ខេត្តបន្ទាយមានជ័យ ៖ បុរសចំណាស់ម្នាក់ទៅមើលចំការត្រូវពស់ចឹកចំជើងបញ្ជូនទៅមន្ទីរពេទ្យស្លាប់តាមផ្លូវ កាលពីថ្ងៃទី២១ ខែកញ្ញា ឆ្នាំ២០១៥នៅក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកវរៈសេនីយ៍ត្រី ស៊ីវ សុជាតិ អធិការនគបាលក្រុងសិរីសោភ័ណបានឲ្យដឹងថា ជនរងគ្រោះមានឈ្មោះ សាញ់ សារី ភេទប្រុស អាយុ៥៣ឆ្នាំ មានប្រពន្ធឈ្មោះ ទុំ ម៉ាប់ អាយុ៥០ឆ្នាំមានកូនស្រីចំនួន៤នាក់ក្នុងបន្ទុក រស់នៅក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ មុនពេលកើតហេតុនៅម៉ោង២រសៀលនោះជនរងគ្រោះបាននាំក្មួយស្រីឈ្មោះ ឌិត កញ្ញា អាយុ១៣ឆ្នាំទៅមើលចំការដំឡូងនៅកន្លែងកើតហេតុ លុះមួយសន្ទុះក្រោយមកស្រាប់តែជនរងគ្រោះបានស្រែកហៅឲ្យក្មួយជួយ បន្ទាប់ពីត្រូវបានពស់ចឹក ហើយក្រោយមកទៀតក៏រត់ទៅមុខអោយក្មួយស្រីជួយក៏ដួលនៅក្នុងចំការដំឡូងរបស់ខ្លួនតែម្តង។
ពេលនោះក្មួយស្រីរូបនោះក៏ស្រែកឲ្យអ្នកនៅជិតចំការជួយ ខណៈពេលនោះក៏មានគោយន្តអ្នកជិតចំការនោះមកដល់ហើយក៏បានលើកជនរងគ្រោះដាក់លើគោយន្តដឹកសំដៅមកផ្ទះ ប៉ុន្តែពេទ្យបាននិយាយប្រាប់ក្រុមគ្រួសារថាជនរងគ្រោះបានបាត់បង់ជីវិតបាត់ទៅហើយគឺស្លាប់ពេលដឹកយកមកតាមផ្លូវមកម្លេះ ហើយបន្ទាប់មកសពក៏ត្រូវបានក្រុមគ្រួសារដឹកយកមកផ្ទះវិញដើម្បីចាត់ចែងធ្វើបុណ្យតាមប្រពៃណី នៅលើខ្លួនសាកសពត្រូវបានក្រុមគ្រួសារពិនិត្យឃើញមានស្លាកស្នាមខ្មៅជាំនៅជើងខាងឆ្វេងក្រោមភ្នែកគោហើយក៏សន្មត់ថាសពនេះពិតជាត្រូវពស់ចឹកពិតប្រាកដមែន ៕
