស្រុកមឿងខូងខេត្តចំប៉ាសាក់ ដោយដកហូតបានថ្នាំញៀនម៉ាទឹកកកចំនួន១គីឡូក្រាម។
ក្នុងពេលចុះបង្ក្រាបនេះ មុខសញ្ញាម្នាក់ ដែលជាថៅកែនៅរងចាំឯស្រុកបាលុង បានរត់គេចខ្លួនជាមួយនឹងរថយន្តតាកូម៉ា១គ្រឿង ។
លុះកម្លាំងយើងដេញតាមជនសង្ស័យបានចតរថយន្តចោលនៅភូមិរ៉យ ឃុំកិចុង ស្រុកបកែវ ខេត្តរតនគិរី ហើយរត់ចូលព្រៃគេចខ្លួនបាត់។ រួមជាមួយតំណាងអយ្យការអមសាលាដំបូងខេត្ត បានចុះពិនិត្យរថយន្តនិងអូសយកមករក្សាទុកនៅស្នងការដ្ធាននគរបាលខេត្តដើម្បីកសាងសំណុំរឿងចាត់ការបន្ត ៕
សុវណ្ណារិទ្ធ
