បាត់ដំបង ៖ ឆេះផ្ទះ ១ ខ្នងទំហំ ៧ គុណ ៨ ម៉ែត្រ សាងសង់ពីថ្មក្រោម ឈើលើ ប្រក់ក្បឿងបំផ្លាញទ្រព្យសម្បត្តិគ្មានសល់ យកបានស្រូវប្រហែល១០បាវ សង្ស័យផ្ទុះស្សេខ្សែភ្លើង ពេលម្ចាស់ដេកលក់ កាលពីម៉ោង ៩ និង ៣០ នាទី យប់ថ្ងៃទី៥ ខែមេសា ឆ្នាំ២០១៥ នៅក្រុមទី ៦ ភូមិកំពុងព្រះ ឃុំកំពុងព្រះ ស្រុកសង្កែ ខេត្តបាត់ដំបង ។
សាក្សីនៅជិតផ្ទះកើតហេតុបានអោយដឹងថា នៅម៉ោងកើតហេតុ ពួកខ្លួនបានឃើញភ្លើងឆេះពីផ្ទះបាយ រហូតដល់តួផ្ទះយ៉ាងសន្ធោរសន្ធៅ ពេលនោះ ពួកយើងខំស្រែកហៅម្ចាស់ផ្ទះពីក្រៅរបង ទំរាំម្ចាស់ផ្ទះដឹងភ្លើងបានឆេះមកលើតួផ្ទះកាន់តែខ្លាំង។
ឈ្មោះ នូ ធិន ជាប្តីអាយុ៥២ឆ្នាំ និងប្រពន្ធឈ្មោះ តេង សុផា អាយុ៥៣ឆ្នាំ ជាម្ចាស់ផ្ទះបានអោយដឹងថា មុនពេលចូលដេកភ្លើងចង្ក្រាន បានពន្លត់តាំងពីម៉ោង៨ម្ល៉េះ ហើយពេលដេកមិនដឹងភ្លើងឆេះផ្ទះនោះទេ បានញាតិស្រែកប្រាប់ ការឆេះសង្ស័យផ្ទុះស្សេខ្សែភ្លើង ព្រោះខ្សែភ្លើងវាតូច និងចាស់ផងដែរ ។ ទ្រព្យសម្បត្តិក្នុងផ្ទះ ដែលឆេះអស់មានទូរទស្សន៍ ១ គ្រឿង សម្ភារៈចានឆ្នាំង ខោអាវទូរ និង គ្រែ ខ្សែក ១ ខ្សែទម្ងន់ ៥ តំលឹង ប្រាក់ខ្មែរ ៤២ ម៉ឺនរៀល ប្រាក់ថៃ ៦០០០ បាត ប្រាក់អាមេរិកកាំង ២២០០ ដុល្លារ ។
លោក គឹម ប៊ុនធឿន នាយការិយាល័យបង្ការពន្លត់អគ្គីភ័យ និងសង្គ្រោះបានអោយដឹងថា ពេលទទួលព័ត៌មានភ្លាមៗ រូបលោកបាននាំកម្លាំងមានរថយន្តបាញ់ពន្លត់ចំនួន ២ គ្រឿង ទៅដល់កន្លែងកើតហេតុដោយផ្លូវឆ្ងាយពេក ពេលទៅដល់ភ្លើងបានឆេះផ្ទះអស់៧០ភាគរយ ទោះជាយ៉ាងណា ក៏សមត្ថកិច្ចជួយបាញ់ពន្លត់ មិនអោយឆេះរាលដាលដល់ផ្ទះអ្នកជិតខាងទាន់ពេលវេលាដែរ ។ ការឆេះផ្ទះខាងលើ សង្ស័យផ្ទះស្សេខ្សែភ្លើង ព្រោះមានខ្សែភ្លើងតចាស់ៗ និងផ្ទះជិតខាងដាច់ភ្លើងដំណាលគ្នា ពេលឆេះផ្ទះនេះ ៕
