បាត់ដំបង ៖ យុវជនម្នាក់ជិះម៉ូតូដួលលើផ្លូវជាតិត្រូវរថយន្តកុងទន័រមួយគ្រឿងបើកបញ្ច្រាស់ទិសបុកកិនបន្ថែម បណ្តាលអោយជនរងគ្រោះបែកក្បាលចេញខួរស្លាប់យ៉ាងអាណោចអាធមភ្លាមៗនៅនឹងកន្លែងកើតហេតុ ។
ហេតុការណ៏នេះបានកើតឡើងកាលពីវេលាម៉ោង ១០ និង ២០ នាទីយប់ ថ្ងៃទី ២៦ ខែ សីហា ឆ្នាំ ២០១៥ស្ថិតលើកំណាត់ផ្លូវជាតិលេខ៥៧អាខាងលិចស្ពានវត្តគរ ចំងាយប្រហែល២០០ម៉ែត្រក្នុងភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង។
ប្រភពពីសាច់ញាតិជនរងគ្រោះបានអោយដឹងថាយុវជនរងគ្រោះមានឈ្មោះសុខ បូរី អាយុ ២១ ឆ្នាំ មុខរបរជាជាងផ្សាដែក ជួសជុលម៉ាស៊ីនត្រជាក់មានទីលំនៅក្នុងភូមរំចេក ២ សង្កាត់រតនៈ ក្រុងបាត់ដំបង ខេត្តបាត់ដំបង(យុវជនរងគ្រោះត្រូវចូលរោងការនៅខែក្រោយ)។
ប្រភពពត៌មានពីប្រជាពលរដ្ឋជាច្រើននាក់បានអះអាងថាមុនពេលកើតហេតុពួកគាត់បានឃើញយុវជនរងគ្រោះខាងលើជិះម៉ូតូម៉ាក ZOOMER-X ពណ៌ក្រហមគ្មានស្លាកលេខ បើកបរក្នុងទិសដៅពីកើតទៅលិច មកដល់ចំណុចកើតហេតុ ប្រហែលទាក់ដៃចង្កូតជាមួយម៉ូតូដ៏ទៃទៀតរអិលដួល បន្ទាប់មកក៏មានរថយន្តកុងទឺន័របានបើកបរក្នុងទិសដៅពីលិចទៅកើតតាមផ្លូវវៀងក្រុង ជាន់ហ្វ្រាំងមិនទាន់បុកកិនបន្ថែមបណ្តាលអៅយជនរងគ្រោះស្លាប់ភ្លាមៗហើយរថយន្តបានបើកបន្តទៅមុខគេចខ្លួនបាត់តែម្តង។
ក្រោយពីកើតហេតុ សមត្ថកិច្ចនគរបាលចរាចរណ៏ផ្លូវគោក និង ក្រុមបង្ការបង្ក្រាបចុះមកដល់និងចាត់កំលាំងស្រាវជ្រាវរករថយន្តបង្ករហេតុ និង អ្នកបើកបររថយន្តអោយចូលខ្លួនមកបំភ្លឺក្នុងករណីគ្រោះថ្នាក់ចរាចរណ៏នេះ៕
ដោយ សុខ កុសល
