បាត់ដំបង ៖ ក្រុមហ៊ុនបារីMEVIUS និងបារីលុចសារីបានអោយនារីស្រស់ស្អាត ដើរលក់តាមហាងកាហ្វេផ្សាយពាណិជ្ជកម្ម ប្រកួតប្រជែងគ្នាដណ្តើមទីផ្សារ ហើយបារីទាំង២ប្រភេទនេះមានរង្វាន់ផងដែរ ខុសពីលក្ខខ័ណ្ឌរបស់ក្រសួងសុខាភិបាលហាមឃាត់ កាលពីថ្ងៃទី១៤ ខែកក្កដា ឆ្នាំ២០១៤ ។
តាមប្រភពអោយដឹងថា ក្រុមហ៊ុនបារី MEVIUS និងបារីលុចសារី បានដឹកនារីស្រស់ស្អាតរបស់ខ្លួន ៥ នាក់តាមរថយន្ត អោយចុះលក់តាមហាងកាហ្វេជាច្រើនកន្លែងនៅក្រុងបាត់ដំបង ដោយអះអាងថាបារីរបស់ខ្លួនឆ្ងាញ់ សូមអញ្ជើញសាកល្បងមានសន្លឹកឆ្នោត មានរង្វាន់ទៀតផង ហើយបារី MEVIUS បានដាក់អក្សរនៅលើកញ្ចប់ថា ជក់បារីបណ្តាលអោយកើតជំងឺហើមសួត ។ បារីទាំង២ប្រភេទនេះ បានដើរផ្សាយពាណិជ្ជកម្មក្នុងខេត្តបាត់ដំបង មិនភ័យខ្លាចឬញញើតការហាមប្រាមរបស់ក្រសួងសុខាភិបាលឡើយ។
តាមប្រភពតំណាងក្រុមហ៊ុនបារី MEVIUS បានអោយដឹងថា ពួកគាត់លក់បារីរបៀបនេះ មិនខុសអ្វីទេ គឺលក់តាមបញ្ជាថ្នាក់លើ ។
ចំណែកខាងក្រុមហ៊ុនបារីលុចសារីសាខាខេត្តបាត់ដំបងទូរស័ព្ទជាប់រវល់ជាច្រើនម៉ោង។
លោក ដួង ចន្ថា អនុប្រធានផ្នែកលើកកំពស់សុខភាព នៃមន្ទីរសុខាភិបាលខេត្តបាត់ដំបងបានអោយដឹងថា តាមកម្មវិធីប្រយុទ្ធប្រឆាំងគ្មានជាតិផ្សែងបារី ខាងមន្ទីរបានអប់រំណែនាំនៅតាមកន្លែងធ្វើការងាររបស់រដ្ឋឃើញថា អត្រាអ្នកជក់បារីបានថយចុះប្រហែល៩០ភាគរយ ។ នៅរាល់ថ្ងៃទី៣១ ខែឧសភា មានទិវាពិភពលោកគ្មានថ្នាំជក់ ចំណែកខេត្តបាត់ដំបងមិនបានធ្វើពីធីនេះអស់ពេល ៣ ឆ្នាំមកហើយ ដោយខ្វះថវិកា ។
ប៉ុន្តែដើម្បីជួយគិតគូរដល់សុខភាពប្រជាពលរដ្ឋទូទៅ ខាងមន្ទីរបានយកគោលការណ៍របស់ក្រសួងអប់រំណែនាំដល់អ្នកលក់បារីតាមតូប ឬក្រុមហ៊ុនបារី មិនអោយបង្ហាញរូបសញ្ញា ឬនិមិត្តសញ្ញាធំ ជាងទំហំក្រដាសA4ឡើយ ហើយគ្រប់ក្រុមហ៊ុនបារីទាំងអស់មិនអាចបង្កើត ឬតាំងឡូហ្គូល (សញ្ញាបារី) តាមបាណូបានឡើយ ប៉ុន្តែនៅតែស្លាកបាណូបារីលុចសារី ១ ប៉ុណ្ណោះ ដែលមិនទាន់បានរលុបទាំងស្រុង ។ នៅក្នុងទូរបារី មិនអាចអោយតាំងម៉ាកបារី តែ១ច្រើនកញ្ចប់បានទេ ឧទាហរណ៍បារីលុចសារីដាក់ ១ កញ្ចប់បារីហ្វីនដាក់ ១ កញ្ចប់មិណអាំចដាក់លើសពីនេះបានទេ ។ល។ ចំពោះបារី MEVIUS ដែលអោយនារីដើរលក់នោះ គឺខុសពីលក្ខខ័ណ្ឌក្រសួងសុខាភិបាល បញ្ហានេះរូបលោកនឹងរាយការណ៍ជូនថ្នាក់លើ ។
ចំពោះបញ្ហាទប់ស្កាត់បទល្មើសនេះ រូបលោកបានស្នើសុំគោលការពីលោកស្រី ស៊ឹម ម៉ារី អភិបាលរងខេត្តបង្កើតក្រុមចម្រុះ ដើម្បីឃាត់ក្រុមហ៊ុនល្មើសយកមកផ្តន្ទាទោសតាមផ្លូវច្បាប់ ៕
