បាត់ដំបង ៖ លោក ឌី ពៅ អភិបាលរងក្រុងបាត់ដំបង រងការចោទប្រកាន់ឃុបឃិតនិងម្ចាស់ផ្ទះ ៤០៣ E1E2 ក្រុមទី១១ ភូមិកម្មករសង្កាត់ស្វាយប៉ោ ក្រុងបាត់ដំបង បើកដៃអោយសង់លំនៅដ្ឋានជាន់លើបំពានកិច្ចព្រមព្រៀង អ្នករស់នៅផ្ទះជាន់ក្រោម ៤០៣ E0 ដែលមានជញ្ជាំងពិដានប្រេះស្រាំ តាំងពីថ្ងៃ១៣ ខែតុលា ឆ្នាំ២០១៤ ដល់ថ្ងៃទី២៥ ខែមេសា ឆ្នាំ២០១៥ ។
លោក ឆៃ ឆិល ម្ចាស់ផ្ទះ៤០៣E0 បានអោយដឹងថា ឈ្មោះ សំ កុម្ភៈរ័ត្ន ភេទស្រី បានមកទិញផ្ទះ៤០៣E1E2 ហើយសុំជួសជុលតិចតួច កាលពីថ្ងៃ១៣ ខែតុលា ឆ្នាំ២០១៤ ខ្លួនអនុញ្ញាតិឲ្យជួសជុល ប៉ុន្តែការជួសជុលខុសប្រក្រតី ទើបខ្ញុំប្តឹងទៅជំនាញ ។
នៅថ្ងៃទី១៤ ខែវិច្ឆិកា ឆ្នាំ២០១៤ មន្ត្រីជំនាញចុះអង្កេត មានទី១លោក ស៊ឹម វុត្ថា ប្រធានការិយាល័យសំណង់ នៃមន្ទីររៀបចំដែនដី នគរូបនីយកម្ម សំណង់ សុរិយោដីខេត្ត ។ ទី២លោក ប៉ូ យី អនុប្រធានការិយាល័យសំណង់ នៃមន្ទីររៀបចំដែនដី នគរូបនីយកម្មសំណង់ សុរិយោដីក្រុង ។ ទី៣ លោក តូច ភី មន្ត្រីការិយាល័យសំណង់ នៃមន្ទីររៀបចំដែនដីនគរូបនីយកម្មសំណង់ សុរិយោដីក្រុង ពិនិត្យឃើញថា សំណង់ដែលឈ្មោះ សំ កុម្ភៈរ័ត្ន កំពុងស្នើសុំជួសជុលបានសាងសង់តាំងពីទស្សវត្សឆ្នាំ១៩៧០ ហើយផ្នែកខ្លះ នៃអាគារមានសភាពប្រេះស្រាំជាអន្លើរៗ ដូច្នេះសូមផ្តល់យោបល់ដល់ម្ចាស់ផ្ទះដូចខាងក្រោម ៖ គួរប្រក់ដំបូលស៊ីប្រូ ធ្វើអំពីឆ្អឹងដែក ឬឈើ ជញ្ជាំងធ្វើពីស៊ីប្រូប្រូលាត ឬប្រភេទជញ្ជាំងឥដ្ឋស្រាល ហាមរៀបឥដ្ឋធ្វើបន្ទប់ ក្រាលការ៉ូ ប្រភេទស្រាលបំផុត មិនត្រូវប្រើអាងទឹក ឬសម្ភារៈធ្ងន់លើអាគារនេះ ជាដាច់ខាតដើម្បីសុវត្ថិភាពអាគារ ។
លោក ឆៃ ឆិល បានបញ្ជាក់ថា ទោះជាមានកិច្ចព្រមព្រៀងខាងលើនេះ ម្ចាស់ផ្ទះឈ្មោះសំ កុម្ភៈរ័ត្ន បានសាងសង់បំពានធ្វើបន្ទប់ទឹក និងរៀបឥដ្ឋបន្ថែម ពេលប្តឹងទៅលោក ឌី ពៅអភិបាលរងក្រុង គ្មានចំណាត់ការហើយប្តឹងទៅលោក សៀង ឯមវូនស្ហី អភិបាលក្រុងថា និងរុះរើសំណង់នេះចេញ តែរហូតពេលនេះមិនមានចំណាត់ការណាមួយអោយទុកចិត្ត ។ រូបខ្ញុំគ្រាន់តែចង់អោយមានការធានា ពេលមានការបាក់ស្រុតបង្កការគ្រោះថ្នាក់ដល់អាយុជីវិតអ្នករស់នៅខាងក្រោមមិនមានការជំទាស់អ្នកសាងសង់ឡើយ ។
លោក ឌី ពៅ អភិបាលរងក្រុងបាត់ដំបង ដែលជាអ្នកកាន់សំណុំរឿងនេះបានបកស្រាយកាលរសៀលថ្ងៃទី២៤ ខែមេសា ឆ្នាំ២០១៥ ថា ចំពោះឈ្មោះ សំ កុម្ភៈរ័ត្ន រូបលោកបានអោយផ្អាកការសាងសង់ជាច្រើនដង តែគាត់មិនឈប់ រហូតដាក់កម្លាំងចាប់ជាងសាងសង់ទៀត តែគាត់នៅតែសាងសង់បន្ត ។ ចំពោះសំណុំរឿងទាំងនេះ លោកបានបញ្ជូនទៅសាលាខេត្តហើយមិនដឹងថ្នាក់លើគាត់ចាត់ការបែបណានោះទេ? ។
ពាក់ព័ន្ធករណីនេះ លោក ងួន រតនៈ អភិបាលរងខេត្តបានអោយដឹង កាលពីព្រឹកថ្ងៃទី២៥ ខែមេសា ឆ្នាំ២០១៥ ថា ចំពោះរឿងសាងសង់ផ្ទះ មានទំនាស់៤០៣E0និងE1E2ក្រុមទី១១ភូមិកម្មករសង្កាត់ស្វាយប៉ោ ក្រុងបាត់ដំបង រូបលោកមិនបានដឹងទេ ហើយក៏មិនទាន់ឃើញមានឯកសារបញ្ជូនមកដែរ ដូច្នេះចាំរូបលោកស្រាវជ្រាវនៅថ្ងៃច័ន្ទ ទី២៧ បន្តទៀត ៕
