ភ្នំពេញ ៖ សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានទទួលមរណភាពក្នុងជន្មាយុ៨៣ ឆ្នាំ ដោយរោគាពាធ កាលពីវេលាម៉ោង៣និង៤៥ នាទី ថ្ងៃទី០៨ ខែមិថុនា ឆ្នាំ២០១៥ នៅភូមិគ្រឹះលេខ១២ ផ្លូវលេខ៤៦២ សង្កាត់ទន្លេបាសាក់ រាជធានីភ្នំពេញ។
សេចក្តីជូនដំណឹង បានឲ្យដឹងថា គណបក្សប្រជាជនកម្ពុជាមានទុក្ខយ៉ាងក្រៀមក្រំ ដោយសម្តេចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃព្រះរាជាណាចក្រកម្ពុជា បានទទួលមរណភាពនៅវេលាម៉ោង៣ និង៤៥ នាទី ថ្ងៃទី០៨ ខែមិថុនា ឆ្នាំ២០១៥ ដោយរោគាពាធ បន្ទាប់ពីសម្តេច ជា ស៊ីម ធ្វើដំណើរ ទៅក្រៅប្រទេសដើម្បីព្យាបាល ជំងឺ ចាប់តាំងពីខែតុលា ឆ្នាំ ២០០០ កន្លងមក។
លោក ឈឹម ផលវរុណ មន្ត្រីអ្នកនាំពាក្យគណបក្សប្រជាជនកម្ពុជាបានថ្លែងប្រាប់ កាលពីរសៀលថ្ងៃទី០៨ ខែមិថុនា ថា “សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានទទួលមរណភាព កាលពីវេលាម៉ោង៣និង៤៥ នាទី ថ្ងៃទី០៨ ខែមិថុនា ឆ្នាំ២០១៥ នៅគេហដ្ឋានរបស់សម្តេច”។
ចំណែកសេចក្តីប្រកាសព័ត៌មានរបស់ ព្រឹទ្ធសភាចុះថ្ងៃទី០៨ ខែមិថុនា ឆ្នាំ២០១៥ បានឲ្យដឹងដែរថា ព្រឹទ្ធសភា រដ្ឋសភា រាជរដ្ឋាភិបាល និងគណបក្សប្រជាជនកម្ពុជា មានសេចក្តីសោកស្តាយ ក្តុកក្តួល ក្រៀមក្រំបំផុត និងសូមជម្រាបជូនគ្រប់ក្រសួងស្ថាប័ន អាជ្ញាធរគ្រប់លំដាប់ថ្នាក់ ព្រះសង្ឃ បងប្អូនជនរួមជាតិ និងអន្តរជាតិ មេត្តាជ្រាបថា សម្តេចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណៈអធិបតីកិត្តិយសក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជាបានទទួលមរណភាពហើយតាមពេលវេលា និងម៉ោងខាងលើ។ សពរបស់សម្តេចតម្កល់ធ្វើបុណ្យតាមប្រពៃណីជាតិ នៅភូមិគ្រឹះលេខ១២ ផ្លូវលេខ៤៦២ សង្កាត់ទន្លេបាសាក់ រាជធានីភ្នំពេញ។
ដោយឡែក ទាក់ទងនិងមរណភាពរបស់ សម្តេចអគ្គមហាធម្មពោធិសាល ជា ស៊ីម នេះដែរ ទំព័រហ្វេសប៊ុកផ្ទាល់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានសម្តែងការសោកស្តាយផងដែរ ចំពោះមរណភាពរបស់សម្តេច ជា ស៊ីម នេះ ដោយបានសរសេរថា “រាជរដ្ឋាភិបាល និងប្រជាពលរដ្ឋកម្ពុជា សោកស្តាយយ៉ាងខ្លាំងបំផុតចំពោះការបាត់បង់សម្តេច ជា ស៊ីម អតីតប្រធានព្រឹទ្ធសភាជាតិ និង ជាប្រធានគណបក្សប្រជាជនកម្ពុជា ដែលបានទទួលមរណភាពដោយជរាពាធនៅថ្ងៃនេះ។ កម្ពុជាចងចាំជានិច្ច ចំពោះការតស៊ូ និងពលីកម្មគ្រប់យ៉ាងដែលសម្តេចបានលះបង់ចំពោះជាតិ និងមាតុភូមិ ។ សូមវិញ្ញាណក្ខន្ធសម្តេចបានសោយសុខនៅថានសុគតិភពកុំបីខាន” ៕
