ខេត្តបន្ទាយមានជ័យ ៖ អាវុធហត្ថក្រុងប៉ោយប៉ែតឃាត់ខ្លួនបុរស ២ នាក់ពាក់ព័ន្ធករណីលួចនិងផលចោរកម្ម កសាងសំណុំរឿងបញ្ជូនទៅតុលាការ ហើយសម្ភារៈប្រគល់អោយម្ចាស់ដើមវិញ ថ្ងៃទី ២៦ ខែកក្កដា ឆ្នាំ ២០១៥ ។
សមត្ថកិច្ចអាវុធហត្ថក្រុងប៉ោយប៉េតបានអោយដឹងថា យោងតាមពាក្យបណ្ដឹងចុះថ្ងៃទី២៤ ខែកក្កដា ឆ្នាំ ២០១៥ របស់ជនរងគ្រោះឈ្មោះ កុក អៀងលី ហៅ អៀង ភេទ ប្រុស អាយុ ៤៣ឆ្នាំ រស់នៅភូមិ បាលិលេយ្យ២សង្កាត់និងក្រុង ប៉ោយប៉ែត ខេត្តបន្ទាយមានជ័យ បានប្ដឹងទៅលើជនសង្ស័យចំនួន ២ នាក់ក្នុងករណីលួច កាលពីថ្ងៃទី២១ កក្កដា ២០១៥ វេលាម៉ោង១១និង០០នាទី ដែលប្រព្រឹត្តិនៅត្រង់ចំណុចក្នុងផ្ទះ ស្ថិតនៅភូមិ បាលិលេយ្យ សង្កាត់និងក្រុងប៉ោយប៉ែតដូចមាន 1/ឈ្មោះ ឡាយ សុគា ភេទ ប្រុស អាយុ ២២ឆ្នាំ មានស្រុកកំណើត ភូមិ បាលិលេយ្យ សង្កាត់និងក្រុងប៉ោយប៉ែត ខេត្តបន្ទាយមានជ័យ។ 2/ ឈ្មោះ សូត្រ សុខុម ហៅ ម៉ាប់ ភេទ ប្រុស អាយុ ៣៥ឆ្នាំជាអ្នកទទួលទិញទ្រព្យ មានស្រុកកំណើត ភូមិកូប ឃុំ កូប ស្រុក សិរីសោភ័ណ ខេត្តបាត់ដំបង។ បច្ចុប្បន្ន រស់នៅភូមិ បាលិលេយ្យ២សង្កាត់និងក្រុងប៉ោយប៉ែត ខេត្តបន្ទាយមានជ័យ។
តាមការរៀបរាប់របស់ដើមបណ្ដឹងថា មានចោរលួចគាស់ទំលុះទំលាយបង្អួចផ្ទះផ្នែកខាងក្រោយ ចូលយកទ្រព្យសម្បត្តិ ក្នុងមានដូចជាឧប្បករណ៍បំពងសំលេងដូចជាធុងបាស់ ចំនួន ២ គ្រាប់ អំភ្លីចំនួន ២ គ្រឿង និងម៉ាស៊ីនត្រជាក់ចំនួន 1 គ្រឿងនៅពេលដែលជនរង្គ្រោះមិនបាននៅផ្ទះរវល់ទៅរកស៊ីស្នាក់នៅបណ្ដោះអាសន្នក្នុងផ្សាររោងគ្លឿប្រទេសថៃ ។
តាមសាក្សីឈ្មោះ សុខ ម៉ារ៉េត ហៅ តាវែង បានបំភ្លឺថា ចៅស្រីរបស់គាត់ប្រាប់គាត់ថាឃើញឈ្មោះគាបានលីធុងបាស់នៅម្ដុំផ្ទះរបស់គាត់ពីថ្ងៃមុនតែមិនដឹងថាធុងបាស់នេះជាធុងបាស់របស់អ្នកណាទេ។ ក្រោយពីទទួលពាក្យបណ្ដឹង ទើបសមត្ថកិច្ចអាវុធហត្ថចំនួន4នាក់ដឹកនាំដោយលោក អនុសេនីយ៍ឯក ជា ដា មេបញ្ជាការមូលដ្ឋានអវុធហត្ថក្រុងប៉ោយប៉ែតបានចុះប្រតិបត្តិការស្រាវជ្រាវ រហូតឈានដល់ធ្វើការឃាត់ខ្លួនជនសង្ស័យជាបន្តបន្ទាប់បានចំនួន 2 នាក់ ដូចមានឈ្មោះខាងលើនៅចំណុច ឡធ្យូង ស្ថិតក្នុងភូមិ បាលិលេយ្យ2 សង្កាត់និងក្រុងប៉ោយប៉ែត។
ជនសង្ស័យឈ្មោះ ឡាយ សុគា បានឆ្លើយសារភាពថា ខ្លួនគេពិតជាបានប្រព្រឹត្តិអំពើលួចខាងលើនេះពិតប្រាកដមែនដោយរូបគេនិងមិត្តភក្ដិគេម្នាក់ទៀតឈ្មោះ ណាក់ហៅ រក្ស ភេទ ប្រុស បាននាំគ្នាលួចគាស់ទំលុះទំលាយបង្អួចផ្ទះរបស់គេផ្នែកខាងក្រោយដោយប្រើញញួរដងដែករួចចូលលួចយកទ្រព្យទាំងអស់នេះមែន ។
បច្ចុប្បន្ន សមត្ថកិច្ច អ ហ ខេត្ត កំពុងកសាងសំណុំរឿងបញ្ជូនទៅតុលាការចាត់ការតាមនិតិវិធី ។ ចំណែកវត្ថុតាងត្រូវបានសមត្ថកិច្ចប្រគាល់អោយម្ចាស់វិញហើយ ។ ចំណែកជនសង្ស័យឈ្មោះ ណាក់ ហៅ រក្ស សមត្ថកិច្ចកំពុងស្រាវជ្រាវចាប់ខ្លួនបន្តទៀត ៕
