បាត់ដំបង ៖ អង្គការផ្សព្វផ្សាយ ព័ត៌មាន Home Media បាន សហការជាមួយអាជ្ញាធរ ខេត្តបាត់ដំបង ធ្វើពិធីចុះផ្សព្វផ្សាយច្បាប់ ចរាចរណ៍ នៅខេត្តបាត់ដំបង ក្រោមអធិបតីភាព លោក ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន លោក ប៊ុត គឹមស៊ាន អភិបាលរងខេត្ត លោក សាម៉ន បណ្ឌិត នាយកអង្គការ Home Media ។ នាព្រឹកថ្ងៃទី ១៦ ខែកក្កដាឆ្នាំ២០១៥នៅមុខសាលា ខេត្តបាត់ដំបង។
ពិធីនេះក៏មានការអញ្ជើញ ចូលពីថ្នាក់ដឹកនាំមន្ត្រីរាជការ សិស្សនិស្សិតមកពីគ្រិស្ថាន សិក្សារដ្ឋនិងឯកជន ជាច្រើនរូបផងដែរ។
បន្ទាប់ពីមតិស្វាគមន៍របស់លោក សាម៉ន បណ្ឌិត នាយកអង្គការ Home Media រួចមក លោក ប៊ុត គឹម ស៊ាន អភិបាលរងខេត្តបាន អបអរសាទរនិងថ្លែងអំណរគុណលោកនាយកអង្គការនេះ បានបង្កលក្ខណៈនិងធ្វើពិធីនេះ ឡើងក្នុងបំណងផ្សព្វផ្សាយ ច្បាប់ចរាចរណ៍ដល់ប្រជាពលរដ្ខ ពិសេសក្នុងស្រទាប់យុវវ័យក្នុងខេត្ត ដើម្បីការ បន្ថយអាត្រាស្លាប់ និងរបួសដោយសារគ្រោះថ្នាក់ ចរចរណ៍ឲ្យនៅកម្រិតទាបបំផុត ក្រោមពាក្យស្លោកថា ថ្ងៃនេះ និងថ្ងៃស្អែកសូមកុំឲ្យមានគ្រោះថ្នាក់ចរាចរណ៍។
លោក ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន មានប្រសាសន៍សំណេះសំណាល ក្នុងអង្គពិធីនោះដែរ ដោយបានបញ្ជាក់ថា យើងទាំងអស់គ្នាត្រូវនាំគ្នា ចូលរួមគោរពច្បាប់ចរាចរណ៍។
លោកបានបន្តថា ការគោរពច្បាប់ចរាចរណ៍នេះ ពិសេសប្អូនៗយុវ័យ យើងពាក់មួកសុវត្តិភាព សម្រាប់ការពារ អាយុជីវិតយើងនិងជិវិត អ្នកដ៏ទៃមិនមែនពាក់មួកសម្រាប់ខ្លាចសមត្ថកិច្ចផាកពិន័យនោះទេ។ ព្រោះបញ្ហាស្លាប់ និងរបួសដោយសារគ្រោះថ្នាក់ចរាចរណ៍ នៅកម្ពុជាមានការកើនឡើងរាល់ថ្ងៃ គួរឲ្យខ្លាចជាងជម្ងឺ អេដស៍ទៅទៀត ។ បន្ទាប់ពីសំណេះសំណាល រួចគណអធិបតី បានប្រគល់មួកសុវត្តិភាព ជូនដល់ប្អូនៗនិស្សិតម្នាក់មួយនិងថតរូបរួមគ្នាទុកជា អនុស្សាវរីយ៍ផងដែរ ៕
សុខ កុសល
