បាត់ដំបង ៖ ប្រជាពលរដ្ឋព្រួយបារម្ភចំពោះអាជីវកម្មជីកកាយដីលក់ធ្វើឲ្យប៉ះពាល់សុខភាព ជីវភាព និងអាយុជីវិត ដូចជាដឹកដីហុយ ពេលមានទឹកភ្លៀងហូរ នាំយកសត្វជាអាហារផ្សេងចូលរណ្តៅដីដ៏ជ្រៅលើស ៥ ម៉ែត្រ ដោយការជីករួច មិនដាំបង្គោល ឬដើមឈើ អាចបណ្តាលអោយមនុស្សធ្លាក់ចូលលង់ស្លាប់ក៏មាន ។
រណ្តៅដីជាច្រើនកន្លែងនៅក្នុងភូមិស្លាកែត សង្កាត់ស្លាកែត ក្រុងបាត់ដំបង មិនទាន់រត់ការច្បាប់រួច ហើយជីកជ្រៅៗ ទំរាំរត់ការច្បាប់រួចរណ្តៅក៏ជីកហើយដែរ ។
លោក ឯល សាឡែស ចៅសង្កាត់ស្លាកែតបានអោយដឹងថា រណ្តៅដីដែលឈ្មួញជីកក្នុងភូមិស្លាកែត សង្កាត់ស្លាកែត ក្រុងបាត់ដំបង រូបលោកទើបតែបញ្ជូនពាក្យស្នើរសុំទៅសាលាក្រុងបាត់ដំបង។
ចំពោះរណ្តៅដី១កន្លែង ឈ្មោះ ហេង អេងស្ថិតនៅក្នុង ភូមិច្រាប ក្រសាំង សង្កាត់វត្តគរក្រុងបាត់ដំបងបានជីកយកអាចន៍ដី លក់មានជម្រៅជ្រៅ ហួសកម្រិតលើសពី អាជ្ញាប័ណ្ណមន្ទីរជំនាញបានកំណត់និងធំជាងអាងកំពីងពួយ។
ពាក់ព័ន្ធរណ្តៅដីខាងលើ អ្នកយកព័ត៌មានទំនាក់ទំនងទៅលោក សៀងឯម វ៉ូនស្ហី អភិបាលក្រុងបាត់ដំបងមិនលើកទូរស័ព្ទ។
ចំណែករណ្តៅដីឈ្មោះ រដ្ឋា នៅភូមិបេងឃុំអន្លង់វិលស្រុកសង្កែ បានជីជ្រៅលើស ៥ ម៉ែត្រព្រមទាំងបាក់ដីអ្នកជិតខាង ហើយការដឹកជញ្ជូនរថយន្តបើកលឿន ហុយប៉ះពាល់ដល់សុខភាពប្រជាពលរដ្ឋ រួចប្រជាពលរដ្ឋប្តឹងទៅសាលាឃុំអោយជួយអន្តរាគមន៍ ។
លោក ទូច ស្វាង មេឃុំអន្លង់វិលក៏បានជម្រាបទៅលោករដ្ឋាអោយធ្វើការកែតម្រូវឡើងវិញដើម្បីប្រជាពលរដ្ឋនិងដើម្បីសន្លឹកឆ្នោតឃុំអន្លង់វិលនាពេលខាងមុខ។
ពាក់ព័ន្ធករណីនេះ លោក អ៊ានមាឃ ប្រធានមន្ទីររ៉ែនិងថាមពលខេត្តបានអោយដឹងថា ក្នុងអាជ្ញាប័ណ្ណដែលមន្ទីរជំនាញចេញឲ្យគឺបានកំណត់ដល់អាជីវករ រកស៊ីជីកដី លក់នេះគឺអនុញាតិឲ្យជីកមានជម្រៅមិនលើសពី៥ ម៉ែត្រនិងទំហំមិនលើសពី៤០ គុណ៥០ម៉ែត្រប៉ុណ្ណោះ រួចលោកបានឆ្លើយថា កំពុងជាប់រវល់ក៏បិទទូស័ព្ទតែម្តង។
ប្រជាពលរដ្ឋដែលរងការប៉ះពាល់បញ្ហារថយន្តដឹកដីមានហុយនិងរអិល បានសំណូមពរដល់មន្ទីរ ជំនាញចាត់ វិធានការ និងចុះពីនិត្យរណ្តៅដីផងព្រោះម្ចាស់រកស៊ីដឹកដីលក់ អះអាងថា បានបង់ប្រាក់មួយចំនួនទៅខាងជំនាញរ៉ែនិងថាមពល ពួកគាត់មិនខ្វល់ចំពោះការរងទុក្ខរបស់ប្រជាពលរដ្ឋដែលមានដីស្រែជាប់គាត់ឡើយ គាត់គិតតែធ្វើយ៉ាងណាឲ្យតែចំណេញ ៕
សុខ ហេង
