ខេត្តរតនគិរី ៖ បុរសម្នាក់កើតភ្លើងប្រច័ន្ទកាប់ប្រពន្ធស្លាប់ក្នុងថ្លុកឈាមលើផ្ទះរួចរត់គេចខ្លួនបាត់នៅព្រឹកថ្ងៃទី២១.ខែមិថុនា.ឆ្នាំ២០១៥នៅចំណុច ភូមិ ទើន ឃុំទើន ស្រុកកូនមុំ ខេត្តរតនៈគិរី ។
ប្រភពពីអាវុធហត្ថស្រុកកូនមុំបានអោយដឹងថា បុរសជាជនសង្ស័យមានឈ្មោះ ដួង ផល អាយុ៣៩ឆ្នាំ ត្រូវជាប្តីជនរងគ្រោះ ក្រោយពីបានសម្លាប់ប្រពន្ធរួចក៏រត់គេចខ្លួនបាត់ស្រមោលតែម្តង ។ រីឯជនរងគ្រោះសម្លាប់ មានឈ្មោះ សុខ សុគន្ធ អាយុ ៤៤ ឆ្នាំ ត្រូវជាប្រពន្ធ រស់នៅភូមិឃុំកើតហេតុខាងលើ ។
សពមានស្នាមកាប់ដោយវត្ថុរឹងមុតដាច់ដៃឆ្វេងម្ខាង មុតបាក់ដៃស្តាំនិងកាប់ចំបំពង់ក បណ្តាលអោយដាច់បំពង់ខ្យល់ស្លាប់លើផ្ទះយ៉ាងអណោចអធម៌ ។
ប្រភពពីអ្នកជិតខាងនិងសាច់ញាតិសពបានអោយដឹងថា ជារឿយៗបុរសជាប្តី និងជាឃាតក តែងតែប្រច័ណ្ទប្រពន្ធ មុនពេលកើតហេតុគេបានឭសម្លេងឈ្លោះប្រកែកគ្នា ដោយបុរសជាប្តីប្រើសំដីធំខ្លាំងៗទៅលើប្រពន្ធ បន្ទាប់មកក៏ឭសម្លេងភីសភូសលាយឡំសម្លេងស្ត្រីរងគ្រោះស្រែកទ្រហោយំហៅគេជួយ ដោយឮសម្រែកហៅជួយអ្នកស្រុកក៏មកមើល ស្រាប់ឃើញតែសពជនរងគ្រោះ រីឯបុរសេជាប្តីមិនដឹងជាគេចខ្លួនទៅណាបាត់ទេ ។
បន្ទាប់ពីកម្លាំងអាវុធហត្ថបានចុះទៅពិនិត្យកន្លែងកើតហេតុ រួចប្រគល់សពជូនសាច់ញាតិយកធ្វើបុណ្យតាមប្រពៃណី ហើយកំណត់មុខសញ្ញាតាមចាប់ខ្លួនជនសង្ស័យយកមកផ្តន្ទាទោសតាមផ្លូវច្បាប់ ៕
សុវណ្ណារិទ្ធិ
