ប៉ៃលិន ៖ លោក ហែម ឫទ្ធី អតីតជាក្រុមប្រឹក្សាក្រុងប៉ៃលិន ត្រូវបានប្រកាសតែងតាំងជានាយករដ្ឋបាលសាលាខេត្តប៉ៃលិន ក្រោមអធិបតីភាពលោក កើត សុធា គណៈអភិបាលខេត្តប៉ៃលិន កាលម៉ោង៣រសៀលថ្ងៃទី២១ខែឧសភា ឆ្នាំ២០១៥នៅសាលាខេត្តប៉ៃលិន។
វត្តមានអញ្ជើញចូលរួមជាភ្ញៀវកិត្តិយសមានលោក ឡី ចាន់ឆាយ ប្រធានក្រុមប្រឹក្សាខេត្តប៉ៃលិន លោកជំទាវ ជា លាភ អភិបាលរង លោក សៅ សារ៉ាត់ អភិបាលរងខេត្តប៉ៃលិននិងមន្ត្រីរាជការក្នុងខេត្តប៉ៃលិនជាច្រើនរូប។
លោក កើត សុធា អភិបាលខេត្តប៉ៃលិន បានមានប្រសាសន៍ថា ក្រសួងមហាផ្ទៃ បានសម្រេចប្រកាសតែងតាំងលោក ហែម ឫទ្ធី ជាប្រធាននាយករដ្ឋបាលសាលាខេត្តប៉ៃលិននេះ ដើម្បីដឹកនាំគ្រប់គ្រងការងាររដ្ឋបាលសាលាខេត្តប៉ៃលិន បន្ទាប់ពីលោកសៅ សារ៉ាត់ប្រធាននាយករដ្ឋបាលសាលាខេត្តចាស់ បានត្រូវដំឡើងតំណែងជាអភិបាលរងខេត្តប៉ៃលិន និងបន្ទាប់មកលោក មៀវ សាម៉ៃ ប្រធាននាយករដ្ឋបាលត្រូវបានប្រកាសអាយុចូលនិវត្តន៍កាលពីចុងឆ្នាំ២០១៤។
លោក កើត សុធា បានមានប្រសាសន៍សំណេះសំណាលផ្តែរផ្តាំដល់មន្ត្រីក្នុងខេត្តក្រុងស្រុកនិងផ្តាំផ្ញើរលោក ហែម ឫទ្ធី អោយខិត្តខំអនុវត្តន៍សហការពង្រឹងការងាររដ្ឋបាលផ្ទៃក្នុងខេត្តក្រុង ស្រុក ឃុំសង្កាត់ឲ្យកាន់តែប្រសើរឡើងថែមទៀត៕
ដោយ សុខ កុសល
