បាត់ដំបង ៖ កម្លាំងនគរបាលការិយាល័យប្រឆាំងគ្រឿងញៀន ខេត្តកសាងសំណុំរឿងបញ្ជូនបុរសម្នាក់ និងថ្នាំញៀនម៉ាទឹកកក ៦០០ ក្រាមនិងសំភារៈវេច ខ្ចប់ទៅតុលាការនាព្រឹកថ្ងៃទី២៩ ខែមិថុនា ឆ្នាំ២០១៥ ចាត់ការតាមនិតិវិធី ។
បុរសសង្ស័យម្នាក់ត្រូវកម្លាំងនគរបាលក្រុងបាត់ដំបងធ្វើការបង្ក្រាបឃាត់ខ្លួនក្នុងបទល្មើសជាក់ស្តែងកាលវេលាម៉ោង១០.៣០នាទីយប់ថ្ងៃទី២៥មិថុនាឆ្នាំ២០១៥ក្នុងភូមិ/សង្កាត់ទួលតាឯកក្រុងបាត់ដំបង។
លោក ស៊ាន សូណាល់ នាយការិយាល័យប្រឆាំងគ្រឿងញៀនបានអោយដឹងថា បុរសសង្ស័យដែលឃាត់ខ្លួនមានឈ្មោះ ឯក វឿន អាយុ៤៥ឆ្នាំ រស់នៅក្រុមទី២៨ ភូមិទួលតាឯក សង្កាត់ទួលតាឯក ក្រុងបាត់ដំបង ។
សមត្ថកិច្ចដកហូតថ្នាំញៀនម៉ាទឹកកក ០១ កញ្ចប់ធំ ស្មើនិង ០៤ កញ្ចប់តូច ទូរស័ព្ទដៃម៉ាក ណូគាអិន ចុចពិល ០១ គ្រឿង ។
ជនសង្ស័យបានសារភាពថា ថ្នាំញៀននេះ ខ្លួនបានទិញពីឈ្មោះ ហោ ឧត្តម ភេទប្រុស អាយុជាង៣០ឆ្នាំ រស់នៅភូមិដង្កោទាប សង្កាត់ទួលតាឯក ដើម្បីយកទៅប្រើប្រាស់។
លោក ស៊ាន សូណាល់ បានបន្តថា លុះព្រឹកថ្ងៃទី២៦មិថុនា លោក យឹម វិចិត្រ អធិការក្រុងបាត់ដំបង បានឆ្លងយោបល់ពីលោក នួន សាន ព្រះរាជអាជ្ញាសាលាដំបូងខេត្ត ដើម្បីឈានទៅចាប់មេក្លោងឈ្មោះ ហោ ឧត្តម ដល់លំនៅដ្ឋាន ប៉ុន្តែជនសង្ស័យដឹងខ្លួនមុន គេចខ្លួនបាត់តែម្តង ។ ក្រោយឆែកឆេរផ្ទះ កម្លាំងរកឃើញថ្នាំញៀនប្រភេទម៉ាទឹកកកសថ្លា ចំនួន០១កញ្ចប់ធំ និង០៦កញ្ចប់តូច ទម្ងន់សរុប៦២៥ក្រាម ប្រាក់ខ្មែរចំនួន១០លានរៀល ទែម៉ូម៉ែត្រ០៤ ប្រដាប់កែច្នៃជក់ថ្នាំញៀន០១ កាំបិតតូចកៀរថ្នាំ០១ ដាវសាម៉ូរ៉ៃ០១ដើម រថយន្តតូយូតាហ៊ីលុច្សពណ៌ទឹកមាស០១គ្រឿង និងសម្ភារៈវេចខ្ចប់ប្រើប្រាស់មួយចំនួនធំទៀត ។
លោក ស៊ាន សូណាល់ នាយការិយាល័យប្រឆាំងគ្រឿងញៀនបានបញ្ជាក់ថា ជនសង្ស័យឈ្មោះ ឯក វឿន និងថ្នាំញៀនម៉ាទឹកកក ៦០០ ក្រាម កំពុងកសាងសំណុំរឿងបញ្ជូនទៅតុលាការ ចំណែកមេខ្លោងចែកចាយជួញដូរថ្នាំញៀនឈ្មោះ ហោ ឧត្តម សមត្ថកិច្ចកំពុងស្វែងរកចាប់ ដើម្បីយកមកផ្តន្ទាទោសតាមផ្លូវច្បាប់ ៕
សុខ កុសល
