បាត់ដំបង ៖ ផ្ទុះស្សេខ្សែភ្លើងបណ្តាលអោយឆេះផ្ទះល្វែងមួយខ្នង ពេលម្ចាស់មិននៅទៅពីធីការនៅក្បែរផ្ទះ ប៉ុន្តែត្រូវកម្លាំងសមត្ថកិច្ចជួយពន្លត់ទាន់ពេលវេលាមិនអោយឆេះរាលដាលដល់ផ្ទះជិតខាង កាលពីម៉ោង៩ព្រឹកថ្ងៃទី២៦ខែមេសាឆ្នាំ២០១៥នៅផ្ទះលេខ៣១ក្រុមទី០៣ភូមិ១៣មករាសង្កាត់ព្រែកព្រះស្តេចក្រុងបាត់ដំបង។
ប្រភពសមត្ថកិច្ចបានអោយដឹងថា ផ្ទះដែលឆេះមានទំហំ៤គុណ២៤ម៉ែត្រផ្ទះល្វែងសង់ពីឈើប្រក់សង្ក័សី មានការខូចខាតតិចតួចដូចជាតុកៅអីនិងសម្លៀកបំពាក់មួយចំនួនតូច មានម្ចាស់ឈ្មោះ ភាគ ផល្លា ភេទប្រុសអាយុ៥៨ឆ្នាំ ។
ម្ចាស់ផ្ទះឈ្មោះ ភាគ ផល្លា បានអោយដឹងថា នៅព្រឹកកើតហេតុប្រពន្ធទៅផ្សារហើយខ្លួនទៅការគេជិតផ្ទះបានបិតទ្វាបន្ទប់និងទ្វាផ្ទះចោលដោយមិនបានបិតគប់ភ្លើងទេ ក្រោយមកក៏មានគេទៅតាមដល់រោងការថា មានភ្លើងឆេះចេញពីបន្ទប់ដេកខ្លួនក៏ត្រឡប់មកផ្ទះបើកទ្វាអោយអ្នកជិតខាងនិងសមត្ថកិច្ចជួយពន្លត់ទាន់ពេលវេលា។
លោក គឹម ប៊ុនធឿន នាយការិយាល័យបង្ការពន្លត់អគ្គីភ័យនិងសង្គ្រោះបានអោយដឹងថា បន្ទាប់ពីទទួលពត៌មានមានអគ្គីភ័យឆាបឆេះ រូបលោកបានដឹកនាំកម្លាំងនិងរថយន្តដឹកទឹកចំនួន២គ្រឿងចុះជួយពន្លត់មិនអោយឆេះរាលដាលដល់ផ្ទះអ្នកជិតខាងបានទាន់ពេលវេលា ហេតុការណ៍ឆេះនេះបង្កឡើងដោយផ្ទុះស្សេខ្សែភ្លើង ៕
