ព្រះវិហារ-ស្ទឹងត្រែង៖ តាមប្រភពព័ត៌មានថ្មីៗ បានឲ្យដឹងថា ឈ្មោះ ស្រេង ម៉េង មេការក្រុមហ៊ុនឧកញ៉ា ទ្រី ភាព ដែលបានប្រព្រិត្តបទល្មើសព្រៃឈើ ស្ទើររលាយហិនហោចនៅខេត្តព្រះវិហារ ជាច្រើនឆ្នាំមកហើយៗ ឥឡូវគាត់ (ស្រេង ម៉េង) ត្រូវបានឧកញ៉ា ទ្រី ភាព បញ្ជាឲ្យទៅឈរជើង ប្រមូលទិញឈើប្រណីត នៅខេត្តស្ទឹងត្រែង ជាមួយឈ្មោះ តាំង វីរ៉ា ដា មេការឧកញ៉ា ទ្រី ភាព ម្នាក់ទៀតប្រចាំខេត្តនោះ ពេលនេះគាត់ (ស្រេង ម៉េង) មានលុយយ៉ាងច្រើន ជិតឡើងជាឧកញ៉ា នឹងគេដែរហើយ…។
ប្រភពបានប្រាប់ថា ក្រៅពីមានឃ្លាំងស្តុកឈើ និងរោងសិប្បកម្ម ប្រមូលកែច្នៃឈើ យ៉ាងអនាធិបតេយ្យ នៅក្នុងខេត្តព្រះវិហារ លោកសក្ដិពីរយោធា *ស្រេង ម៉េង* ក៍មានឃ្លាំងស្តុក ឈើ គរដូចភ្នំមួយកន្លែងទៀត ស្ថិតនៅក្នុងភូមិតាឃែង ឃុំព្រែកមាស ស្រុកសៀមប៉ាង ខេត្ត ស្ទឹងត្រែង ក្បែរក្រុមហ៊ុនវាយថ្ម របស់ចិនផងដែរ ។ ឃ្លាំងនោះត្រូវប្រជាពលរដ្ឋ បាន រាយការណ៍មកថា ជាកន្លែងស្តុកឈើប្រណីត រាប់រយម៉ែត្រគូប ដែលពួកគេបានប្រមូលទិញ និង ដឹកជញ្ជូនយកមកពីតំបន់ផ្សេងៗ យ៉ាងគគ្រឹកគគ្រេង ដោយមិនមានសមត្ថកិច្ច ជំនាញថ្នាក់ណា ហ៊ានទៅបង្ក្រាបម្ដងណាឡើយ ។
សេចក្ដីរាយការណ៍ បានបញ្ជាក់ថា ពួកគាត់ជាប្រជាពលរដ្ឋ តែងបានសង្កេតឃើញ មានឡាន ប្រភេទជាប៉ាកុង (រថយន្តកែឆ្នៃ) និងគោយន្តកន្ត្រៃ រាប់សិបគ្រឿង បាននិងកំពុងតែ ធ្វើសកម្មភាព ដឹកជញ្ជូនឈើប្រណីតៗ ចេញពីក្នុងព្រៃ ស្ទើររៀងរាល់យប់ថ្ងៃ យកទៅលក់ឲ្យ លោកសក្ដិ២ ស្រេង ម៉េង ជាមេការក្រុមហ៊ុន ទ្រី ភាព យ៉ាង អនាធិបតេយ្យបំផុត ដូចជាដឹក ចេញពីតំបន់ សួនឧទ្យានជាតិ វីរៈជ័យ ជាប់ព្រំប្រទល់ ខេត្តរតនគិរី និងតំបន់ព្រៃសហគមន៍ ដែលការពារដោយអនុក្រឹត្យ ជាដើម ។
កាលពីខែមីនា ឆ្នាំ២០១៤ ថ្លែងនៅក្នុងពិធីសន្និបាត បូកសរុបការងារ របស់ក្រសួងកសិកម្ម រុក្ខាប្រមាញ់ និងនេសាទ សម្ដេចតេជោ នាយករដ្ឋមន្ត្រី ហ៊ុន សែន បានអំពាវនាវ សារជា ថ្មីទៀត ឲ្យស្ថាប័នពាក់ព័ន្ធ ត្រូវចាត់វិធានការ ឲ្យមានប្រសិទ្ធភាព ក្នុងការប្រឆាំងនឹង ការ កាប់បំផ្លាញព្រៃឈើនេះ ដោយសម្ដេចតេជោ បានមានប្រសាសន៍ថា ៖ /«ត្រូវបញ្ចប់ ដាច់ខាត ការកាប់រានហ៊ុមព័ទ្ធ ដុតរំលោភយកដីព្រៃឈើ…។ បើមិនដូច្នោះទេ ត្រូវទទួល ទោសតាមច្បាប់ ស្ដីពីព្រៃឈើ ។ ទន្ទឹមនឹងនេះ ត្រូវបន្តអនុវត្ត ឲ្យមានប្រសិទ្ធភាព នូវបទបញ្ជាដែល ខ្ញុំ បានដាក់នាពេលថ្មីៗនេះ អំពីការបង្ក្រាបបទល្មើស ព្រៃឈើគ្រប់ប្រភេទ» ។
ប្រជាពលរដ្ឋ រង់ចាំមើលថា តើបទបញ្ជាសារជាថ្មីទៀត របស់សម្ដេចតេជោ នាយករដ្ឋមន្ត្រី ហ៊ុន សែន ក្នុងការបង្ក្រាបបទល្មើស ព្រៃឈើគ្រប់ប្រភេទនេះ នឹងមានប្រសិទ្ធភាពដែរ ឬអត់ ចំពោះមេការទាំងអស់ របស់ក្រុមហ៊ុនបំផ្លាញឈើ ទ្រី ភាព តួយ៉ាងដូច លោកមេការ សក្ដិពីរយោធាឈ្មោះ ស្រេង ម៉េង នោះជាដើម…៕
