ខេត្តពោធិ៍សាត់ៈ ហេតុការណ៍គ្រោះថ្នាក់ចរាចរណ៏ បានកើតឡើង នៅម៉ោងជាង ៥ ល្ងាច ថ្ងៃទី១១ ខែកក្កដា ឆ្នាំ២០១៤ លើផ្លូវជាតិលេខ៥ ចន្លោះគីឡូម៉ែត្រលេខ ១៤០-១៤១ ស្ថិតក្នុងភូមិខ្សាច់ល្អិត ឃុំអន្សាចំបក់ ស្រុកក្រគរមានមនុស្សចំនួន ៧ នាក់ បានស្លាប់ភ្លាមៗ នៅនឹងកន្លែង និងម្នាក់ទៀត បានស្លាប់ពេលបញ្ជូនដល់មន្ទីរពេទ្យ ដោយសារតែរថយន្តកុងតឺន័រ បែកកង់ រេចង្កូត ទៅបុករថយន្តហាយឡែនឌ័រ ដែលបើកបញ្ច្រាសទិសគ្នា ។
សាក្សីប៉ូលិសបានឱ្យដឹងថាករណី គ្រោះថ្នាក់ចរាចរណ៏នេះ មានអ្នកស្លាប់៧នាក់ និងម្នាក់ស្លាប់នៅមន្ទីរពេទ្យ ទី១-ឈ្មោះ ឡេង សំណាង អាយុ២២ឆ្នាំ ទី២-ឈ្មោះ ឡង់ សេងហុង អាយុ៣៦ឆ្នាំ ទី៣-ឈ្មោះ អាំង ភេទស្រី អាយុ៦០ឆ្នាំ ទី៤-ឈ្មោះ លាង ហួយ ភេទស្រី អាយុ១៩ឆ្នាំ ទី៥-ឈ្មោះ ឡេង ភាព អាយុ ៣៦ឆ្នាំ (អ្នកបើកបរ) ។ អ្នកទាំង៥ នាក់ រស់នៅ ភូមិអន្លង់សាម ឃុំព្រែកស្តី ស្រុកកោះធំ ខេត្តកណ្តាល។ ទី៦-ឈ្មោះ ឡេង សុភា អាយុ២៥ឆ្នាំ ទី៧-ឈ្មោះ វ៉ាន់ សេង ហុង អាយុ១៩ឆ្នាំ អ្នកទាំង២ រស់នៅភូមិបាលិលេយ្យ សង្កាត់-ក្រុង ប៉ោយប៉ែត ខេត្តបន្ទាយមានជ័យ និងទី៨- ដែលស្លាប់នៅក្នុងមន្ទីរពេទ្យឈ្មោះ ហាក់ សៀកមួយ ភេទប្រុស អាយុ១០ឆ្នាំ ជាសាច់ញាតិរបស់អ្នកទាំង៥ខាងលើ។
មុនពេលកើតហេតុ គេបានឃើញ រថយន្តកុងតឺន័រ ១គ្រឿង ពាក់ស្លាកលេខភ្នំពេញ 3A-4660 ធ្វើដំណើរពីលិចទៅកើត យ៉ាងលឿន។ លុះមកដល់កន្លែងកើតហេតុ រថយន្តកុងតឺន័រ បានបែកកង់ និងរេចង្កូតទៅបុក រថយន្តហាយឡែនឌ័រ ពណ៌ទឹកប្រាក់ ពាក់ស្លាកលេខ បណ្តោះអាសន្ន 5NW 2A 221 (សង្ស័យលេខជាប់ មកពីស្រុកក្រៅ) បើកក្នុងទិសដៅ បញ្ច្រាសទិសគ្នា ពេញទំហឹង បណ្តាលឱ្យមានអ្នកស្លាប់ ភ្លាមៗនៅនឹងកន្លែង ៧ នាក់ និងក្មេងប្រុស អាយុ១០ឆ្នាំម្នាក់ បានរង របួសធ្ងន់ បានស្លាប់ បន្ទាប់ពីបានត្រូវបញ្ជូន ទៅដល់មន្ទីរពេទ្យ ។
ក្រោយពីបង្កហេតុរួច អ្នកបើកបររថយន្តបង្ក និងបក្ខពួក ៤ នាក់ រងរបួសស្រាល បាននាំគ្នារត់គេចខ្លួន ដោយសុវត្តិភាព។
សព ត្រូវបានសមត្ថកិច្ច ទាក់ទងទៅក្រុមគ្រួសារ ហើយក្រុមគ្រួសារ បានមកទទួលយក និងដឹកបញ្ជូនពីកន្លែងកើតហេតុ មកកាន់លំនៅដ្ឋាន ដើម្បីធ្វើបុណ្យ។ រីឯរថយន្តទាំង២គ្រឿង ត្រូវបានសមត្ថកិច្ច ស្ទូចយកទៅរក្សាទុក ដើម្បីចាត់ការតាមច្បាប់។ ករណីគ្រោះថ្នាក់នេះ គឺកើតឡើងក្នុង ទិសដៅបញ្ច្រាសទិសគ្នា ខណៈរថយន្តជនរងគ្រោះធ្វើដំណើរពីកើតមកលិច ក្នុងគោលបំណងឆ្លងកាត់ ខេត្តពោធិ៍សាត់ ដើម្បីទៅកាន់ខេត្តបន្ទាយមានជ័យ ហើយពេលដល់ ចំណុចកើតហេតុ រថយន្តកុងតឺន័រ បែកកង់រួច ក៏រេចង្កូតទៅបុករថយន្តជនរងគ្រោះ ពេញទំហឹង បណ្តាលឱ្យរថយន្តជនរងគ្រោះ កំពិត រួញ ខូចខាតស្ទើរទាំងស្រុង ៕
