ខេត្តបាត់ដំបង ៖ បុរសម្នាក់និងថ្នាំញៀនយ៉ាម៉ា ១០ កញ្ចប់ ស្មើ១៩៩៣គ្រាប់ ត្រូវអាវុធហត្ថស្រុកសំពៅលូនឃាត់ខ្លួន កាលពីម៉ោង៩.១៥នាទី នៅថ្ងៃទី៧ ខែតុលា ឆ្នាំ២០១៥ នៅតាមផ្លូវត្រង់ចំណុចបេងទ្រេត ភូមិត្រពាំងព្រលឹត ឃុំសន្តិភាព ស្រុកសំពៅលូន ខេត្តបាត់ដំបង និងកសាងសំណុំរឿងបញ្ជូន ទៅទីបញ្ជាការអាវុធហត្ថខេត្តបាត់ដំបងចាត់ការបន្តតាមច្បាប់នូវរសៀលថ្ងៃដដែល ។
លោក អញ កាម៉ាល់ មេបញ្ជាការរងអាវុធហត្ថស្រុកសំពៅលូន បានអោយដឹងថា ជនសង្ស័យម្នាក់ឈ្មោះ សុខ ធា ភេទប្រុសអាយុ៣០ឆ្នាំរស់នៅភូមិថ្មី ឃុំម៉ាឡៃស្រុកម៉ាឡៃ ខេត្តបន្ទាយមានជ័យ ។ វត្ថុតាងដែលដកហូតបានមានថ្នាំញៀន ប្រភេទយ៉ាម៉ាកញ្ចប់ ស្មើចំនួន ១៩៩៣ គ្រាប់ ។
លោក អញ កាម៉ាល់ មេបញ្ជាការរងអាវុធហត្ថស្រុកសំពៅលូន បានបញ្ជាក់ថា ជនសង្ស័យជាមុខសញ្ញាចាស់ដែលកម្លាំងជំនាញតាមប្រម៉ាញ់ជាច្រើនខែ ទើបរកវិធីស្ទាក់ឃាត់ខ្លួនបាន ពេលនាំថ្នាំញៀនពីស្រុកម៉ាឡៃ ខេត្តបន្ទាយមានជ័យ ចូលមកស្រុកសំពៅលូន ខេត្តបាត់ដំបង ក៏កំណត់ទីតាំងស្ទាក់ចាប់ខ្លួនតែម្តង ៕
