ខេត្តបន្ទាយមានជ័យ ៖ លោកអភិបាលខេត្តបន្ទាយមានជ័យមេបញ្ជាការអាវុធហត្ថ និងលោកស្នងការ និងមន្ត្រីរាជការខេត្តបន្ទាយមានជ័យទាំងអស់ ចូលរួមសំអាតបរិស្ថានជុំវិញខេត្ត នៅថ្ងៃទី៣ ខែតុលា ឆ្នាំ២០១៥ ដើម្បីចូលរួមអបអរសាទរក្នុងឱកាសបុណ្យភ្ជុំបិណ្យជាប្រពៃណីជាតិ ។
លោក គោ ស៊ុំសារឿត អភិបាលខេត្តបន្ទាយមានជ័យ លោក ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យ បានដឹកនាំកំលាំងអាវុធហត្ថចំនួន២០០នាក់ និងយុវជនបន្សាបគ្រឿងញៀនចំនួន ៥០ នាក់ សរុប២៥០នាក់ នគរបាលស្នងការខេត្តបន្ទាយមានជ័យចូលរួមជាង៥០០នាក់ និងមន្ត្រីរាជការជាច្រើននាក់ទៀត បាននាំគ្នាចូលរួមសំអាតអនាម័យ បរិស្ថាន ជុំវិញខេត្តឲ្យមានសោភ័ណភាព ដើម្បីឲ្យប្រជាពលរដ្ឋទៅកាន់បិណ្ឌ មានរយៈពេល១៥ថ្ងៃចាប់ថ្ងៃទី២៨ កញ្ញា ដល់ថ្ងៃទី១១ ខែតុលា ឆ្នាំ២០១៥ ដល់ថ្ងៃភ្ជុំបិណ្យធំឲ្យមានផាសុខភាព ។
ពិធីសំអាតបរិស្ថាននេះ ចែកចែញជា៤ផ្នែកក្រុមទី ១ ចាប់ពីមុខសាលាខេត្តសំអាតដល់ចំណុចទឹក សង្កាត់ទឹកថ្លា ក្រុមទី២ ចាប់មុខសាលាខេត្តដល់សង្កាត់ព្រះពន្លាសែសិន ទី៣ ចាប់ពីចំណុចសាលាខេត្តដល់ស្ពានទី២ និងក្រុមទី៤ ចាប់ពីមុខសាលាខេត្តដល់ផ្សារចំការគរ ។ នៅក្នុងការចុះសំអាតបរិស្ថាននេះ លោក ឱ បូរិន្ទ បានមានប្រសាសន៍ថា បរិស្ថានគឺជាវត្ថុ ដែលនៅជុំវិញខ្លួនយើង មានដូចជាទឹក ភ្លើង ខ្យល់ ការរស់នៅក្នុងសង្គម បើយើងមិនបានបាច់អារម្មណ៍អំពីរឿងបរិស្ថាននោះទេ គឺមិនអាចរស់នៅបានឡើយ ទើបថ្ងៃទី៣ ខែតុលា ឆ្នាំ២០១៥ កំលាំងចំរុះជិត១០០០នាក់បាននាំគ្នាចុះធ្វើបរិស្ថានជុំវិញខេត្ត ។
លោក ឱ បូរិន្ទ បាននិយាយបន្តទៀតថា ក្នុងចុះសំអាតបរិស្ថាននេះ ក្រុមនិមួយៗបានដើររើសសំរាមតាមផ្លូវជាតិជុំវិញផ្សារ និងមុខផ្ទះប្រជាពលរដ្ឋដូចជាកាកសំណល់ពីការហូបចុក មានដូច ថង់ផ្លាស្ទិច សំរាម ចានស្នោ ក្រដាស់ ស្លឹកឈើជ្រុះ និងវត្ថុជាច្រើនទៀត ហើយលោកបានជួយពន្យល់ណែនាំដល់ប្រជាពលរដ្ឋទាំងអស់ឲ្យចេះចូលរួមក្នុងការសំអាតបរិស្ថាននិងឲ្យចេះធ្វើអនាម័យជុំវិញផ្ទះ ។ ក្នុងនោះ លោក ឱ បូរិន្ទ បានឲ្យកូនចៅចុះជួយការពារសន្តិសុខជូនប្រជាពលរដ្ឋនៅតាមវត្តអារាមផ្សេងៗទៀតផង ៕
