ខេត្តបន្ទាយមានជ័យ ៖ អាជីវករលក់ស៊ីមកាត លោក ជីង ឡុង និងក្រុមគ្រួសារ ព្រមទាំងគូដណ្តឹង (កញ្ញា លី សុឃីម) ចែកអំណោយដល់ជនក្រីក្រ មកពីស្រុកមង្គលបូរី និងក្រុងសិរីសោភ័ណ្ឌ សរុប ១៨០ គ្រួសារ កាលពីព្រឹកថ្ងៃទី១៥ ខែសីហា ឆ្នាំ២០១៥ នៅក្នុងបរិវេនវេទិការ ខេត្តបន្ទាយមានជ័យ ក្នុងភូមិ៣ សង្កាត់ព្រះពន្លា ក្រុងសិរីសោភ័ណ។
វត្តមានអញ្ជើញចូលរួមជាគណអធិបតីមានលោក គោស៊ុំ សារឿត អភិបាលខេត្តបន្ទាយមានជ័យ លោក អ៊ុំ រាត្រី អភិបាលរងខេត្តបន្ទាយមានជ័យ លោកស្រី ចាន់ ថេង អភិបាលក្រុងសិរីសោភ័ណ លោក ស្រេង សុផល តំណាងក្រុមសហភាពសហព័ន្ធយុវជនកម្ពុជា ខេត្តបន្ទាយមានជ័យ។
លោក ជីង ឡុង បានមានប្រសាសន៍ក្នុងពិធីចែកអំណោយនោះថា ដោយមើលឃើញនូវភាពអត់ឃ្លានរបស់ប្រជាពលរដ្ឋមួយចំនួន ដែលរស់នៅតាមជនបទពីមួយថ្ងៃទៅមួយថ្ងៃកាន់តែច្រើនឡើងៗ ទើបក្រុមគ្រួសារគាត់មានគំនិតមួយត្រូវតែជួយអ្នកអត់ឃ្លានទាំងនោះ ។ លោក ជីង ឡុង បាននិយាយបន្តថា មុននិងឈានទៅដល់រៀបអាពាហ៍ពិពាហ៍ រូបលោកត្រូវតែជួយដល់សង្គមខ្លះ លោកបានសន្សំប្រាក់ទុកក្នុងមួយខែ១២០ដុល្លាដាក់ក្នុងកូនជ្រូក លុះបានចំនួន៤ឆ្នាំបានលុយជាង៥ពាន់ដុល្លារ លោកយកប្រាក់ទាំងអស់នោះទៅទិញគ្រឿងឧបភោគនិងគ្រឿងបរិភោគយ៉ាងច្រើនយកទៅចែកជូនដល់ជនក្រីក្រី ដែលកំពុងអត់ឃ្លាននៅតាមជនបទទាំងនោះ ។
លោក ជីង ឡុង បានបន្តទៀតថា ប្រជាពលរដ្ឋក្រីក្រមានចំនួន១៨០គ្រួសារ មកពីជនបទឆ្ងាយមកពីឃុំទាំង ២ ស្រុកក្រុង មានស្រុកមង្គលបូរី និងក្រុងសិរីសោភ័ណ បានមកទទួលអំណោយពីលោក ជីង ឡុង ដោយផ្ទាល់ដៃក្នុងមួយគ្រួសារៗ ទទួលបានអង្ក ២៥ គីឡូរ ទឹកត្រី ២ ដបនិងទឹកស៊ីអ៊ីវ ២ ដប អំបិល ២ ថង់ស្មើ ១ គីឡូ ស្កសរ ១ ថង់ស្មើ ១ គីឡូក្រាមប៊ីចេង ១ ថង់ស្មើកន្លះគីឡូ និងថវិការចំនួន ១ ម៉ឺនរៀលទៀតផង ។
លោក គោស៊ុំ សារឿត អភិបាលខេត្តបន្ទាយមានជ័យបានមានប្រសាសន៍ថា លោកសូមថ្លែងអំគុណដល់លោក ជីង ឡុង និងក្រុមគ្រួសារ ដែលបានសន្សំថវិការយ៉ាងច្រើនសន្ធឹកសន្ធាប់ យកទៅទិញសម្ភារៈយកចែកជូនជនក្រីក្រ ដោយផ្ទាល់ដៃ ។ កាលពីដើមខែសីហា ឆ្នាំ២០១៥ លោក ជីង ឡុង បានផ្តល់អំណោយដល់ជនក្រីក្រ៧០នាក់ នៅនៅស្រុកអូរជ្រៅខេត្តបន្ទាមានជ័យម្តងរួចមកហើយ នេះជាលើកទី២ ដែលលោក ជីង ឡុង និងក្រុមគ្រួសារបានផ្តល់ជូនជនក្រីក្រចំនួន១៨០គ្រួសារទៀត ។ បើទោះបីអំណោយនេះ ស្តួចស្តើងមិនគ្រប់ក្រាន់ទុកហូបបានរាប់ឆ្នាំនោះក៏ដោយ ក៏វាអាចជួយក្នុងកាហូបបានមួយគ្រាដែរ ហើយលោកបានធ្វើការផ្តាំផ្ញើរដល់អ្នក ដែលបានទទួលអំណោយទាំងអស់ទៅលំនៅដ្ឋានវិញ ត្រូវចេះខិតខំធ្វើស្រែដាំដំណាផ្សេងទៀត ជុំវិញផ្ទះ កុំរំពឹងតែជំនួយពេកនោះវាមិនល្អទេ ចៀសវាងការប្រើអំពើហឹង្សានៅក្នុងគ្រួសារដាច់ខាត ដើម្បីក្រុមគ្រួសារសុខសប្បាយរបស់អស់លោកនិងអោយកូនចៅប្រឹងប្រែងរៀនសូតដើម្បីកាត់បន្ថយភាពក្រីក្រទៅថ្ងៃក្រោយ និងដើម្បីជាទំពាំងស្នងឬស្សីសំរាប់ប្រទេសជាតិទៅថ្ងៃអនាគត៕
