បាត់ដំបង ៖ អាវុធហត្ថស្រុកបវេល និងខេត្តឃាត់ខ្លួនបុរស ៤ នាក់ បានបន្តបន្ទាប់និងដកហូតថ្នាំញៀនម៉ាទឹកកក ២៣ កញ្ចប់ ស្មើទម្ងន់២៤,១២ក្រាម ចាប់ពីថ្ងៃទី១៤ ដល់ថ្ងៃទី១៥ ខែឧសភា ឆ្នាំ២០១៥ ។
ករណីទី ១ អាវុធហត្ថស្រុកឃាត់ខ្លួនបុរសម្នាក់ ជនជាតិវៀតណាមដកហូតបានថ្នាំញៀនម៉ាទឹកកកចំនួន ១០ កញ្ចប់មានទម្ងន់ស្មើរ ១,៦២ ក្រាម កាលពីម៉ោង៨និង១៥នាទីព្រឹកថ្ងៃ១៤ ខែឧសភា ឆ្នាំ២០១៥ នៅចំណុចភូមិទំនប់ទឹក ឃុំបវេល ស្រុកបវេល ខេត្តបាត់ដំបង និងបញ្ជូនមកទីបញ្ជាការអាវុធហត្ថខេត្តបាត់ដំបង ។
ករណីទី២ អាវុធហត្ថខេត្តឃាត់ខ្លួនបុរស ៣ នាក់ជនខ្មែរដកហូតបានថ្នាំញៀនម៉ាទឹកកកចំនួន ១៣ កញ្ចប់មានទម្ងន់ស្មើ ២២,៥០ ក្រាម កាលរសៀលថ្ងៃទី១៥ ខែឧសភា ឆ្នាំ២០១៥ នៅភូមិទួលតាឯកសង្កាត់ទួលតាឯក ក្រុងបាត់ដំបង និងនៅភូមិវត្តរំដួល សង្កាត់ស្លាកែត ក្រុងបាត់ដំបង ។
មន្ត្រីអាវុធហត្ថការិយាល័យប្រឆាំងបទល្មើសគ្រឿងញៀនបានអោយដឹងថា បុរសដែល ឃាត់ខ្លួនទី១ ឈ្មោះ សុខ ឡាញ់ ហៅ ប៊ែរ អាយុ៣៥ឆ្នាំ ជនជាតិវៀតណាមដកហូតបានថ្នាំញៀនម៉ាទឹកកកចំនួន១០កញ្ចប់ មានទម្ងន់ស្មើរ១,៦២ក្រាម ។ ជនសង្ស័យបានសារភាពថាខ្លួនបានចំណាយប្រាក់៤០ម៉ឺនរៀល ទិញថ្នាំញៀនពីឈ្មោះ នេត ណុយ ភេទប្រុសអាយុ ៣៧ឆ្នាំជនជាតិខ្មែរ នៅក្រុងបាត់ដំបង ។ ទី២ ឈ្មោះ នេត ណុយ ភេទប្រុសអាយុ ៣៧ ឆ្នាំមានទីលំនៅភូមិវត្តរំដួល សង្កាត់ស្លាកែត ក្រុងបាត់ដំបង ឃាត់ខ្លួននៅផ្ទះជួល កាលរសៀលថ្ងៃទី ១៥ ខែឧសភា ឆ្នាំ២០១៥ នៅភូមិសង្កាត់ទួលតាឯក ក្រុងបាត់ដំបង ។ ទី៣ ឈ្មោះ ហេង បណ្ឌិត អាយុ២០ឆ្នាំ ជនជាតិខ្មែរ មានទីលំនៅភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបងនិងទី៤ ឈ្មោះ ដា ចន្ថា អាយុ២៥ឆ្នាំ ជនជាតិខ្មែររស់នៅភូមិទួលតាឯក សង្កាត់ទួលតាឯកក្រុងបាត់ដំបង ទី៣ និងទី៤ឃាត់ខ្លួននៅផ្ទះឈ្មោះ នេត ណុយ សមត្ថកិច្ចដកហូតបាន ថ្នាំញៀនម៉ាទឹកកកបន្ថែម ១៣ កញ្ចប់ ស្មើទម្ងន់ ២២,៥០ ក្រាម សម្ភារៈវេចខ្ចប់មួយចំនួន ជញ្ជីងថ្លឹង ១ និងទូរស័ព្ទដៃចំនួន ៥ គ្រឿង ។ ដូច្នេះថ្នាំញៀនម៉ាទឹកកកសរុប មុនក្រោយ មានចំនួន២៣កញ្ចប់ មានទម្ងន់ស្មើ ២៤,១២ ក្រាម ។
បុរស ៤ នាក់និងថ្នាំញៀនម៉ាទឹកកក ២៣ កញ្ចប់ មានទម្ងន់ស្មើ ២៤,១២ ក្រាម ត្រូវកម្លាំងអាវុធហត្ថការិយាល័យប្រឆាំងបទល្មើសគ្រឿងញៀនកសាងសំណុំរឿង ពីបទជួញដូរខុសច្បាប់នូវសារធាតុញៀនបញ្ជូនទៅតុលាការ នារសៀលថ្ងៃទី១៦ ខែឧសភា ឆ្នាំ២០១៥ ចាត់ការតាមនិតិវិធី ៕
សុខ កុសល់
