ខេត្តបន្ទាយមានជ័យ ៖ បុរស២នាក់នាំកម្មករម្នាក់ឆ្លងដែនពីថៃមកខ្មែរ វាយសំឡុតទាប្រាក់លើសពីថ្លៃឈ្នួល ត្រូវអាវុធហត្ថឃាត់ខ្លួនបញ្ជូនទៅតុលាការ កាលរសៀលថ្ងៃទី១៤ ខែកញ្ញា ឆ្នាំ២០១៥ ចាត់ការតាមនិតិវិធី ។
ហេតុការណ៍នេះ កើតឡើងកាលពីវេលាម៉ោងម៉ោង១៩និង០០នាទីថ្ងៃទី ១២ ខែកញ្ញា ឆ្នាំ២០១៥ នៅចំណុចភូមិក្បាលស្ពាន១ សង្កាត់និងក្រុងប៉ោយប៉ែត ខេត្តបន្ទាយមានជ័យ។
ប្រភពពីអាវុធហត្ថខេត្តបានអោយដឹងថា យោងតាមពាក្យបណ្ដឹងរបស់ឈ្មោះ ញ៉ាញ់ ល័ក្ដ ភេទប្រុស អាយុ ២៣ឆ្នាំ មានទីលនៅ ភូមិ ព្រាវ ឃុំ អូរបីជាន់ ស្រុក អូរជ្រៅ ខេត្ត បន្ទាយមានជ័យ ប្តឹងទៅទីបញ្ជាការមូលដ្ឋាន អ ហ ក្រុងប៉ោយប៉ែតពីបទ គំរាមទារប្រាក់និងប្រើហិង្សា ។
លោក វរៈសេនីយ៍ត្រី ជា ដា មេបញ្ជាការមូលដ្ឋាន អ ហ ក្រុងប៉ោយប៉ែត ធ្វើការស្រាវជ្រាវឃាត់ខ្លួនជនសង្ស័យបានចំនួន២នាក់។
១-ឈ្មោះ សាម សុចាន់ ហៅម៉ក់ ភេទប្រុស អាយុ ២១ឆ្នាំមានស្រុកកំណើតនៅភូមិ សោម ឃុំ ព្រឹក្ស ស្រុក គីរីវង្ស ខេត្ត តាកែវ បច្ចុប្បន្ន ស្នាក់នៅបណ្ដោះអាសន្នបន្ទប់ជួលក្នុងភូមិក្បាលស្ពាន១សង្កាត់និងក្រុងប៉ោយប៉ែតខេត្តបន្ទាយមានជ័យ ។
២-ឈ្មោះ អ៊ុនៗ ពីសី ហៅ នីត ភេទ ប្រុស អាយុ ២៣ឆ្នាំ មានស្រុកកំណើតនៅភូមិដំបងដែក ឃុំ កោះរការ ស្រុកកំពុងសៀម ខេត្តកំពុងចាម បច្ចុប្បន្ន ស្នាក់នៅបណ្ដោះអាសន្នបន្ទប់ជួលក្នុងភូមិប៉ោយប៉ែតសង្កាត់និងក្រុងប៉ោយប៉ែត ខេត្តបន្ទាយមានជ័យរួចនាំមកកាន់មូលដ្ឋានមូលដ្ឋាន អ ហ ក្រុងដើម្បីធ្វើការសាកសួរ។
ក្រោយពីធ្វើការសាសួររបស់សមត្ថកិច្ចរួចមក ជនសង្ស័យទាំង២នាក់បានឆ្លើយសារភាពថា ពួកគេបានជូនជនរងគ្រោះចេញពីផ្សារឡុងកឿប្រទេសថៃ មកខ្មែរពិតប្រាកដមែន ដោយយកថ្លៃជូនម្នាក់៣០០បាត ពេលមកដល់ដីខ្មែរ ពួកគេបាននាំគ្នាសំឡុតជនរងគ្រោះយកម្នាក់៤០០បាតបន្ថែមទៀត ពេលនោះជនរងគ្រោះមិនមានប្រាក់អោយ ពួកគេបាននាំគ្នាវាយទៅលើជនរងគ្រោះថែមទាំងយកទូរស័ព្ទដៃចំនួន២គ្រឿងទៀតផង ៕
