ខេត្តប៉ៃលិន ៖ បុរសម្នាក់ត្រឡប់មកពីធ្វើចម្ការ មានអាការៈហេវហត់ ឃើញប្រពន្ធផឹកស្រាអួរតានួរ និងដាំបាយឆៅ ខឹងវាយប្រពន្ធរហូតដល់ស្លាប់ កាលពីព្រឹកថ្ងៃទី ០១ ខែមេសា ឆ្នាំ២០១៥ ហើយបុរសជាប្តីប្រើអំពើហិង្សា ទៅលើប្រពន្ធរហូតដល់ស្លាប់នេះ ត្រូវកម្លាំងនគរបាលឃាត់ខ្លួនភ្លាមនៅព្រឹកថ្ងៃដដែល ស្ថិតក្នុងផ្ទះជនរងគ្រោះ ភូមិអូរខ្ទីង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
សមត្ថកិច្ចនគរបាលខេត្តប៉ៃលិនបានអោយដឹងថា កាលវេលាម៉ោង១រសៀលថ្ងៃទី ២៣ ខែមីនា ឆ្នាំ២០១៥ ជនសង្ស័យជាប្តីត្រឡប់ពីចម្ការមកផ្ទះវិញ ធ្វើការអស់កម្លាំងហេវហត់ ស្រេកឃ្លានបាយទឹកផងនោះ ស្រាប់តែឃើញប្រពន្ធផឹកស្រាស្រវឹងអួរតានួរ ហើយពេលប្តីរកបាយហូបប្រទះបាយឆៅទៀតនោះខឹងក៏រករឿងវាយទះជាច្រើនដៃ និងទាត់ធាក់ជាច្រើនជើង បណ្តាលឱ្យដួលសន្លប់បាត់ស្មារតីនៅក្នុងផ្ទះតែម្តង ។ ក្រោយប្រើហឹង្សាលើប្រពន្ធរួច ប្តីរូបនេះ បានគំរាមមិនឲ្យប្រពន្ធប្រាប់អ្នកណាឲ្យដឹងទេ មិនតែប៉ុណ្ណោះ មិនរវីរវល់នឹងរបួសប្រពន្ធឡើយ ដោយទុកឲ្យជំងឺប្រពន្ធចេះតែធ្ងន់ធ្ងរទៅៗ រហូតដល់ នៅព្រឹកថ្ងៃទី១ ខែមេសា ឆ្នាំ២០១៥ ប្រពន្ធដាច់ដង្ហើមស្លាប់តែម្តង ។
សមត្ថកិច្ចនគរបាលខេត្តប៉ៃលិនបានបន្តថា ស្ត្រីរងគ្រោះដែលស្លាប់ ឈ្មោះ សំ រួត អាយុ៤៧ ឆ្នាំ មុខរបរកសិករ មានស្លាកស្នាមរងរបួសជាំពេញដងខ្លួន ឆ្អឹងជំនីរ ភ្លៅ ជាពិសេសចង្កេះជាំធ្ងន់ធ្ងរខ្លាំងជាងគេ ។ មានកូនក្នុងបន្ទុកចំនួន ៣ នាក់ ប្រុស ១ ដោយកូនទី១ ឈ្មោះ វាសនា ហៅ ហេង ភេទប្រុស អាយុ១៧ឆ្នាំ, កូនទី២ ឈ្មោះ ស្រីនាង ភេទស្រី អាយុ១១ឆ្នាំ និងកូនទី៣ឈ្មោះ ស្រីនី ភេទស្រី អាយុ០៥ឆ្នាំ មានទីលំនៅ ភូមិកើតហេតុ។ ចំណែកជនដៃដល់ដែលជាប្តីឈ្មោះ អ៊ុច សុខហេង អាយុ ៤៨ ឆ្នាំ ជាកសិករ ទីលំនៅបច្ចុប្បន្នជាមួយជនរងគ្រោះ ។
ជនសង្ស័យជាប្តីបានសារភាពថា ខ្លួន(ជនសង្ស័យ)បានវាយធ្វើបាប ប្រពន្ធមែន ដោយឃើញប្រពន្ធផឹកស្រាស្រវឹង ហើយដាំបាយឆៅពេញឆ្នាំង ធ្វើឱ្យរូបគេខឹងយ៉ាងខ្លាំង ដោយធ្វើការអស់កម្លាំង រកបាយហូបមិនបាន ក្រោយពីវាយប្រពន្ធរួច មិនបានបញ្ជូននាងទៅកាន់មន្ទីរពេទ្យ ដើម្បីព្យាបាលនោះទេ ។
សមត្ថកិច្ចនគរបាលខេត្តប៉ៃលិនបានបញ្ជាក់ថា ក្រោយពីធ្វើកោសល្យវិច័យ រួចរាល់ប្រគល់សពស្ត្រីរងគ្រោះ អោយសាចឮញាតិយកធ្វើបុណ្យតាមប្រពៃណី ។ចំណែកបុរសសង្ស័យជាប្តី ត្រួវបានសមត្ថកិច្ចរៀបចំ កសាងសំណុំរឿង បញ្ជូនទៅតុលាកនារសៀលថ្ងៃទី២ ខែមេសា ឆ្នាំ២០១៥ ចាត់ការតាមនិតិវិធី ៕
