បាត់ដំបង ៖ គ្រោះថ្នាក់ចរាចរណ៍ ៨ លើកគិតពី ថ្ងៃ១៣ ខែមេសា ឆ្នាំ២០១៥ ដល់ថ្ងៃទី២០ ខែមេសា ឆ្នាំ ២០១៥ ប្រៀបធៀបថ្ងៃចូលឆ្នាំ ២០១៤ មាន ១៦ ករណីថយចុះ ៨ លើក ។
ករណីគ្រោះថ្នាក់ចរាចរណ៍មាន ៨ លើកក្នុងនោះ មាន ៖ ទី១ ក្រឡាប់រថយន្តកាំម៉ារីដោយខ្លួនឯងបង្កអោយមនុស្សស្លាប់ ៣ នាក់ និងរបួសធ្ងន់ ២ នាក់នៅថ្ងៃទី១៣ ខែមេសា ឆ្នាំ២០១៥ នៅភូមិកកោះ ឃុំកកោះស្រុកមោងឬស្សី ។ ទី២រថយន្តតូច មិនស្គាល់ម៉ាកបុកម៉ូតូ១គ្រឿង បង្កអោយមនុស្សស្លាប់១នាក់ និងរបួសធ្ងន់១នាក់ នៅថ្ងៃទី១៣ ខែមេសា ឆ្នាំ២០១៥ នៅភូមិកម្មករសង្កាត់ស្វាយប៉ោ ក្រុងបាត់ដំបង ចំណែករថយន្តបានបើកគេចខ្លួនបាត់ ។ ទី៣ ទី៤ ទី៥ ទី៦ ទី៧ ចន្លោះថ្ងៃចូលឆ្នាំប្រពៃណីជាតិខ្មែរ ករណីម៉ូតូបុកម៉ូតូបង្កអោយមនុស្សស្រីរបួសធ្ងន់១១នាក់និងរបួសស្រាល១១នាក់ នៅក្រុងបាត់ដំបង ។ ករណីទី៨ នៅម៉ោង៣យប់ថ្ងៃ១៧ ខែមេសា ឆ្នាំ២០១៥ នៅចំណុចភូមិកកោះ ឃុំអូរតាគីស្រុកថ្មគោល ខេត្តបាត់ដំបង មានរថយន្តម៉ាកនីសាន់ម៉ាចបើកបរពីត្បូង ទៅជើងបានបុករថយន្តកូរ៉េចំណុះ ៥ តោនដឹកទឹកកកខូចចតលើផ្លូវ បណ្តាលអោយអ្នកជិះលើរថយន្តម៉ាកនីសាន់ ស្លាប់ ៣ នាក់ (ទាំងអ្នកបើកបរ)។
សរុប ករណីគ្រោះថ្នាក់ចរាចណ៍ ៨ លើកបង្កមនុស្សស្លាប់ ៧ នាក់របួសធ្ងន់ ១២ នាក់និងស្រាល ៥ នាក់ខូចរថយន្ត ៣ គ្រឿងម៉ូតូចំនួន ៦ គ្រឿង ។
លោក សាត គឹមសាន្ត នាយការិយាល័យនគរបាលចរាចរណ៍ផ្លូវគោក ខេត្តបាត់ដំបងសូមធ្វើការអំពាវនាវអោយអ្នកបើកបរយាន្តយន្តទាំងអស់គោរពច្បាប់ចរាចរណ៍ផ្លូវគោក អោយបានគ្រប់គ្នា ដើម្បីកាត់បន្ថយគ្រោះថ្នាក់ចរាចរណ៍ និងដើម្បីសុវត្ថិភាពអាយុជីវិតយើងគ្រប់គ្នា ៕
