ខេត្តរតនគិរី ៖ ជនរងគ្រោះពីរនាក់ម្តាយកូនបានមកដាក់ពាក្យបណ្តឹងទៅសាលាដំបូង ខេត្តរតនគិរីចោទ លោក ជួប វណ្ណរក្ស អធិការនគរបាលស្រុកអូរយ៉ាដាវ និងបក្សពួកចំនួន ៣ នាក់ឃុបឃិតគ្នាលោមយកកូនស្រីគាត់ទៅអោយអធិការរំលោភបានសម្រេច ពីរលើក រួចគំរាមសម្លាប់បើនាងហ៊ានប្រាប់គេ ករណីនេះជនរងគ្រោះពីរនាក់ម្តាយកូនបានប្តឹងទារជម្ងឺចិត្ត២ម៉ឺ ដុល្លារ ។
ទាក់ទិននិងករណីខាងលើត្រូវស្ត្រីជាម្តាយនឹងកូនស្រីរងគ្រោះបាន រៀបរាប់ដូចគ្នាថា គាត់ជាម្តាយមានឈ្មោះ សេន ស៊ីលិក អាយុ៥៧ឆ្នាំ និងកូនស្រីឈ្មោះ នាង លីតតា អាយុ២១ឆ្នាំ ទាំងពីរនាក់ជាជនជាតិខ្មែរ មុខរបរ ដើរស៊ីឈ្នួលបេះម្រេច និងដកដំឡូង រស់នៅភូមិអ៊ុន ឃុំលំជ័រ ស្រុកអូរយ៉ាដាវ ខេត្តរតនគិរី(ផ្ទះទល់មុខអធិការដ្ឋានស្រុកអូរយ៉ាដាវ)។
បើតាមការរៀបរាប់ក្នុងពាក្យបណ្តឹងរបស់ស្ត្រីពីរនាក់ម្តាយនឹង កូនថា កាលពីថ្ងៃទី០៦ ខែមិនា ឆ្នាំ២០១៥ វេលាម៉ោងប្រហែលម៉ោង៨និង០០នាទីយប់ កូននាងខ្ញុំឈ្មោះ នាង លីតតា អាយុ២១ឆ្នាំ មានស្មាតីមិនពេញលក្ខណៈ បានដើរចេញពីផ្ទះដើម្បីរកទិញអីហូបក៏ស្រាប់តែជួបឈ្មោះចរ ប៊ុនសៃ ហៅប៉ោយ ជាមន្ត្រីប៉ូលិសនៅអធិការដ្ឋាននគរបាលស្រុកអូរយ៉ាដាវ បានបបូលកូននាងខ្ញុំឈ្មោះនាង លីតតា មករកហូបអីកន្លែងភោជនីដ្ឋានជំនោរាត្រីដែលមានឈ្មោះ ចរ ប៊ុនសៃ ជាអ្នកជិតខាងស្គាល់គ្នា ។ បន្ទាប់មកបាននាំកូននាងខ្ញុំ ដោយមិនដឹងថាឈ្មោះចរ ប៊ុនសៃ បាននាំអោយជួបលោកអធិការអូរយ៉ាដាវឈ្មោះជួប វណ្ណរក្ស នោះទេ ហើយឈ្មោះជួប វណ្ណរក្ស បានហៅអាហានិងស្រាបៀអាន់ឆ័រចំនួន០៦កំប៉ុង ក្រោយមកឈ្មោះចរ ប៊ុនសៃ បានចាក់ស្រាបៀអោយកូននាងខ្ញុំផឹកអស់ចំនួន០២កំប៉ុង ធ្វើឲ្យកូននាងខ្ញុំ បាត់បង់ស្មារតី នៅពេលនោះ ឈ្មោះ ជួប វណ្ណរក្ស បានលោមយកកូននាងខ្ញុំ ជិៈរថយន្តម៉ាកហាយឡេឌ័រពណ៌ទឹកមាសពាក់ស្លាកលេខ៨១៨០ ហើយបានបើកនាំកូននាងខ្ញុំចូលបន្ទប់ផ្ទះសំណាក់រតនៈជូលីនៅផ្សារ ស្រុកបរកែវ ។ ពេលដែលកូននាងខ្ញុំ បានដឹងខ្លួនទើបដឹងថានៅផ្ទះសំណាក់ ឈ្មោះជួប វណ្ណរក្ស បានធ្វើសកម្មភាពរំលោភសេពសន្ថវៈមកលើកូននាងសម្រេច។ ក្រោយមកឈ្មោះជួប វណ្ណរក្ស បានដឹកកូននាងខ្ញុំ ត្រលប់មកផ្ទះមកវិញ។ ពេលមកដល់ជិតផ្ទះរៀបចុះពីលើរថយន្តឈ្មោះ ជួប វណ្ណរក្ស បាននិយាយប្រាប់កូននាងខ្ញុំថាថ្ងៃក្រោយបើឃើញរថយន្តគាត់អោយដើរ ចូលក្នុងបន្ទប់ធ្វើការទៅ។
