បាត់ដំបង ៖ បុរសសង្ស័យម្នាក់ត្រូវកម្លាំងអាវុធហត្ថស្រុកមោងឬស្សី ធ្វើការឃាត់ខ្លួន ពេលកំពុងឈលក់ចែកចាយកាលម៉ោង១៤និង២០នាទីរសៀល ថ្ងៃទី៣០ ខែមិថុនា ឆ្នាំ២០១៥ នៅចំណុចវាលស្រែភូមិថ្នល់បត់ ឃុំឬស្សីក្រាំង ស្រុកមោងឬស្សី ខេត្តបាត់ដំបង បញ្ជូនទៅទីបញ្ជាការអាវុធហត្ថខេត្ត ។
លោក សរ សេដ្ឋា នាយការិយាល័យប្រឆាំងបទល្មើសគ្រឿងញៀន អាវុធហត្ថបានអោយដឹងថា បុរសសង្ស័យ ដែលសមត្ថកិច្ចឃាត់ខ្លួនមានឈ្មោះ ចាន់ ចែម អាយុ២៤ឆ្នាំ រស់នៅភូមិអំពិលឈូងឃុំឬស្សីក្រាំង ស្រុកមោងឬស្សី ខេត្តបាត់ដំបង ។ វត្ថុតាងដែលដកហូតបានមាន(ម្សៅក្រាមពណ៌ស) ថ្នាំញៀនម៉ាទឹកកក ចំនួន ១៤ ថង់តូច នៅក្នុងកូនកាបូប បន្តោងសោរម៉ូតូ១ ទូរស័ព្ទដៃចំនួន២គ្រឿង និងម៉ូតូម៉ាក MSX ពណ៌សលាយខ្មៅ ចំនួន១គ្រឿង ។
បុរសសង្ស័យឈ្មោះ ចាន់ ចែម បានសារភាពថា ខ្លួនបានរកស៊ីចែកចាយគ្រឿងញៀន មានរយៈពេលជាង ៥ ខែកន្លងមកហើយ រីឯថ្នាំញៀនទាំងនេះ គឺទិញពីខេត្តពោធិ៍សាត់មក ។
បុរសម្នាក់សង្ស័យ និងថ្នាំញៀនម៉ាទឹកកក ចំនួន១៤ថង់ និងសម្ភារៈមួយចំនួនត្រូវកម្លាំងអាវុធហត្ថប្រឆាំងគ្រឿងញៀនបញ្ជូនទៅតុលាការ នាព្រឹកថ្ងៃទី០១ ខែកក្កដា ឆ្នាំ២០១៥ ចាត់ការតាមនិតិវិធី ៕
សុខកុសល
