បាត់ដំបង ៖ ប្រជាពលរដ្ឋភូមិដូងឃុំឈើទាលស្រុកបាណន់ បានដាក់កុងត្រូលនិងដុំថ្ម តាមផ្លូវរារាំងឃាត់រថយន្តមន្ទីរសារធារណការណ៍ មិនអោយចូលដឹកដីភ្នំ ព្រោះរថយន្តទាំងនេះ បង្កអោយខូចខាតផ្លូវនិងហុយប៉ះពាល់សុខភាពពួកគាត់ កាលពីព្រឹកថ្ងៃទី១២ ខែកញ្ញា ឆ្នាំ២០១៥ រហូតដល់ម៉ោង ១ ទើបចប់ ។
ក្រុមប្រជាពលរដ្ឋបានអោយដឹងថា មានក្រុមហ៊ុនជាច្រើនបានចូលមកកាយភ្នំទទឹង ភ្នំក្តារនិងភ្នំដីសភូមិដូងឃុំឈើទាល ស្រុកបាណន់ ដោយរថយន្តដឹកដីទាំងនោះ បង្កអោយខូចផ្លូវ បែកលូបណ្តាលអោយស្ទះទឹកហូរចេញពីស្រែមិនបាន ហើយស្រូវឈ្លក់ទឹកងាប់ខូចអស់ មិនតែប៉ុណ្ណោះ បង្ការហុយបណ្តាលឲ្យ ប៉ះពាល់សុខភាព ម្យ៉ាងវិញទៀត អ្នកបើករថយន្តមួយចំនួន បើកលឿនហួសហេតុ ។ ចំណែកមេភូមិ និងអាជ្ញាធរស្រុក ប្រហែលជាបានសំណែនពីពួកដឹកដីទាំងនេះ ទើបមិនព្រមដោះស្រាយកង្វល់របស់ប្រជាពលរដ្ឋ ។
លោក ហ៊យ ប៉ិច មេភូមិដូងបានអោយដឹងថា លោកមិនបានទទួលអ្វីពីក្រុមហ៊ុនដឹកដីទេ ពេលស្នើរទៅស្រុកអស់លោកមន្ត្រីទាំងនោះគាត់ថា ចាំដោះស្រាយរហូត ហើយនៅព្រឹកនេះ គឺប្រជាពលរដ្ឋគាត់បញ្ជេញកំហឹងដោយខ្លួនឯងទេ ព្រោះផ្លូវទាំងនោះ ជាកម្លាំងញើសឈាមពួកគាត់កសាង ដូច្នេះគាត់សំណូមពរអ្វី គឺខាងមន្ទីរសារធារណការណ៍ ឬក្រុមហ៊ុនជាអ្នកចូលរួមដោះស្រាយ ។
ពាក់ព័ន្ធករណីនេះ លោក ចាន់ សំបូរ អនុប្រធានមន្ទីរសារធារណការណ៍ផ្នែកកសាងផ្ឡូវស្ពានបានអោយដឹងថា រូបលោកមានគម្រោងកសាងជួសជុលផ្ឡូវអោយប្រជាពលរដ្ឋវិញ នៅថ្ងៃទី១៤ ខែកញ្ញា ឆ្នាំ២០១៥ តែដោយរឿងហេតុកើតឡើង ហើយរូបគាត់សម្រេចចាក់ដីជួសជុលកន្លែងកង្ហុកមួយចំនួន និងស្រោចទឹកក្នុង១ថ្ងៃ២ដង នៅរសៀលថ្ងៃទី១២ ខែកញ្ញា ឆ្នាំ២០១៥ តែម្តង ។
ចំណែកលូដែលបាក់បែកចាំ ១០ ថ្ងៃទៀត ទើបជួសជុលសង បើបងប្អូនប្រជាពលរដ្ឋ អាចកាប់គាស់ ឬជួលគេបង្ហូរទឹកចេញពីស្រែសិនក៏បាន រីឯថ្លៃឈ្នួលខាងមន្ទីរជាអ្នកចេញអោយ ព្រោះក្រុមការងាររវល់ដឹកដីកសាងផ្លូវនៅចំណុចឃុំរការស្រុកសង្កែ ។
ក្រោយពីមានការសន្យាភាគីទាំងសងខាងបាននាំគ្នាចុះពិនិត្យចំណុចកើតហេតុ និងអនុញាតអោយរថយន្តចូលដឹកដីភ្នំធម្មតាវិញ ៕
សុខហេង
