បាត់ដំបង ៖ អាវុធហត្ថខេត្តស្រាវជ្រាវឃាត់ខ្លួនយុវជនទំនើង ២ ក្រុម បានមនុស្ស ៤ នាក់ដេញកាប់គ្នារត់ប្រសេកប្រសាច តាមផ្លូវក្នុងក្រុងបាត់ដំបង កាលពីម៉ោង២២និង៤៥នាទី ថ្ងៃទី២១ ខែមេសា ឆ្នាំ២០១៥ ត្រង់ចំណុចមុខធនាគារភ្នំពេញ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។
លោក ឡាច ប្រុស នាយការិយាល័យស្រាវជ្រាវប្រឆាំងបទល្មើស អាវុធហត្ថខេត្តបានអោយដឹងថា ក្រុមយុវជនសង្ស័យដែលឃាត់ខ្លួនមានក្រុមទី១ មានទី១ ឈ្មោះ ម៉េត ចំរើន ហៅគាន់អាយុ១៨ឆ្នាំ រស់នៅភូមិចំការសំរោង សង្កាត់ចំការសំរោង ក្រុងបាត់ដំបង ។ ទី២ ឈ្មោះទេព សុផានិត អាយុ១៦ឆ្នាំ របរសន្តិសុខ រស់នៅភូមិស្វាយជ្រុំឃុំព្រែកនរិន្ទ ស្រុកឯកភ្នំ ខេត្តបាត់ដំបង ។ ក្រុមទី២ មានទី១ ឈ្មោះ គឹម ឡុង ហៅ ពូយ អាយុ ២២ ឆ្នាំ របរកម្មករ រស់នៅភូមិទួល្វៀង ឃុំអូរដំបង ២ ស្រុកសង្កែ ខេត្តបាត់ដំបង ។ ទី២ ឈ្មោះ ឡឹក ហ្វីហុង អាយុ ២០ ឆ្នាំ រស់នៅភូមិកាប់គោថ្មី សង្កាត់អូរចារ ក្រុងបាត់ដំបង ។ ដកហូតបាន កាំបិតប័ងតោវែង ចំនួន១ ។
មុនពេលកើតហេតុ ឈ្មោះ ម៉េត ចំរើន ហៅ គាន់ ឈ្មោះ ទេព សុផានិត ឈ្មោះ ចន និងបក្ខពួកបានជិះម៉ូតូទៅឈប់មុខវត្តកណ្តាល ភូមិរំចេក ៤ សង្កាត់រតនៈ ទៅវាយឈ្មោះ កាម៉ា និងឈ្មោះ គឹម ឡុង ហៅ ពូយ នឹងដំបងចំស្មារស្តាំ រួចឈ្មោះ ម៉េត ចំរើន ហៅ គាន់ ជិះម៉ូតូទៅបាត់ដោយទំលាក់ឈ្មោះ ទេព សុផានិត នៅមុខធនាគារធនាគារភ្នំពេញ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។ ឈ្មោះ គឹម ឡុង ហៅ ពូយ បានសួរទៅកាន់ក្រុមបក្ខពួកឈ្មោះ ម៉េត ចំរើន ហៅ គាន់ តើហេតុអ្វីបាននាំគ្នាមកវាយខ្លួន ពួកគេមិនឆ្លើយខ្លួនបានទៅក្លឹបស្តាឡាយ ។ លុះម៉ោង២០និង៥០នាទី ឈ្មោះ គឹម ឡុង ហៅ ពូយ និងឈ្មោះ កាម៉ា បានបបួលឈ្មោះ ឡឹក ហ្វីហុង និងបក្ខពួកប្រហែល៧នាក់ ម៉ូតូ៣គ្រឿង ទៅផ្ទះឈ្មោះម៉េតចំរើន ហៅគាន់ ។ ពេលនោះ ឈ្មោះ ម៉េត ចំរើន ហៅ គាន់ បានកាន់កាំបិតយាដេញ កាប់តែត្រូវឈ្មោះ គឹម ឡុង ហៅពូយកាន់ដំបងទប់ទល់ និងឈ្មោះ ឡឹក ហ្វីហុង ទាញដុំថ្មគប់វិញប៉ុន្តែធ្វើអ្វីមិនឈ្នះ ឈ្មោះ ម៉េត ចំរើន ហៅ គាន់ ក៏ត្រឡប់មកក្លឹបស្តាឡាយវិញ ។ លុះម៉ោង២២និង៤៥នាទី ឈ្មោះ គឹម ឡុង ហៅ ពូយ នាំគ្នា៦នាក់ ម៉ូតូ ២ គ្រឿង ជីះម៉ូតូទៅដល់មុខធនាគារភ្នំពេញ ហើយឃើញឈ្មោះ ទេព សុផានិត កំពុងអង្គុយយាម ក៏បានទាញកាំបិតដេញកាប់ចាំកែងជើងតែមិនមុត គ្រានោះឈ្មោះ ទេព សុផានិត បានរត់បន្តទៅមុខជួបនិងមន្ត្រីអាវុធហត្ថប្រចាំការក្បែរនោះអោយជួយ ។
លោក ឡាច ប្រុស នាយការិយាល័យស្រាវជ្រាវប្រឆាំងបទល្មើសអាវុធហត្ថខេត្តបានបញ្ជាក់ថា ក្រុមយុវជនទំនើងកាប់គ្នាសឹងរាល់ថ្ងៃ ពេលនេះ សមត្ថកិច្ចស្រាវជ្រាវឃាត់បានទាំង២ ក្រុម ហើយក្រុមយុវជនសង្ស័យ និងវត្ថុតាង ត្រូវកសាងសំណុំរឿងពីបទហឹង្សាដោយចេតនា មានស្ថានទម្តន់ទោសបញ្ជូនទៅកាន់តុលាការ នារសៀលថ្ងៃទី២៣ ខែមេសា ឆ្នាំ២០១៣ ចាត់ការតាមនិតិវិធី ៕
