បាត់ដំបង ៖ ភ្លៀងមួយមេបង្កផ្គររន្ទះ ខ្យល់ព្យុះវាយចំសាលារៀន ១ ខ្នងផ្ទះប្រជាពលរដ្ឋ ៣៤ ខ្នង ដួលទ្រេត ក្នុងនោះផ្ទះចំនួន ១៥ ខ្នង ដួលរៀបដល់ដី បណ្តាលអោយរបួសមនុស្សធ្ងន់ស្រាល ៣ នាក់ និងស្លាប់ ១ នាក់ ។
ហេតុការណ៍នេះ កើតឡើងកាលពីវេលាម៉ោង ១៨ និង ៣០ នាទី យប់ថ្ងៃទី៣០ ខែមិនា ឆ្នាំ២០១៥ នៅភូមិបឹងស្នួល ឃុំអំពិល ៥ ដើម ស្រុកបវេល ខេត្តបាត់ដំបង ។
លោក ម៉ន ឆៃ មេភូមិបឹងស្នួលបានអោយដឹង កាលព្រឹកថ្ងៃទី៣១ ខែមិនា ឆ្នាំ២០១៥ ថា កាលពីវេលាម៉ោង១៨និង៣០នាទី យប់ថ្ងៃទី៣០ ខែមិនា ឆ្នាំ២០១៥ មេឃបានធ្លាក់ភ្លៀងបង្កផ្គររន្ទះ ខ្យល់ព្យុះវាយចំសាលារៀន ១ ខ្នងផ្ទះប្រជាពលរដ្ឋ៣៤ខ្នង ដួលទ្រេតក្នុងនោះផ្ទះចំនួន១៥ខ្នងដួលរៀបដល់ដី ។ មនុស្សធ្ងន់ប្រុស៣នាក់ របួសធ្ងន់ស្រាលដឹកទៅកាន់មន្ទីរពេទ្យ និងស្ត្រីម្នាក់ឈ្មោះ ហេង សឿម អាយុ៦៤ឆ្នាំ ដោយសារផ្ទះដួលសង្កត់លើ ត្រូវបែកក្បាលបណ្តាលអោយស្លាប់នៅកន្លែងកើតហេតុ ភ្លាមនោះ រូបលោកក៏បានរាយការណ៍ជូនថ្នាក់លើផងដែរ ។
លោក អឿម ទិត អធិការស្រុកបវេល បានប្រាប់អ្នកយកព័ត៌មាន នៅម៉ោង១២និង៣០នាទីរសៀល ថ្ងៃទី៣១ ខែមិនា ឆ្នាំ២០១៥ថា កាលពីយប់កើតហេតុការណ៍គ្រោះថ្នាក់ដល់មនុស្ស គឺមានមនុស្សស្រីម្នាក់ស្លាប់ និងបុរស២នាក់របួសស្រាល លុះព្រឹកឡើង រកឃើញបុរសម្នាក់ទៀតរងរបួសធ្ងន់ ។ ចំពោះបញ្ហាទាំងនេះ លោកបានធ្វើរបាយការណ៍លំអិត រាយការណ័ជូនថ្នាក់លើ និងខាងកាកបាទក្រហម ដើម្បីសុំជួយអន្តរាគមន៍ និងចុះជួយដល់ប្រជាពលរដ្ឋ កំពុងជួបប្រទះគ្រោះថ្នាក់ធម្មជាតិ ដ៏សាហាវនេះ ៕
