បាត់ដំបង ៖ ក្រុមចោរប្រដាប់អាវុធប្រហែល ៥ នាក់បានដាក់ជណ្តើរចូលកុដិ វាយចាប់ចងព្រះសង្ឃប្លន់យកមាសប្រាក់ រួចគេចខ្លួនដោយសុវត្ថិភាព នៅចន្លោះម៉ោង១ទៅម៉ោង២យប់ ថ្ងៃទី១៨ ខែកក្កដា ឆ្នាំ២០១៥ ចំនុចបរិវេណវត្តតាប៉ុន ស្ថិតក្នុងភូមិឃុំតាប៉ុន ស្រុកសង្កែ ខេត្តបាត់ដំបង ។
ប្រភពពីអាចារ្យ និងដូនជីនៅក្នុងវត្តតាប៉ុនបានអោយដឹងថា នៅយប់កើតហេតុ ក្រុមចោរបានជិះរថយន្តម៉ាកកាំម៉ារីពណ័ស ១ គ្រឿង ចូលក្នុងបរិវេណវត្តតាប៉ុន ពួកវាមានគ្នា ៥ នាក់ប្រដាប់ដោយកាំភ្លើងខ្លី ១ ដើមកាំភ្លើងវែង ១ ដើម បានដាក់ជណ្តើរឈើ១ និងជណ្តើរដែក ១ ឡើងចូលតាមបង្អួចចូលកុដិ លោកចៅអធិការវត្ត ធ្វើសកម្មភាពប្លន់តែម្តង ។ ពេលធ្វើសកម្មភាព ពួកវាបានចាប់លោកសង្ឃនាម ចិន ជេត ជន្មាយុ៤៦វស្សា ជាចៅអធិការវត្ត ចងជាប់និងសសរកាឡោង លើកុដិ បណ្តាលអោយសន្លប់ ក្រោយមកក្រុមចោរបានយកប្រាក់ខ្មែរ ៣ លានរៀល (ប្រាក់សប្បុរសជនផ្ញើរ) ប្រាក់អាមេរិកចំនួន២ពាន់ដុល្លារ (ប្រាក់សំរាប់បើកអោយជាងសាងសង់កុដិ) និងប្រាក់ខ្មែរ៨០ម៉ឺនរៀល បានមកពីការស្រោចទឹករំដោះគ្រោះដល់ប្រជាពលរដ្ឋ ។
នៅព្រឹកថ្ងៃទី១៨ ខែកក្កដា ឆ្នាំ២០១៥ កម្លាំងសមត្ថកិច្ចអាវុធហត្ថនិងនគរបាលបានចុះធ្វើកំណត់ហេតុស្រាវជ្រាវ និងកំណត់មុខសញ្ញាតាមចាប់ខ្លួនក្រុមជនសង្ស័យយកមកផ្តន្ទាទោសតាមផ្លូវច្បាប់ ៕
