ប៉ៃលិន ៖ ឧកញ៉ា សេង ឈុនឡេង អ្នកមានមុខមាត់នៅខេត្តប៉ៃលិន ប្រើអំណាចអោយកូនចៅ ក្រោមឱវាទកាប់បំផ្លាញដំឡូងមីប្រជាពលរដ្ឋលើដី ៥០ ហិកតា មិនព្រមសង ដោយអាងអំណាចបក្ខពួកជាអ្នកធំនៅក្នុងខេត្ត ។
នៅថ្ងៃទី១០ ខែសីហា ឆ្នាំ២០១៥ លោក សំ គូលីន ម្ចាស់ដំឡូងមីបានអោយដឹងថា លោក មី មគ្គ អភិបាលរងខេត្តបានអោយភាគីទាំង២ចូលជួបគ្នា តែចូលទៅអង្គុយលេងមិនបានពិភាក្សារឿងសងថ្លៃកាប់បំផ្លាញដីដំឡូង មី ៥០ ហិកតាឡើយ ហើយសុំពន្យាពេលតទៅទៀត ទោះជារូបលោកម្ចាស់ដំឡូងមីស្នើអោយគាត់បញ្ជូនសំណុំរឿងទៅថ្នាក់លើ ក៏គាត់មិនព្រម ។
លោក សំ គូលីន ម្ចាស់ដំឡូងមីបានអោយដឹងថា កាលពីឆ្នាំ២០១៤ គាត់បានជួលដីឯកឧត្តម គឹម បូរី ចំនួន៥០ហិកតាដាំដំឡូងមី នៅចំណុចភូមិអន្លង់រក្សា ឃុំស្ទឹងត្រង់ ស្រុកសាលាក្រៅ ខេត្តប៉ែលិន ។ លុះថ្ងៃទី៩ ខែកុម្ភៈ ឆ្នាំ២០១៤ កូនចៅឧកញ៉ា សេង ឈុនឡេង ចំនួន៤នាក់ឈ្មោះ ពិន វណ្ណ ឈ្មោះ ម៉ៅ សាវី ឈ្មោះ ឌឿន ឈ្មោះ ដួង បាននាំកម្មករមកភ្ជួររាស់ដីចំនួន ២០ ហិកតា និងកាប់បំផ្លាញដំឡូងមីអស់ ៣០ ហិកតា ។
ក្រោយពីមានបណ្តឹងរបស់ សំ គូលីន ទៅសាលាខេត្ត ឯកឧត្តម គឹម បូរី ម្ចាស់ដីបានស្នើសុំតុលាការចេញដីការក្សការពារ ។
ដើមឆ្នាំ២០១៥ លោក កើត សុធា អភិបាលនៃគណៈអភិបាលខេត្តប៉ៃលិន បានដាក់ការសន្និដ្ឋានដោយលាយលាក់អក្សរថា តាមការអង្កេត និងពិនិត្យរបស់ក្រុមការងារឃើញថា លោក សំ គូលីន ពិតជាបានដាំដំណាដំឡូងមីលើដីចំណុចភូមិអន្លង់រក្សា ឃុំស្ទឹងត្រង់ស្រុក សាលាក្រៅ ខេត្តប៉ៃលិន ពិតប្រាកដ ហើយត្រាក់ទ័ររបស់លោកឧកញ៉ា សេង ឈុនឡេង បានភ្ជួរពីលើដីចំនួន២០ហិកតា ដែលមានមេការទទួលស្គាល់រួចហើយ ។ រីឯដំឡូងមី៣០ហិកតាទៀត មានក្រុមចូលរួមបានឃុបឃិតគ្នាកាប់បំផ្លាញដែលមានឈ្មោះ ចាន់ នី ឈ្មោះ ចាប វ៉ិត ដើម្បីប្រមូលផលប្រយោជន៍ ។ ការបាត់ដង់ខូចខាតខាងលើ លោក សំ គូលីន ទាមទារឲ្យមានអ្នកទទួលខុសត្រូវ និងមានសំណង ក្នុងតម្លៃ១ហិកតា ចំនួន ១៥០០ ដុល្លា។
ពាក់ព័ន្ធករណីនេះ កាលខែកក្កដា ឆ្នាំ២០១៥ អ្នកសារព័ត៌មានធ្លាប់បានធ្វើបទសម្ភាសជាមួយលោក មី មគ្គ អភិបាលរងខេត្តប៉ៃលិន អ្នកកាន់សំណុំរឿង លោកបានសុំអ្នកសារព័ត៌មាន មិនអោយទាន់ផ្សព្វផ្សាយ ដើម្បីទុកកេរ្តិ៍ឈ្មោះអោយឧកញ៉ា សេង ឈុនឡេង ហើយសន្យាអោយភាគីទាំងសងខាងចូលជួបគ្នារកដំណោះស្រាយ ៕
