ពោធិ៍សាត់-បាត់ដំបង ៖ រថយន្តសាំយ៉ុងដឹកកូនត្រីឆ្តោររាប់លានក្បាល របស់ថៅកែឈ្មោះ មុនី បើកបុករថយន្ត នគរបាលសេដ្ឋកិច្ច បណ្តាលអោយរថយន្តនគរបាលក្រឡាប់ធ្លាក់ពីលើស្ពាន ខ្ទេចស្ទើរទាំងស្រុង និងនគរបាលរបួសម្នាក់ ហើយរថយន្តសាំយ៉ុង ធ្លាក់ចុះស្នាមភ្លោះទៅមុខលែងរួច រីឯអ្នកបើកបរគេចខ្លួនបាត់ កាលពីម៉ោង ១២ និង ៣០ នាទីយប់ ឈានចូលថ្ងៃទី២០ ខែសីហា ឆ្នាំ២០១៥ លើកំណាត់ផ្លូវជាតិលេខ៥ ក្នុងភូមិព្រៃ ឪម៉ាល់ សង្កាត់រលាប ក្រុង-ខេត្តពោធិ៍សាត់ ។
គួរបញ្ជាក់ផងដែរ ៖ ឈ្មោះ មុន្នី មានទីលំនៅភូមិព្រៃចាស់ឃុំព្រៃចាស់ ស្រុកឯកភ្នំ ខេត្តបាត់ដំបង ជាឈ្មួញទិញកូនត្រីឆ្តោរពីប្រទេសវៀតណាម យកទៅខេត្តបាត់ដំបង ។ ឈ្មោះ មុន្នី ពេលនាំកូនត្រីចូលមកខេត្តបាត់ដំបងពេលយប់ បានបង់ប្រាក់អោយអាវុធហត្ថស្រុកមោងឬស្សី ក្នុង ១ លើក ២ លានរៀល និងត្រូវរ៉ូវគ្នាជាមួយមន្ត្រីជលផល ទើបយកទៅចែកចាយដល់ភូមិព្រៃចាស់បានយ៉ាងរលូន ។ ការដឹកជញ្ជូនកូនត្រី មានរថយន្តម៉ាកហៃលិនដឺនិងម៉ាកលុចស៊ី សាំយ៉ុង ប្តូរចល័តចុះឡើង។
ប្រភពបានអោយដឹងថា នៅម៉ោង១២និង៣០នាទីយប់ ឈានចូលថ្ងៃទី២០ ខែសីហា ឆ្នាំ២០១៥រថយន្ត Lexus RX300 ពណ៌ខ្មៅ ពាក់ស្លាកលេខ ភ្នំពេញ 2F-3923 របស់សមត្ថកិច្ចបើកវ៉ា និងបញ្ជាឲ្យឈប់ រថយន្តសាំយ៉ុងពាក់ស្លាកលេខភ្នំពេញ2T9365 ដឹកកូនត្រីឆ្តោរល្មើសច្បាប់បែរជាបង្កើនល្បឿន បុករថយន្តសមត្ថកិច្ចពីក្រោយ បណ្តាលឲ្យរថយន្តធ្លាក់ក្រឡាប់ពីលើស្ពាន ធ្លាក់ចូលក្នុងទឹក យ៉ាងដំណំចំណែករថយន្តសាំយ៉ុង ដឹកកូនត្រី ក៏ជ្រុលចង្កូចធ្លាក់ទៅម្ខាងផ្លូវក្បែរស្ពាន ទៅមុខលែងរួច។
បើតាមមន្ត្រីនគរបាលចរាចរណ៍ក្រុងបានឲ្យដឹងថា ក្រោយកើតហេតរថយន្តរបស់មន្ត្រី នគរបាលសេដ្ឋកិច្ច ក្រសួងមហាផ្ទៃ ត្រូវបានស្ទួចទាំងយប់ យកទៅរក្សាទុកនៅអធិការ នគរបាលក្រុងពោធិ៍សាត់ ចំណែករថយន្តម៉ាកសាំយ៉ុងដឹកកូនត្រីលុះព្រឹកឡើងទើបសមត្ថកិច្ច ស្ទួចយកទៅរក្សាទុក នៅអធិការក្រុងពោធិ៍សាត់ផងដែរ ។ ដោយឡែក កូនត្រីខាងសមត្ថកិច្ចជលផល ជាអ្នកចាត់ការទៅតាមនិតិវិធី ៕
