ខេត្តបន្ទាយមានជ័យ ៖ យោធាសឹករងម្នាក់ ត្រូវបានមិត្តរួមការងារប្រទះឃើញដេកស្លាប់ក្នុងមុង បន្ទាយសឹករង ស្រុកថ្មពួក សង្ស័យកើតជំងឺខ្យល់គ នៅវេលាម៉ោង៥ល្ងាចថ្ងៃទី៩ ខែកញ្ញា ឆ្នាំ២០១៥ នៅក្នុងបន្ទាយសឹករងស្រុកថ្មពួក ស្ថិតក្នុងភូមិថ្មដែកកេះ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
ប្រភពពីមន្ត្រីយោធាបានអោយដឹងថាជនរងគ្រោះដែលគេប្រទះឃើញដេកស្លាប់នៅក្នុងមុងមានឈ្មោះ ពេក ម៉ៅ ភេទប្រុស អាយុ៤៨ឆ្នាំ ជាយោធាផ្នែកសឹករង មានឋាន:ជាព្រិន្ទបាលឯក មានទីលំនៅភូមិឡោទេ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។
ក្រោយពីមន្ត្រីជំនាញនៅទីនោះបានពិនិត្យសពបានឲ្យដឹងថា ជនរងគ្រោះស្លាប់ដោយសារជម្ងឺខ្យល់គ ព្រោះនៅលើខ្លួនសាកសពមិនមានស្នាមរបួស និងថ្នាំបំពុលអ្វីឡើយ បន្ទាប់សពត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
