ខេត្តប៉ៃលិន ៖ កម្លាំងនគរបាលការិយាល័យប្រឆាំងគ្រឿងញៀនខេត្តប៉ៃលិនរៀបចំកសាងសំណុំរឿងពីបទជួញដូរនូវសារធាតុញៀនខុសច្បាប់ លើជនសង្ស័យប្រុសស្រី២នាក់និងថ្នាំញៀនម៉ាទឹកកក៤កញ្ចប់និងប្រភេទយ៉ាម៉ា៣២គ្រាប់ រួមទាំងសម្ភារៈវេចខ្ចប់មួយចំនួនទៀត បញ្ជូនទៅកាន់សាលាដំបូង នាថ្ងៃទី២៣ ខែមិថុនា ឆ្នាំ២០១៥ ចាត់ការតាមនិតិវិធី ។
ការឃាត់ខ្លួនក្រុមជនសង្ស័យធ្វើឡើង កាលពីម៉ោង១០និង៣០នាទីព្រឹក ថ្ងៃទី២២ខែមិថុនាឆ្នាំ២០១៥ តាមផ្លូវមុខផ្ទះសំណាក់ត្បូងកណ្តៀង នៅភូមិអូរតាពុកក្រោម សង្កាត់ទួលល្វា ក្រុង-ខេត្តប៉ែលិន ។
លោក ឈុន ណាត នាយនគរបាលការិយាល័យប្រឆាំងគ្រឿងញៀនខេត្ត បានអោយដឹងថា កាលពីម៉ោង១០និង៣០នាទីព្រឹក ថ្ងៃទី២២ ខែមិថុនា ឆ្នាំ២០១៥ សមត្ថកិច្ចបានល្បាតហើយឃើញមុខសញ្ញាប្រើប្រាស់ថ្នាំញៀន ក៏ពួនស្ទាក់ចាប់ឃាត់ខ្លួនបានបុរសម្នាក់មានឈ្មោះ ស៊ុំ រ៉េន អាយុ ៣៨ ឆ្នាំ អ្នកប្រើប្រាស់ថ្នាំញៀន មានទីលំនៅភូមិអូរតាពុកក្រោម សង្កាត់ទួលល្វា ក្រុង-ខេត្តប៉ែលិន រឹបអូសបានថ្នាំញៀនប្រភេទយ៉ាម៉ា ១ គ្រាប់ពណ៌ក្បឿង (ពណ៌សូកូឡា) យកមកការិយាល័យធ្វើការសាកសួរ ។
បុរសសង្ស័យ ឈ្មោះ ស៊ុំ រ៉េន បានសារភាពថា ខ្លួនបានទិញថ្នាំញៀនពីស្ត្រីម្នាក់ឈ្មោះ វ៉ាន់ ស្រីនាង រស់នៅផ្ទះក្នុងភូមិជាមួយគ្នា ។
លោក ឈុន ណាត បានបន្តថា ក្រោយពីទទួលចម្លើយពីបុរសសង្ស័យឈ្មោះ ស៊ុំ រ៉េន រូបលោកបានសុំគោលការណ៍លោក ជា ចាន់ឌិន ស្នងការខេត្ត និងសុំគោលការណ៍លោកព្រះរាជអាជ្ញា ចុះឃាត់ខ្លួនស្ត្រីម្នាក់ឈ្មោះ វ៉ាន់ សម្រស់ ហៅ វ៉ាន់ ស្រីនាង អាយុ៤៧ឆ្នាំ ជាមេខ្លោងចែកចាយថ្នាំញៀនក្នុងភូមិ និងដកហូតបានថ្នាំញៀនប្រភេទម៉ាទឹកកក (ជាតិម្សៅ) ១ កញ្ចប់ធំ មានតម្លៃ៥០ម៉ឺនរៀល ៣កញ្ចប់តូចមានតម្លៃ ១៥ ម៉ឺនរៀល ថ្នាំញៀនប្រភេទយ៉ាម៉ា ១ កញ្ចប់ស្មើ ៣១ គ្រាប់កន្លះ និងសម្ភារៈវេចខ្ចប់មួយចំនួនទៀត ។
ស្ត្រីសង្ស័យឈ្មោះ វ៉ាន់ សម្រស់ ហៅ វ៉ាន់ ស្រីនាង បានសារភាពថា ខ្លួនទើបតែរកស៊ីជួញដូរគ្រឿងញៀន ក្នុងខែមិថុនា ឆ្នាំ២០១៥ នេះទេ ៕
ហែមវុទ្ធី
