បាត់ដំបង ៖ កម្លាំងអាវុធហត្ថក្រុងបាត់ដំបងបញ្ជូនខ្លួនបុរស៣នាក់និងថ្នាំញៀនម៉ាទឹកកក២ ថ ង់ស្មើ១០,៤៦ក្រាមដាវសាម៉ូរ៉ៃ១និងសម្ភារៈមួយចំនួនទៀតទៅតុលាកានាព្រឹកថ្ងៃទី២ខែកក្កដាឆ្នាំ២០១៥ចាត់ការតាមនិតិវិធី។
ជនសង្ស័យទាំង ៣ នាក់ ត្រូវកម្លាំងអាវុធហត្ថក្រុងបាត់ដំបង សហការអាវុធហត្ថស្រុកឯកភ្នំ ឃាត់ខ្លួនកាលពីម៉ោង១០និង៤០នាទី ព្រឹកថ្ងៃទី០១ ខែកក្កដា ឆ្នាំ២០១៥ នៅភូមិសំរោងអូរទ្រា និងភូមិសំរោងស្នោរ ឃុំសំរោង ក្នុងស្រុកឯកភ្នំ ខេត្តបាត់ដំបង ។
លោកសំវិឡុងមេបញ្ជាការរងអាវុធហត្ថក្រុងបាត់ដំបងបានអោយដឹងថា បុរសសង្ស័យ ដែលឃាត់ខ្លួន ៣ នាក់មាន ៖ ទី១ ឈ្មោះ សឺត ឧត្តម អាយុ៣១ឆ្នាំ មានទីលំនៅនៅភូមិសំរោងអូរទ្រា ឃុំសំរោង ក្នុងស្រុកឯកភ្នំ ខេត្តបាត់ដំបង ។ ទី២ ឈ្មោះ យស់ តុលា អាយុ២៤ឆ្នាំ ភូមិសំរោងស្នោរ ឃុំសំរោង ក្នុងស្រុកឯកភ្នំ ខេត្តបាត់ដំបង ។ ទី៣ ឈ្មោះ រិន ដាវី អាយុ២២ឆ្នាំ មានទីលំនៅភូមិម៉ាក់ឃ្លឿ ឃុំព្រៃខ្ពស់ ស្រុកបវេល ខេត្តបាត់ដំបង ដកហូតវត្ថុតាងបានថ្នាំញៀនម៉ាទឹកកក ២ ថង់ ស្មើ១០,៤៦ក្រាម ដាវសាម៉ូរ៉ៃ១ និងសម្ភារៈមួយចំនួនទៀត ។
លោក សំ វិឡុង មេបញ្ជាការរងអាវុធហត្ថក្រុងបាត់ដំបងបានបញ្ជាក់ថា មុនពេលកើតហេតុកម្លាំងរបស់សមត្ថកិច្ចបានទំនាក់ទំនងទិញថ្នាំញៀនពីឈ្មោះ សឺត ឧត្តម អាយុ៣១ឆ្នាំ មានទីលំនៅនៅភូមិសំរោងអូរទ្រា ឃុំសំរោងក្នុងស្រុកឯកភ្នំ ខេត្តបាត់ដំបង ។ ជនសង្ស័យបានណាត់ធ្វើការដោះដូរថ្នាំញៀន នៅក្នុងក្រុងបាត់ដំបង ក្រោយមកបានប្តូរគោលដៅដោះដូរថ្នាំញៀន ទៅភូមិសំរោងអូរទ្រា ឃុំសំរោងក្នុងស្រុកឯកភ្នំខេត្តបាត់ដំបងវិញ បន្ទាប់មកសមត្ថកិច្ចបានសុំគោលការណ៍លោក ហេង លុយ ព្រះរាជអជ្ញារងបន្តធ្វើការញុះញុងបន្ត រហូតឃាត់ខ្លួនជនសង្ស័យខាងលើជាបន្តបន្ទាប់ ។
ក្រុមសង្ស័យបានអោយដឹងថា ថ្នាំញៀនទាំងនេះទទួលទិញពីជនមិនស្គាល់សាវតាយកមកលក់ក្នុងឃុំសំរោងក្នុង។
បច្ចុប្បន្ន បុរសសង្ស័យទាំង ៣ នាក់និងថ្នាំញៀនម៉ាទឹកកក ២ ថង់ ស្មើ១០,៤៦ក្រាម ដាវសាម៉ូរ៉ៃ១ និងសម្ភារៈមួយចំនួនទៀត ត្រូវបានកសាងសំណុំរឿងជួញដូរនូវសារធាតុញៀនខុសច្បាប់បញ្ជូនទៅតុលាការ នាព្រឹកថ្ងៃទី២ ខែកក្កដា ឆ្នាំ២០១៥ ចាត់ការតាមនិតិវិធី ៕
សុខកុសល
