បាត់ដំបង ៖ កូនត្រីពូជចម្រុះចំនួន ២ ម៉ឺនក្បាល ត្រូវបានប្រលែង និងដាំកូនឈើព្រៃលិចទឹក២០០ដើម ក្នុងទិវាមច្ឆាជាតិថ្ងៃទី១ ខែកក្កដា ក្រោមអធិបតីភាព លោក ចន្ទ័ សុផល អភិបាលខេត្តបាត់ដំបង ។
វត្តមានអញ្ជើញចូលរួមមាន លោក ជួង សុភា នាយខ័ណ្ឌជលផលបាត់ដំបង និងឯកឧត្តមលោកជំទាវ លោក លោកស្រី ក្រុមប្រឹក្សាសមាជិកសមាជិកាលោកគ្រូ អ្នកគ្រូ សិស្សានុសិស្ស ព្រមទាំងបងប្អូនប្រជានេសាទជាច្រើនកុះករ កាលពីព្រឹកថ្ងៃទី១៧ ខែកក្កដា ឆ្នាំ២០១៤ នៅសាលាបឯមសិក្សាសាលាត្រាវ ភូមិសាលាត្រាវឃុំកំពង់ព្រៀង ស្រុកសង្កែ ខេត្តបាត់ដំបង ។
លោក ជួង សុភា នាយខ័ណ្ឌជលផលបាត់ដំបងបានអោយដឹងថា ក្នុងការអនុវត្តកំណែទំរង់ស៊ីជម្រៅលើវិស័យជលផល នាឆ្នាំ២០១២ សម្រាប់ខេត្តបាត់ដំបងទាំងមូល រាជរដ្ឋាភិបាលបានសម្រេចលុបឡូតិ៍នេសាទចំនួន៩ឡូតិ៍ ដែលមានផ្ទៃដីសរុប ៨៩៨៧៥ ហិកតា ក្នុងនោះ បានកាត់ជូនប្រជាពលរដ្ឋចំនួន ៣៧៣២៥ ហិកតា ស្មើប្រមាណ៤២ភាគរយនិងរក្សាទុកធ្វើកន្លែងអភិរក្សជលផល ចំនួន៥២៥៥០ហិកតាគឺស្មើប្រមាណ៥៨ភាគរយ ។ ស្ថិតក្នុងតំណាក់កាលកំណែទម្រង់ស៊ីជំរៅ នៃវិស័យជលផលនេះ គួបផ្សំជាមួយនឹងអនុសាសន៍ដ៏ថ្លៃថ្លាជាបន្តបន្ទាប់ របស់សម្តេចអគ្គមហាសេនាបតីតេជោ ហ៊ុន សែន ខ័ណ្ឌរដ្ឋបាល ជលផលបាត់ដំបង នៃក្រសួងកសិកម្មរុក្ខាប្រមាញ់ និងនេសាទបានខិតខំអនុវត្តន៍យ៉ាងសកម្មដូចភ្លៀងរលឹម ដោយរួមសហការយ៉ាងជិតស្និទ្ធជាមួយដៃគូអភិវឌ្ឍន៍ស្ថាប័នពាក់ព័ន្ធអជ្ញាធរដែនដីកងកម្លាំងប្រដាប់អាវុធ និងសហគមនិ៍មូលដ្ឋានដោយប្រើប្រាស់មធ្យោបាយ សរុបវិធានការសរុប និងកម្លាំងសរុបលើគោលដៅសំខាន់ៗ មួយចំនួនរួមមានទី១ ការលុបបំបាត់បទល្មើសបំផ្លិចបំផ្លាញជលផលពិសេសការប្រើឧបករណ៍ ស្បៃមុងនិងឧបករណ៍ឆក់ ដែលមានឥទ្ធិពលយ៉ាងខ្លាំងលើជីវិតវារីជាតិគ្រប់ប្រភេទ ។ ទី២ការលើកកំពស់វារីវប្បកម្ម តាមរយៈការបំផុសចលនាលែងកូនត្រីក្នុងដែនទឹកធម្មជាតិ ។ ទី៣ ការអភិរក្សជម្រកត្រីមេពូជ និងទី៤ការការពារនិងដាំដុះពញរៃលិចទឹកឡើងវិញ។
ការសម្រេចបានរបស់ថ្នាក់ដឹកនាំរដ្ឋបាលជលផលនិងមន្ត្រីជំនាញរបស់ខ័ណ្ឌរដ្ឋបាល ជលផលខេត្តបាត់ដំបងរួមជាមួយស្ថាប័នពាក់ព័ន្ធ និងបងប្អូនប្រជានេសាយើងទទួលបាននូវសមិទ្ធផល ជាក់ស្តែង ដូចជា ៖-១-ការអភិវឌ្ឍន៍សហគមន៍នេសាទ, -២ការអភិរក្សធនធានជលផលនិងការអភិវឌ្ឍវារីវប្បកម្ម, -៣ ការបង្កើតស្រះជម្រកត្រីសហគមន៍-៤ការបង្ក្រាបបទល្មើសជលផល។
លោក ចន្ទ័ សុផល អភិបាលខេត្តបាត់ដំបងបានប្រសាសន៍ផ្តាំផ្ញើថា ប្រជានេសាទកុំប្រើឧបករណ៍នេសាទខុសច្បាប់ អួនស្បៃមុងក្រឡាញឹក គ្រឿងឆក់ ថ្មស្អុយ ថ្នាំពុលគ្រប់ប្រភេទ ឬចូលនេសាទ ក្នុងតំបន់បឹងអភិរក្ស មិនត្រូវនេសាទត្រីក្នុងរដូវបិទនេសាទទុកអោយត្រីពងរយៈពេលទឹកសម្រកចាំនេសាទ ។មិនត្រូវកាប់បំផ្លាញព្រៃលិចទឹក ឬចាប់សត្វអណ្តើកទន្សាយពស់ ឬចាក់ដីលប់បឹងបួរអូរស្ទឹងធ្វើជាប្រយោជន៍ផ្ទាល់ខ្លួន ។ អ្នកនេសាទមិនត្រូវបង្កជម្លោះដណ្តើមតំបន់នេសាទគ្នាទេព្រោះរដ្ឋាភិបាលបានប្រគល់ឡូតិ៍ នេសាទចំនួន៩ឡូតិ៍អោយបងប្អូនប្រើប្រាស់ គឺច្រើនណាស់ល្មមគ្រប់គ្រាន់ហើយ ។ យើងត្រូវចូលរួមលែងកូនត្រី និងដាំដើមឈើព្រៃលិចទឹកឡើងវិញដើម្បីអោយសម្បូរតសត្វសំរាប់ជាអាហារចិញ្ចឹមជីវិត ប្រជាពលរដ្ឋគ្រប់រូបនិងអនាគតកូនចៅគ្រប់ជំនាន់តទៅមុខ។
ជាចុងបញ្ចប់ លោក ច័ន្ទ សុផល អភិបាលខេត្តបាត់ដំបងបានប្រលែងកូនត្រីពូជចម្រុះចំនួន ២ ម៉ឺនក្បាល និងដាំកូនឈើព្រៃលិចទឹក ២០០ ដើម ជានិមិត្តរូបផងដែរ ៕
