ខេត្តបន្ទាយមានជ័យ ៖ លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធខេត្តបន្ទាយមានជ័យ និងក្រុមការងារជាច្រីននាក់បាននាំយកទៀនវស្សា និងទេយ្យទាន និងបច្ច័យមួយចំនួនយកទៅប្រគេនព្រះសង្ឃចំនួន ២ វត្ត សំរាប់ចូលវស្សា៣ខែ ដោយមានការផ្តួចផ្តើមឡើងរបស់លោកឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ កាលព្រឹកថ្ងៃទី១ សីហា ឆ្នាំ២០១៥ នៅស្រុកមង្គលបូរី ។
លោក ឱ បូរិន្ទ បាននិយាយថា វិស័យព្រះពុទ្ធសាសនាដែលជាសាសនារបស់រដ្ឋប្រជាពលរដ្ឋតែងតែគោរពនិងបូជាយ៉ាងល្អដល់ព្រះពុទ្ធសាសនា ធ្វើឲ្យជះឥទ្ធិពលដ៏ ល្អសំរាប់សង្គម និងគ្រួសារក៏ដូចជាប្រទេសជាតិទាំងមូលផងដែរ ។ នៅចំពោះមុខព្រះសង្ឃ និងពុទ្ធបរិស័ទក្នុងវត្តស្រះរង្សី លោក ឱ បូរិន្ទ បានផ្តាំផ្ញើនិងធ្វើការការសួរសុខទុក្ខដល់ប្រជាពលរដ្ឋ ដែលកំពុងជួបប្រទះនិងភាពរាំងស្ងួត រយៈពេលកន្លងមក ធ្វើឲ្យប្រជាពលរដ្ឋខ្វះទឹកបរិភោគ និងខ្វះទឹកធ្វើស្រែយ៉ាងខ្លាំង តែសំណាងល្អមានភ្លៀងធ្លាក់មកជោគជំធ្វើឲ្យស្រូវរស់ឡើងវិញ និងប្រជាពលរដ្ឋមានទឹកបរិភោគធម្មតាឡើងវិញ ។
លោក ឱ បូរិន្ទ បាននិយាយបន្តថា រយៈពេលកន្លងមកលោកឧបនាយករដ្ឋមន្ត្រី កែ គឹមយ៉ាន និងលោកអភិបាលខេត្ត និងប្រធានក្រុមប្រឹក្សាខេត្តតែងតែគិតគូរ ដល់ការរស់នៅរបស់ប្រជាពលរដ្ឋ តាមមូលដ្ឋាន ដោយឆ្លៀតរកពិភពទឹកឲ្យ ជួយសង់ផ្ទះ ឲ្យអ្នកដែលជួបប្រទះនូវខ្យល់កន្ត្រាក់បានជាច្រើនខ្នងនិងជួយឧបត្ថម្ភដល់ជនក្រីក្រ មេម៉ាយគ្មានទីពឹងនិងជួយជាមនុស្សធម៍ជាច្រើនទៀតផង ។
ឆ្លៀតក្នុងឱកាសនោះ ក៏បានលើកឡើងនូវការរីកចម្រើន របស់ប្រទេសកម្ពុជា ក្រោមការដឹកនាំរបស់សម្តេចតេជោ ហ៊ុន សែន យ៉ាងផុលផុស រយៈពេលជាច្រើនទស្សវត្តកន្លងមកនេះ ។
លោកបានបន្តទៀតថា សម្រាប់វត្តដងរុន ទទួលបានទៀនវស្សា១គូរស្លាដក មួយធុងធំ និងបច្ច័យ៧០ម៉ឺនរៀល ចំណែកយាយជីតាជីចំនួន ៥៩ នាក់ក្នុងម្នាក់ទទួលបាន១ម៉ឺនរៀល ។ បន្ទាប់មកវត្តសុរិយារាម ស្រះរាំងទទួលបានទៀនព្រះវស្សាចំនួន ២ គូ និងបច្ច័យ៩០ម៉ឺនរៀល ព្រមទាំងគ្រឿងឧបភោគ បរិភោគ មួយជាច្រើនផ្សេងទៀត ។ ជាមួយគ្នានោះផងដែរ លោក ឱ បូរិន្ទ ក្នុងនាមជាប្រធានក្រុមការងារចុះជួយឃុំស្រះរាំង បានជួបសំណេះសំណាលជាមួយ មេភូមិ សមាជិកភូមិទាំង ៩ ភូមិសុំឲ្យនាំគ្នាចុះធ្វើបច្ចុប្បន្នភាព ប្រជាពលរដ្ឋក្នុងភូមិរបស់ខ្លួន ឲ្យបានច្បាស់លាស់ និងតាមដានមើលរាល់ការរស់នៅតើគាត់ធ្វើអ្វី ទៅណា ។ បន្ទាប់ ពីសំណេះសំណាល លោក ឱ បូរិន្ទ បានជូនរបស់ចំណងដៃដល់មេភូមិ និងក្រុមប្រក្សាឃុំ១៦នាក់ទទួលបានប៊ីចេង ១ កញ្ចប់ថវិកា ២ ម៉ឺនរៀល និងសន្យាទិញទូរស័ព្ទ ឲ្យមេភូមិទាំង៩ភូមិម្នាក់ ១ គ្រឿង ដើម្បីងាយស្រួលធ្វើការងារទាក់ទងគ្នាផងដែរ ៕
