បាត់ដំបង ៖ ភ្លៀងធ្លាក់១មេបង្កើតខ្យល់ព្យុះកន្ត្រាក់វាយប៉ើងដំបូលផ្ទះ និងបាក់ស្រុតខូចខាតផ្ទះចំនួន៤៦ខ្នងផ្ទះ និងបាក់បង្គោលអង់តែនទូរស័ព្ទរបស់ក្រុមហ៊ុនសែលកាត ១ គ្រឿង ប៉ុន្តែមិនបង្កគ្រោះថ្នាក់ដល់អាយុជីវិតមនុស្សឡើយ កាលពីម៉ោង២និង៣០នាទីដល់ម៉ោង៤រសៀលថ្ងៃទី២២ ខែមេសា ឆ្នាំ២០១៥ ក្នុងឃុំចំនួន ៥ ស្រុកមោងឬស្សី ខេត្តបាត់ដំបង ។
លោក គិត ហៀង អធិការស្រុកមោងឬស្សីបានអោយដឹងថា ភ្លៀងមួយមេធំលាយឡំខ្យល់ព្យុះកន្ត្រាក់ចាប់ពីម៉ោង២និង៣០នាទីដល់ម៉ោង៤រសៀល បង្កអោយដួលបាក់បង្គោលអង់តែនទូរស័ព្ទរបស់ក្រុមហ៊ុនសែលកាត ១ គ្រឿង រលំលើផ្ទះលក់ម៉ូតូហុងដាពិន ទី១បង្កខូចខាតម៉ូតូ៣៥គ្រឿង និងសម្ភារៈមួយចំនួនទៀត ក្នុងភូមិប្រឡាយឃុំមោង ស្រុកមោងឬស្សី ខេត្តបាត់ដំបង ។ ខ្យល់កន្ត្រាក់បានវាយលើឃុំចំនួន ៤ ទៀត មានឃុំគាឃុំកកោះ ឃុំព្រៃតូច និងឃុំរបស់មង្គល បង្កអោយខូចខាតផ្ទះប្រជាពលរដ្ឋ ចំនួន ៤៦ ខ្នងផ្ទះ ។
បច្ចុប្បន្ន សមត្ថកិច្ចនគរបាលកំពុងចុះជួយរៀបចំ និងសាងសង់លំនៅដ្ឋានជូនប្រជាពលរដ្ឋនិងស្រង់ស្ថិតិការខូចខាតបន្ថែមដើម្បីរាយការណ៍ជូនថ្នាក់លើនិងសាខាកាកបាទក្រហមងាយស្រួលក្នុងការជួយសង្គ្រោះដល់ប្រជាពលរដ្ឋរងគ្រោះ៕
