បន្ទាយមានជ័យ ៖ នគរបាលបញ្ជូនសង្ស័យទាំង៤នាក់និងថ្នាំញៀនប្រភេទម៉ាទឹកកកចំនួន៧កញ្ចប់ព្រមទាំងសម្ភារៈទៅតុលាការ នៅព្រឹក ថ្ងៃទី០៦ ខែតុលា ឆ្នាំ២០១៥ចាត់ការតាមនិតិវិធី។
កម្លាំងនគរបាលការិ យាល័យប្រឆាំងបទល្មើសគ្រឿងញៀននៃ ស្នងការដ្ឋាននគរបាល ខេត្ដបន្ទាយមានជ័យ ដឹកនាំដោយព្រះរាជអាជ្ញា លោកផាន់ វណ្ណ រត្ន័ នៅល្ងាចថ្ងៃទី៥ ខែតុលា ឆ្នាំ២០១៥បាន ចុះបង្ក្រាបករណីជួញដូរនិងប្រើប្រាស់គ្រឿង ញៀន នៅចំណុចផ្លូវលេខ២ សង្កាត់កំពង់ ស្វាយ ក្រុងសិរីសោភ័ណ ដោយឃាត់ខ្លួនជន សង្ស័យ៤នាក់ និងវត្ថុតាងមួយចំនួន ។
លោក ធិន ស៊ិនដេត នាយការិយាល័យប្រឆាំងគ្រឿងញៀនបានឱ្យដឹងថា ជនសង្ស័យទាំង៤នាក់ ត្រូវបានចាប់ខ្លួនជាបន្ដបន្ទាប់ នៅក្នុងប្រតិបត្ដិការក្រោមការបញ្ជាផ្ទាល់ពីសំណាក់ លោកឧត្ដមសេនីយ៍អាត់ ខែម ស្នងការនគរបាលខេត្ដ ។
នាយការិយាល័យបានបញ្ជាក់ថា ពីដំបូងកម្លាំងរបស់លោកបានឃាត់ខ្លួនជន សង្ស័យម្នាក់ ឈ្មោះអៀង ស៊ីវណ្ណា ហៅឆែប អាយុ២៨ឆ្នាំ រស់នៅភូមិសែសិន សង្កាត់អូរអំបិល ដោយដកហូតថ្នាំញៀន ប្រភេទម៉ាទឹកកក ៣កញ្ចប់ ។
លោកបន្ដថា ក្រោយការសួរនាំរួចមក កម្លាំងរបស់លោក បានឈានទៅដល់ការ ឃាត់ខ្លួន ជនសង្ស័យឈ្មោះស៊ិន បារាំង អាយុ២៣ឆ្នាំ រស់នៅភូមិអណ្ដូងផ្លូវ ឃុំគំរូ ស្រុកថ្មពួក ដោយដកហូតថ្នាំញៀន ប្រភេទម៉ាទឹកកក ចំនួន៤កញ្ចប់ថែមទៀត។ បន្ទាប់ពីសួរនាំជនសង្ស័យនេះរួចមក កម្លាំងនគរបាលក៏បានឈានទៅដល់ការ ឃាត់ខ្លួនជនសង្ស័យពីរនាក់ទៀត ទី១ ឈ្មោះសាំ ពិសិដ្ឋ អាយុ២៣ឆ្នាំ រស់នៅភូមិត្រញំងប្រិយ៍ ឃុំភ្នំដី ស្រុកភ្នំស្រុក និងម្នាក់ទៀតឈ្មោះវ៉ែន វិសាល អាយុ២៨ឆ្នាំ មុខរបរគ្រូបង្រៀន រស់នៅភូមិកណ្ដាលលិច ឃុំស្រះជីក ស្រុកភ្នំ ស្រុក ។
ជាលទ្ធផលក្រោយការឃាត់ខ្លួនជនសង្ស័យទាំង៤នាក់ កម្លាំងសមត្ថកិច្ចបាន ដកហូតថ្នាំញៀនប្រភេទម៉ាទឹកកកចំនួន៧ កញ្ចប់ទូរស័ព្ទដៃ ពីរគ្រឿង ម៉ូតូមួយគ្រឿង និងឧបករណ៍សម្រាប់ជក់ប្រើប្រាស់មួយចំនួន ៕
