ខេត្តបន្ទាយមានជ័យ ៖ ឈ្មោះ ស្តើង សុផល មេឆ្នោតដ៏ធំនៅក្រុងប៉ោយប៉ែត នាំអោយប្រជាពលរដ្ឋធ្លាក់ចុះផ្នែកជីវភាពកាន់តែក្រីក្រទៅ ដោយល្បែងនេះ ចេញមួយថ្ងៃ ២ លើក អ្នកចាក់មិនសូវត្រូវ លោក អ៊ុំ សុផល អធិការមិនហ៊ានបង្ក្រាប ប្រហែលទទួលផលប្រយោជន៍ពីមេឆ្នោតបានច្រើនគួរសម ។
ប្រភពពីប្រជាពលរដ្ឋបានអោយដឹង កាលពីម៉ោង១រសៀលថ្ងៃទី១៤ ខែកញ្ញា ឆ្នាំ២០១៥ ថា ទីតាំងផ្ទះលក់ឆ្នោតរបស់លោក ស្តើង សុផល ជាមេឆ្នោតធំ ស្ថិតនៅភូមិបាលិលេយ្យ ២ សង្កាត់ប៉ោយប៉ែត ក្រុងប៉ោយប៉េត ខេត្តបន្ទាយមានជ័យ ។ អ្នកលក់ឆ្នោតជាច្រើនបានប្រមូលកាតុងឡើង អោយឈ្មោះ ស្តើង សុផល ដើម្បីយកក្បាលកាក់(ស៊ីកំម្យ៉ុង) ។
ប្រជាពលរដ្ឋបានបន្តថា ល្បែងឆ្នោតនេះអ្នកចាក់មិនដែលធ្វើមានបានទេ មានតែមេ ទើបអាចសង់ផ្ទះវីឡាបាន អាណិតកម្មករមួយចំនួនប្រឹងទៅធ្វើការបានព្រឹកខ្វះល្ងាច ពេលដល់រសៀល នាំគ្នាទៅចាក់ឆ្នោត ចាញ់អស់ ប្រពន្ធកូនរកអ្វីហូបមិនបានទេ ដូច្នេះល្បែងឆ្នោតនេះ នាំអោយប្រជាពលរដ្ឋចេះតែក្រទៅៗ អ្នកខ្លះចាក់ជំពាក់គេធ្វើការងារសងគេវិញ មិនគ្រប់ រត់ចោលស្រុកពីកន្លែង១ទៅកន្លែង១ដូចជនពនាចរណ៍ ។
ពាក់ព័ន្ធករណីនេះ លោក អ៊ុំ សុផល អធិការក្រុងប៉ោយប៉ែតបានទទួលព័ត៌មាន ហើយរូបលោកសន្យាថា នឹងចុះហាមឃាត់និងបង្ក្រាបទីតាំងខាងលើនេះ ប៉ុន្តែអ្នកយកព័ត៌មានយើងរង់ចាំ រហូតជាច្រើនម៉ោង មិនឃើញកម្លាំងប៉ូលីសណាម្នាក់ចុះទៅដល់ផ្ទះកន្លែងលក់ឆ្នោតឡើយ ដោយសង្ស័យថា លោក អ៊ុំ សុផល អធិការមិនហ៊ានបង្ក្រាប ប្រហែលទទួលផលប្រយោជន៍ពីឈ្មោះ ស្តើង សុផល មេឆ្នោតដ៏ធំនៅក្រុងប៉ោយប៉ែតនេះហើយ៕
