បាត់ដំបង ៖ ម៉ូតូ ២ គ្រឿង ម៉ាកហុងដាឌ្រីមបុកគ្នាជាមួយម៉ាកឆាលីផ្លូវកាត់ទទឹងរង្វង់មូលសេះស បណ្តាលអោយរងរបួសធ្ងន់២នាក់និងអ្នកជិះម៉ូតូឆាលីម្នាក់ស្លាប់នៅកន្លែងកើតហេតុកាលពីម៉ោង១២រំលងអធ្រាតឈានចូលថ្ងៃទី៣ខែមេសាឆ្នាំ២០១៥នៅចំណុចរង្វង់មូលសេះសភូមិព្រែកមហាទេពសង្កាត់ស្វាយប៉ោក្រុងបាត់ដំបង។
ប្រភពសាក្សីអង្គុយលេងនៅសួនព្រែកមហាទេពក្បែររង្វង់មូលសេះសបានអោយដឹងថាមុនពេលកើតហេតុឃើញម៉ូតូម៉ាកឌ្រីមសេរីឆ្នាំ២០១៣មួយគ្រឿងជិះគ្នា២នាក់ក្នុងល្បឿនលឿនរ៉បសួនព្រែកមហាទេពទិសដៅពីកើតទៅលិចពេលមកដល់ចំណុចរង្វង់មូលសេះសបានប្រទះម៉ូតូឆាលី១គ្រឿងជិះម្នាក់ឯងបើកបរពីជើងមកត្បូង(ពីស្រែ១០០ទៅផ្លូវលេខ៣)។ពេលម៉ូតូឆាលីឆ្លងកាត់ផ្លូវរង្វង់មូលក៏ម៉ូតូហុងដាឌ្រីមបានបុកប៉ើងខ្ទាតមនុស្សចំថ្មចិញ្ចើមសួនបណ្តាលអោយបែកក្បាលស្លាប់ភ្លាមៗ រីឯអ្នកជិះម៉ូតូសង់ទាំង២នាក់ក៏រងរបួសធ្ងន់ដឹកទៅកាន់មន្ទីរពេទ្យភ្លាមៗផងដែរ។
ប្រភពបានបញ្ជាក់ថាបុរសរងគ្រោះស្លាប់ជិះម៉ូតូឆាលីមានឈ្មោះឌុចណារិនហៅចិនអាយុ២៨ឆ្នាំមានទីលំនៅភូមិ១៣មករាសង្កាត់ព្រែកព្រះស្តេចក្រុងបាត់ដំបង។ចំណែកអ្នកជិះម៉ូតូម៉ាកហុងដាឌ្រីមពាក់ស្លាកលេខ1o3979មានទី១ឈ្មោះឧត្តមអាយុ២២ឆ្នាំនិងទី២ឈ្មោះភឿតអាយុ២៣ឆ្នាំមានទីលំនៅភូមិកំពង់សីមាសង្កាត់វត្តគរក្រុងបាត់ដំបង។
នៅពេលកើតហេតុសមត្ថកិច្ចនគរបាលចរាចរណ៍បានចុះដល់កន្លែងកើតហេតុធ្វើការវាស់វែងនិងប្រគល់សពជូនសាច់ញាតិយកធ្វើបុណ្យតាមប្រពៃណីនិងយកមធ្យោបាយទាំង២គ្រឿងទៅកាន់ការិយាល័យចរាចរណ៍ផ្លូវគោកខេត្តរងចាំការដោះស្រាយជាក្រោយ ៕
ដោយ ៖ សុខ កុសល
