បាត់ដំបង ៖ ប្រជាពលរដ្ឋញាតិជិតខាង ដែលស្គាល់លោក ព្រហ្ម ចំរើន ជាម្ចាស់ផ្ទះលេខ៥៤ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង បានយល់ថា ការអនុវត្តសាលដីកាសំណំះរឿង ៧៩ ឈ នៃផ្ទះលេខ៥៤ អោយលោក ព្រហ្ម ចំរើន ចេញពីផ្ទះ ដោយអោយលោក ពៅ ស៊ុត ឈ្នះក្តី គឺមានភាពអយុត្តិធម៌ ទើបចេញមុខជួយគាំទ្រ និងសូមសម្តេច ហ៊ុន សែន ជួយអន្តរាគមន៍រកយុត្តិធម៌ដល់ក្រុមគ្រួសារនេះឡើងវិញផង កាលពីរសៀលថ្ងៃទី២០ ខែឧសភា ឆ្នាំ ២០១៥ ។
លោក ពៅ ស៊ុត អាយុ៧១ឆ្នាំ ភាគីដើមបណ្តឹង មានទីលំនៅភូមិអង់សង្កាត់អូរចារ ក្រុងបាត់ដំបង បានអោយដឹងថា ផ្ទះលេខ៥៤ ផ្នែកខាងមុខទំហំ ៤,៤០ ម គុណ១៦,៥០ ម ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង លោកបានរស់នៅតាំងពីឆ្នាំ ១៩៧៩ ដោយផ្ទះនេះ លោក កុយ ប៊ុនថា ប្រធានយោធាខេត្តជាអ្នកប្រគល់អោយខ្លួន ។ លុះឆ្នាំ១៩៨៦ឈ្មោះ ព្រហ្ម ចំរើន ជាមន្ត្រីយោធាបានខ្ចីរស់នៅរហូត ហើយឆ្នាំ១៩៩២ ខ្លួន(ពៅស៊ុត) ក៏បានដាក់បណ្តឹងទាមទាវិញ ។
លោក ព្រហ្ម ចំរើន អាយុ៦៤ឆ្នាំ ជាមន្ត្រីយោធាផ្នែកហិរញ្ញវត្ថុ កងពលលេខថ្មើរជើង៥៣ និងជាអ្នករស់នៅលើផ្ទះកើតហេតុ បានអោយដឹងថា រូបគាត់បានរស់នៅលើផ្ទះខាងលើតាំងពីឆ្នាំ១៩៨៣មក ពេលនោះ ផ្ទះថ្មក្នុងក្រុងបាត់ដំបងនរណាចូលរស់នៅក៏បាន ព្រោះផ្ទះទាំងនោះជាសម្បត្តិបេតិកភ័ណ្ឌជ័យជំនះថ្ងៃ ៧ មករា ឆ្នាំ១៩៧៩ ពីរបបប្រល័យពូជសាសន៍ ។លុះឆ្នាំ១៩៩២ឈ្មោះពៅស៊ុតបានដាក់បណ្តឹងទាមទារយកផ្ទះ ដោយមានឯកសារប្រធានយោធាខេត្តចេញអោយ (ក្នុងអង្គប្រជុំ) ទើបគេប្តឹងឈ្នះក្តីនេះ ។ ប៉ុន្តែក្រោយមកខ្លួន (ព្រហ្ម ចំរើន) រកឃើញឯកសាររបស់ឈ្មោះ ពៅ ស៊ុត ជាឯកសារក្លែងក្លាយ ដោយមានការដឹងឭពីលោកជារស់មេបញ្ជាការរងភូមិភាគទី៥និងលោក ម៉ន សាម៉ុន អតីតមេបញ្ជាការអាវុធហត្ថខេត្តសៀមរាបថា នៅក្នុងអង្គប្រជុំមិនបានលើកហេតុផល ឬចេញឯកសាររឿងផ្ទះឌុរដីអោយលោកពៅ ស៊ុត ឡើយ ក្រោយមកលោកបានដាក់បណ្តឹងជំទាស់រឿងឯកសារក្លែងក្លាយនេះ ប៉ុន្តែខាងតុលាការ មិនអនុវត្តចាប់ជនប្រព្រឹត្តខុសនិងក្លែងឯកសារនេះឡើយ ។
ប្រជាពលរដ្ឋក្នុងភូមិព្រែកមហាទេព ដោយឃើញភាពអយុត្តិធម៌បាននាំគ្នាមកគាំទ្រលោក ព្រហ្ម ចំរើន និងប្រាប់អ្នកមកចូលរួមអនុវត្តន៍ សាលដីកាទាំងឡាយថា ផ្ទះលេខ៥៤ភូមិព្រែកមហាទេព គឺឃើញក្រុមគ្រួសារលោក ព្រហ្ម ចំរើន រស់នៅជាង ៣០ ឆ្នាំកន្លងមកហើយតាំងពីមិនទាន់មានកូន រហូតដល់មានចៅ ចំណែកភាគីឈ្មោះ ពៅ ស៊ុត មិនដែលឃើញមករស់នៅក្នុងផ្ទះនេះ ឬក្នុងភូមិនេះឡើយ ។ ពាក្យដែលលោក ពៅ ស៊ុត ថាមករស់នៅតាំងពីឆ្នាំ១៩៧៩ ដល់ឆ្នាំ១៩៨៦ គឺជាពាក្យកុហក់ទេ ។
ប្រជាពលរដ្ឋក្នុងភូមិបានបញ្ជាក់ថា សម័យនេះ ការរស់នៅសក់អ្នកណាក្បាលអ្នកហ្មឹង តែដោយឃើញរឿងអយុត្តិធម៌របស់លោក ព្រហ្ម ចំរើន ចាញ់ក្តីដោយអយុត្តិធម៌ ទើបប្រជាជនក្នុងភូមិចំណាយពេលវេលា និងលះបង់កិត្តិយស ចូលរួមប្រឆាំងការអនុវត្តសាលដីកានិងសូមសម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រីជួយរកយុត្តិធម៌ដល់ក្រុមគ្រួសារលោក ព្រហ្ម ចំរើន អោយបានរស់នៅលើផ្ទះលេខ ៥៤ ភូមិព្រែកមហាទេពសង្កាត់ស្វាយប៉ោក្រុងបាត់ដំបងនេះតទៅទៀត ៕
