បាត់ដំបង ៖ យុវជនម្នាក់បែកថ្នាំញៀនខឹងសុំលុយឪពុក (ពោះម៉ាយ) មិនបានលួចដុតផ្ទះខ្លួនឯងបណ្តាលអោយឆេះបំផ្លាញទ្រព្យអស់រលីង ក្រោយពីការជួយអន្តរាគមន៍បាញ់ទឹកពន្លត់ពីកម្លាំងជំនាញនិងប្រជាពលរដ្ឋ សមត្ថកិច្ចឃាត់ខ្លួនយុវជនសង្ស័យភ្លាមទៅកាន់អធិការដ្ឋាននគរបាលក្រុងបាត់ដំបង កាលពីម៉ោង២និង៣០នាទីយប់ ថ្ងៃទី២៦ ខែឧសភា ឆ្នាំ២០១៥ចំណុចភូមិចំការឬស្សី សង្កាត់ព្រែកព្រះស្តេច ក្រុងបាត់ដំបង ។
លោក គឹម ប៊ុនធឿន នាយការិយាល័យបង្ការ ពន្លត់អគ្គីភ័យ និងសង្គ្រោះបានអោយដឹងថា ផ្ទះដែលឆេះមានទំហំ៦គុណ ៧ ម៉ែត្រសង់ពីឈើប្រក់សង្ក័សី ផ្ទះផ្ទាល់ដី មានម្ចាស់ឈ្មោះ ជឹម សារ៉ាត់ អាយុ៥៣ឆ្នាំ ជាមន្ត្រីអនុរក្សពន្ធនាគារ ចំណែកយុវជនបង្កឈ្មោះ ច័ន្ទ រង្សី អាយុ១៩ឆ្នាំត្រូវជាកូនម្ចាស់ផ្ទះ ។ សម្ភារៈខូចខាតមានកង្ហា ២ គ្រឿង ទូរទស្សន៍ ១ គ្រឿង គ្រែ ២ គ្រឿង កៅអី ៣ គ្រឿង ម៉ូតូ ១គ្រឿង ខោអាវជាច្រើនកំប្លេរ និងចានឆ្នាំងដាំបាយមួយចំនួនទៀត ។
ឈ្មោះ ជឹម សារ៉ាត់ ម្ចាស់ផ្ទះបានប្រាប់សមត្ថកិច្ចថា តាំងពីប្រពន្ធស្លាប់បាត់មិនបានមើលកូនដិតដល់ ព្រោះខ្លួនជាមន្ត្រីរាជការទៅធ្វើការព្រឹកល្ងាច ទើបបណ្តោយអោយកូនប្រុសដើរផ្លូវខុស ចេះប្រើប្រាស់ថ្នាំញៀន ។ ពេលវាសុំប្រាក់មិនបាន វាតែងតែរករឿងរហូត ដល់យប់កើតហេតុ វាសុំប្រាក់មិនបានទៀត ទើបវាកំពុលមុខហ៊ានដុតផ្ទះខ្លួនឯងបែបនេះ ។
គួរបញ្ជាក់ថា សមត្ថកិច្ចបានប្រើរថយន្តដឹកទឹក ២ គ្រឿងជួយពន្លត់ មិនអោយឆេះរាលដាល ដល់ផ្ទះប្រជាពលរដ្ឋជិតខាង ៕