ក្រោយមកខែឧសភា ឆ្នាំ២០១៥ វេលាម៉ោង១១និង១០នាទីយប់ ដោយសារតែកូននាងខ្ញុំឈ្មោះលីតតា ខ្លាចអំណាចរបស់លោកជួប វណ្ណរក្ស ជាអធិការស្រុកអូរយ៉ាដាវ កូននាងខ្ញុំ ក៏បានដើរចូលទៅកន្លែងអធិការដ្ឋាននគរបាលស្រុកអូរយ៉ាដាវពេលនោះ លោក ជួប វណ្ណរក្ស បានលើកកាំភ្លើងប្រុងបាញ់កូននាងខ្ញុំឈ្មោះ នាង លីតតា រួចបានហៅកូននាងខ្ញុំចូលក្នុងបន្ទប់ធ្វើការរបស់គាត់ហើយក៏បាន ធ្វើសកម្មភាពចាប់បង្ខំរំលោភសេពសន្ថវៈកូននាងខ្ញុំនៅលើប៉ៅអ៊ី បានសម្រេចជាលើកទី២ ក្រោយរំលោភសេពសន្ថវៈរួចក៏ប្រាប់អោយកូននាងខ្ញុំត្រលប់ដើរទៅផ្ទះ វិញ ដោយហុចលុយ៥០ដុល្លាអាមេរិក រួចក៏បានបង្ខំអោយកូននាងខ្ញុំអោយទៅធ្វើការនៅហាងខារ៉ាអូរខេ សប្បាៗនៅខេត្តស្ទឹងត្រែង។
បន្ទាប់មកដល់ថ្ងៃទី២៩ ខែមិថុនា ឆ្នាំ២០១៥ វេលាម៉ោង៩និង៣០នាទីយប់ កូននាងខ្ញុំ បានដើរចេញពីផ្ទះទៅកន្លែងអធិការនគរបាលស្រុកអូរយ៉ាដាវតាមការបញ្ជា របស់លោក ជួប វណ្ណរក្ស ក៏បានជួបមន្ត្រីនគរបាល ឈ្មោះ ហាវ សុខហេន បានយកឈើបន្ទះក្តាប្រវែងកន្លះម៉ែត្រមកវាយកូននាងខ្ញុំចំកែងដៃ ខាងធ្វេង ហើយឈ្មោះឃុត វិច្ច័យ បានឈរកាន់បន្ទះក្តាដោយនិយាយគំរាមវាយបំបាក់កចោលឥឡូវ និងឈ្មោះចរ ប៊ុនសៃ បានគំរាមបាញ់សម្លាប់កូននាងខ្ញុំបច្ចុប្បន្នកូននាងខ្ញុំឈ្មោះនាង លីតតា មានសុខភាពទ្រុតទ្រោមនិងមានជម្ងឺដោយសារការភ័យខ្លាច។
ក្នុងរឿងការចោទប្រកាន់ខាងលើត្រូវបានលោក ជួប វណ្ណរក្ស អធិការស្រុកអូរយ៉ាដាវបានអោយសារពត៌មាននៅថ្ងៃទី៥រសៀល ថ្ងៃទី៣០ ខែកក្កដា ឆ្នាំ២០១៥ ដឹងថាក្នុងករណីនេះដោយមានការញោះញុងនិងមានមនុស្សនៅពីក្រោយខ្នង ចង់ដណ្តើមអំណាចរបស់គាត់។ ស្ត្រីរងគ្រោះគាត់គ្មានចេតនាទៅរំលោភដូចការចោទប្រកាន់នោះទេ ព្រោះក្មេងស្រីនេះដើរលេងពេលយប់ ដេកតាមផ្លូវដូចមនុស្សញៀនថ្នាំ ចំណែកគាត់ជាអ្នកមានមុខមាត់ និងជាមន្ត្រីរាជការផងមិនអាចប្រព្រឹត្តិដូចពាក្យចោទប្រកាន់នោះឡើយ ។
លោក ងួន គឿន ស្នងការនគរបាលខេត្តបានឲ្យដឹងតាមទូរស័ព្ទវេលាម៉ោង៨ព្រឹក ថ្ងៃទី៣១ ខែកក្កដា ឆ្នាំ២០១៥ ថា រឿងនេះខាងលើពិតជាមានមែន កម្លាំងស្នងការធ្វើតាមដានស្រាវជ្រាវរឿងករណីខាងលើនេះ៕
ជីវ៉ា
