បាត់ដំបង ៖ បុរសម្នាក់ជាមន្ត្រីយោធាផ្នែកទំនាក់ទំនងកម្ពុជាថៃ ជាប្រធានច្រកតំបន់ទើបឡើងថ្មី នៅស្រុកម៉ាឡៃ ខេត្តបន្ទាយមានជ័យ និង ២ នាក់ទៀត ត្រូវកម្លាំងនគរបាលមន្ទីរប្រឆាំង គ្រឿងញៀនឃាត់ខ្លួននិងថ្នាំញៀនម៉ាទឹកកកជិត១គីឡូក្រាម ពេលកំពុងបើករថយន្តក្នុងខេត្តបាត់ដំបង កាលវេលាម៉ោង៦រសៀល ថ្ងៃទី៦ ខែមិចុនា ឆ្នាំ២០១៥ ចំណុចគល់ស្ពានថ្មសខេង(ស្ពានដែកចាស់) ក្នុងភូមិរំចេក៤សង្កាត់រតនៈក្រុងបាត់ដំបង ។
តាមប្រភពពីមន្ត្រីនគរបាលជំនាញបានអោយដឹងថា ជនសង្ស័យទាំង ៣ នាក់សមត្ថកិច្ចតាមប្រម៉ាញអស់ពេល ៣ ខែកន្លងមក ហើយតែចាប់មិនបាន ដោយពួកជនសង្ស័យ ចេះវិធីបង្វែងដានលក់ចែកចាយថ្នាំញៀន តាំងពីនៅខេត្តបន្ទាយមានជ័យ រហូតមកដល់ខេត្តបាត់ដំបងទើបចាប់បាន ។
ជនសង្ស័យទាំង ៣ នាក់ដែលកម្លាំងនគរបាលមន្ទីរប្រឆាំងគ្រឿងញៀនឃាត់ខ្លួនបាន មានទី១ឈ្មោះ កែវ រតនា អាយុ៤១ឆ្នាំ ជាយោធា ប្រធានច្រកតំបន់ ទំនាក់ទំនងព្រំដែនកម្ពុជាថៃក្នុងស្រុកម៉ាឡៃ ខេត្តបន្ទាយមានជ័យ និងជាមេខ្លោងជួញដូរថ្នាំញៀន ។ ទី២ ឈ្មោះ សៀង សុខាអាយុ៤៥ឆ្នាំ របរជាងជួសជុលរថយន្ត ស្នាក់នៅក្រុមទី១៨ ផ្លូវលេខ៩១ សង្កាត់ស្រះចក ខ័ណ្ឌដូនពេញ រាជធានីភ្នំពេញ ។ ទី៣ ឈ្មោះ ឡាន់ ដារ៉ា អាយុ២៧ឆ្នាំ ស្នាក់នៅភូមិកោះសោភា ឃុំកោះសោភា ស្រុកសៀមបូក ខេត្តស្ទឹងត្រែង ។ វត្ថុតាងដកហូតបានមានបានថ្នាំញៀនម៉ាទឹកកក(ICE)ជិត១គីឡូក្រាម ស្មើទម្ងន់៩៩៨ក្រាម និងរថយន្ត១គ្រឿង ម៉ាកលុចស្ស៊ីសRX300ពណ៌ខ្មៅ ពាក់ស្លាកលេខខេមរភូមិន្ទ 2-7907 ជារបស់ឈ្មោះ កែវ រតនា ។
ជនសង្ស័យទាំង ៣ នាក់ និងវត្ថុតាងត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការ នាព្រឹកថ្ងៃទី៧ ខែមិថុនា ឆ្នាំ២០១៥ ចាត់ការតាមនិតិវិធី ៕
