ខេត្តប៉ៃលិន ៖ ឪពុកចុងស្រវឹងអ៊ួរតានួ ខឹងកូនស្រីក្រមុំនិយាយទូរស័ព្ទយូរ សង្ស័យនិយាយជាមួយប្រុសផ្សេង ប្រច័ន្ទវាយបោចសក់ បណ្តាលឲ្យនាងគេចខ្លួនចេញពីផ្ទះបាត់ កាលម៉ោង៥និង៣០នាទីថ្ងៃទី២ខែមេសាឆ្នាំ២០១៥ រីឯម្តាយក្មេងស្រីរងគ្រោះ បានដើររកអស់ចិត្ត និងសូមអោយសមត្ថកិច្ច និងអ្នកព័ត៌មានជួយផ្សព្វផ្សាយរកបន្ថែម កាលពីរសៀលថ្ងៃទី០៤ ខែមេសា ឆ្នាំ២០១៥ នៅប៉ុស្តិ៍សង្កាត់ប៉ៃលិនក្រុងខេត្តប៉ៃលិន ។
ស្ត្រីឈ្មោះ អ៊ាង គឹមឈាង អាយុ៥៦ឆ្នាំ ជាម្តាយក្មេងស្រីបាត់ខ្លួន បានអោយដឹងថា ក្នុងគ្រួសារគាត់មានគ្នា ៥ នាក់គឺទី១ ប្តីចុងសុំមិនបញ្ចេញឈ្មោះ។ ទី២ រូបខ្លួន (ឈ្មោះ អ៊ាងគឹមឈាង) ។ ទី៣ឈ្មោះ អុក កុសល ភេទប្រុសអាយុ២២ឆ្នាំ ជាកូនច្បង (បួសនៅលើភ្នំដំបងភូមិភ្នំដំបង សង្កាត់ប៉ៃលិន ទើបបាន៣ថ្ងៃ) ។ ទី៤ ឈ្មោះ អុកគឹមហុងហៅ ទូច ភេទ ស្រី អាយុ១៧ឆ្នាំ (កូនបាត់ខ្លួន) ទី៥ ឈ្មោះ អុក គឹមហាន ភេទស្រីអាយុ១៧ឆ្នាំ ។ កូនស្រីទាំង២នាក់ ជាកូនភ្លោះ ដោយកូនស្រីបាត់ខ្លួនជាកូនច្បង ។ មុនពេលបាត់ខ្លួនកូនស្រី ខ្ញុំក៏បាននៅជុំគ្នាជាមួយប្តីចុង ពេលនោះកូនស្រីឈ្មោះ អុក គឹមហុង ហៅ ទូច បាននិយាយទូរស័ព្ទ (ឭពាក្យអូនបងអូនបង) យ៉ាងយូរ ភ្លាមនោះ ឪពុកចុងកំពុងស្រវឹងស្រាងុលៗផង បានស្ទុះទៅចាប់បោចសក់កូនស្រីរួចវាយនាង ហើយពោលថា គិតតែនិយាយជាមួយប្រុស នាងឯងចង់បានប្តីអត់ខាន់ស្លាឬ ? កូនស្រីឈ្មោះ អុក គឹមហុង ហៅ ទូច បានបោកទូរស័ព្ទចោលនិងដី ហើយនិយាយថា ខ្ញុំនិយាយទូរស័ព្ទជាមួយមិត្តភ័ក្តស្រីឈ្មោះ ឈាន ត្រូវជាក្មួយឪពុកឯង រួចនាងដើរចេញទៅបាត់ឈឹង ។ ខ្ញុំជាម្តាយក៏មិននឹកស្មានថា ឪពុកចុងវាយកូនមិនសួររកខុសត្រូវដែរ ចង់ប្តឹងប្តីចុងដាក់គុកអោយរាងចាលអំពីអំពើហឹង្សា ម្យ៉ាងទៀត ក៏មិននឹកស្មានថាកូនស្រីវាខឹងលែងចូលផ្ទះបែបនេះដែរ ។
ក្នុងគ្រួសារខ្ញុំជួបការលំបាកក្នុងជីវភាពខ្លាំងបានកូនស្រីភ្លោះទៅស៊ីឈ្នួលកាប់គាស់ដំឡូង និងស៊ីឈ្នួលធ្វើកូនកាំបិតម្ហូបការ យកប្រាក់មកចិញ្ចឹមជីវិតប៉ុណ្ណោះ បើកូនស្រីវាទៅបាត់ម្នាក់អោយរស់សង្ឃឹមអ្វី ដូច្នេះបើកូនស្រីបាន ឭដំណឹងម្តាយស្វែងរកប្រញាប់មកផ្ទះវិញ ហើយបើបងប្អូនណាជួបនាង សូមជួយទំនាក់ទំនងមកលេខទូរស័ព្ទ 098 697 786; 096 204 6474; 071 632 2662 ខ្ញុំសូមអរគុណ ៕
