បាត់ដំបង ៖ បុរសម្នាក់ជិះម៉ូតូម៉ាកវីវ៉ាក្នុងល្បឿនលឿនជ្រែងវ៉ា ជ្រុលចង្កូតចូលរថយន្តមកពីមុខបញ្ច្រាស់ទិសគ្នាបុកស្លាប់នៅក្បែរស្ពានអូរសង្កែ កាលម៉ោង១៨និង៣០នាទីយប់ថ្ងៃទី១៣ ខែមិថុនា ឆ្នាំ២០១៥ លើកំណាត់ផ្ឡូវជាតិលេខ ៥ ភូមិប៉ោយសំរោង ឃុំតាពូង ស្រុកថ្មគោល ។
សមត្ថកិច្ចនគរបាលបានអោយដឹងថា បុរសរងគ្រោះស្លាប់ មិនស្គាល់សាវតា ជិះម៉ូតូម៉ាកវីវ៉ាពាក់ស្លាកលេខបន្ទាយមានជ័យ1E6085ធ្វើដំណើរពីជើងទៅត្បូង (បន្ទាយមានជ័យទៅបាត់ដំប) ។ ចំណែករថយន្តម៉ាកនីសាន់ដឹកបន្លែពាក់ស្លាកលេខបាត់ដំបង 2A2204 បើកបរដោយឈ្មោះ ឡាយ សុផល អាយុ៣២ឆ្នាំ រស់នៅភូមិឃុំខ្នាចរមាស ស្រុកបវេល ខេត្តបាត់ដំបង ។
ឈ្មោះ ឡាយ សុផល អ្នកបើកបររថយន្តនីសាន់បានអោយដឹងថា មុនពេលកើតហេតុបុរសម្នាក់ជិះម៉ូតូក្នុងល្បឿនលឿនវ៉ាម៉ូតូរថយន្តបើកស្របទិសគ្នា បន្ទាប់មកក៏រ៉េចង្កូតចូលមកខាងស្តាំបុករថយន្តនីសាន់ខ្លួនបើកពីបាត់ដំបងឆ្ពោះទៅស្រុកកំរៀង ។ ភ្លាមៗនោះ ខ្លួននិងប្រពន្ធបានចុះជួយរឹតទ្រូងនិងធ្វើចលនាជួយជនរងគ្រោះដែរ តែអកុសលជនរងគ្រោះបានដាច់ខ្យល់ស្លាប់ ពេលសមត្ថកិច្ចទៅដល់ក៏ឃាត់ខ្លួន២នាក់ប្តីប្រពន្ធ យកមកការិយាល័យចរាចរណ៍ផ្លូវគោកតែម្តង ។
សមត្ថកិច្ចនគរបាលបានបញ្ជាក់ថា សពជនរងគ្រោះបានយកទៅតម្កល់ទុកនៅវត្តប៉ោយសំរោងរងចាំសាច់ញាតិ មធ្យោបាយទាំង២គ្រឿងអូសមករក្សាទុកការិយាល័យចរាចរណ៍ផ្លូវគោក ។ ចំណែកអ្នកបើកបររថយន្តត្រូវកសាងសំណុំរឿងបញ្ជូនទៅតុលាកាចាត់ការតាមនិតិវិធី ៕
