ស្វាយរៀង ៖ បន្ទាប់ពីទទួលព័ត៌មានរវាងឡានក្រុង ដឹកអ្នកដំណើរពីវៀតណាម បើកមកភ្នំពេញ បុកជាមួយរថយន្តទួរីស ដឹកកម្មកររោងចក្រ បណ្ដាលឲ្យស្លាប់ ២០នាក់និងរបួស១៧នាក់ កាលព្រឹកព្រលឹមថ្ងៃទី១៩ ខែឧសភា ឆ្នាំ២០១៥លើផ្លូវជាតិលេខ១ នៅក្នុងភូមិដើមពោធិ៍ ឃុំស្វាយតាយាន ស្រុកកំពង់រោទ៍ ខេត្តស្វាយរៀង ។ សម្តេចហ៊ុនសែននាយករដ្ឋមន្ត្រី បានថ្លែងសារចូលរួមរំលែកទុក្ខនិងថ្នាក់ដឹកនាំកំពូលៗផ្តល់ថវិការដល់ក្រុមគ្រួសារអ្នកស្លាប់ និងអ្នករបួសក្នុងគ្រោះថ្នាក់ចរាចរណ៍ផងដែរ។
របាយការណ៍ដដែល បានបង្ហាញថា មូលហេតុដែលបណ្តាលឲ្យកើតមានគ្រោះថ្នាក់ដ៏រន្ធត់នោះ មកពីឡានក្រុង ដឹកអ្នកដំណើរពីប្រទេសវៀតណាម ក្នុងទិសដៅចូលមកភ្នំពេញ បានបើកក្នុងល្បឿនលឿន ហើយវ៉ាជែង រថយន្តជាច្រើនទៀត បណ្តាលឲ្យបុកឡានដឹកកម្មកររោងចក្រ ដែលបើកបញ្ច្រាសទិសគ្នា។ កម្មកររងគ្រោះទាំងនោះ ធ្វើការនៅតំបន់សេដ្ឋកិច្ចពិសេស មេនហាតធេន ក្នុងក្រុងបាវិត ជាប់ព្រំដែនវៀតណាម។ ក្រោយកើតហេតុភ្លាមៗ តៃកុងឡានក្រុងដឹកអ្នកដំណើរវៀតណាម-ភ្នំពេញ ត្រូវបានឃាត់ខ្លួន។
សាក្សីបានឲ្យដឹងថា ឡានក្រុងដឹកអ្នកដំណើរភ្នំពេញ-វៀតណាម បានវ៉ាជែងជាមួយឡានម៉ូតូជាច្រើនគ្រឿងក្នុងល្បឿនលឿន ហើយឆ្លងគំនូសចូលផ្លូវម្ខាងទៀត បុកជាមួយនឹងឡានទួរីស ដឹកកម្មករ តែម្តង បណ្តាលអោយរថយន្តទួរីសក្រឡាប់ខូចនខ្ទេចខ្ទីនិងបង្កឲ្យស្លាប់ និងរបួសអ្នកជិះសរុប ៣៧ នាក់។
បន្ទាប់ពីទទួលព័ត៌មានគ្រោះថ្នាក់ចរាចរណ៍ដ៏រន្ធត់នេះ សម្តេចនាយករដ្ឋមន្ត្រី ហ៊ុនសែន បានថ្លែងសារផ្ទាល់មាត់ចូលរួមរំលែកទុក្ខរួចមក ថ្នាក់ដឹកនាំកំពូលៗ បានផ្តល់អំណោយដល់ក្រុមគ្រួសារអ្នកស្លាប់ និងអ្នករបួសក្នុងគ្រោះថ្នាក់នោះ ៕
