បាត់ដំបង ៖ កុមារាម្នាក់ដើរលេងលង់ទឹកស្ទឹងសង្កែស្លាប់ ពេលជីដូនអោយនៅផ្ទះម្នាក់ឯង ត្រូវបានអ្នករត់ទូកដរប្រទះឃើញ កាលរសៀលថ្ងៃទី១ ខែសីហា ឆ្នាំ២០១៥ នៅបេនទូកដរ មុខមន្ទីរពេទ្យបង្អែកបាត់ដំបង ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។
ប្រភពពីស្ត្រីចំណាស់ ឈ្មោះជុំរិនអាយុ៥៣ឆ្នាំត្រូវជីដូនកុមារារងគ្រោះ រស់នៅភូមិកំពុងក្របី សង្កាត់ស្វាយប៉ោក្រុងបាត់ដំបង បានអោយដឹងថា ពេលម៉ោង១រសៀល កាលរសៀលថ្ងៃទី១ ខែសីហា ឆ្នាំ២០១៥ ខ្ញុំត្រឡប់មកពីទូលបាយលក់ក្នុងផ្សារបឹងឈូកដល់ផ្ទះមិនឃើញចៅប្រុសឈ្មោះ ឆន ម៉ៅ អាយុ៧ឆ្នាំ(ឳពុកម្តាយរត់ចោលអស់) ក៏ដើររកអស់ជាច្រើនម៉ោង ដោយមិនដឹងទៅទីណា ។ លុះម៉ោងជាង៤រសៀលថ្ងៃដដែល ក៏មានអ្នកកាសែតឈ្មោះ សុខ កុសល ផ្តល់ព័ត៌មានដល់ខ្លួនថា អ្នករត់ទូកដរឈ្មោះ ផាន់ប៉ោអាយុ៣៤ឆ្នាំ ទូរស័ព្ទមកប្រាប់អ្នកកាសែតស្រង់បានសពក្មេងប្រុសម្នាក់លង់ទឹកស្លាប់ ក្រោយពីទទួលខ្លួនជាជីដូនក៏ទៅមើល ក៏ឃើញសពចៅតែម្តង ។
ភ្លាមនោះ ក្រុមកម្លាំងសមត្ថកិច្ចចម្រុះបានចុះពិនិត្យដល់កន្លែងកើតហេតុ និងធ្វើកោសល្យវិច័យ ឃើញថាកុមារារងគ្រោះពិតជាស្លាប់ដោយសារការលង់ទឹកប្រាកដមែន ហើយបានប្រគល់សពអោយជីដូនយកទៅធ្វើបុណ្យតាមប្រពៃណី ៕
