ក្រុងប៉ោយប៉ែត ៖ សពលោកវរសេនីយ៍ឯក ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែតបានបញ្ជូនមកដល់មូល ដ្ឋានបញ្ជាការដ្ឋានកងរាជអាវុធហត្ថក្រុងប៉ោយបែត នៅវេលាម៉ោង6និង40នាទីល្ងាចថ្ងៃទី៨ ខែកក្កដា ឆ្នាំ2014 នេះ ស្ថិតនៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសនោះដែលគេឃើញមានវត្តនាមលោក ឧត្តមសេនីយ៍ត្រីឱប បូរិន មេបញ្ជាការ អ ហខេត្ត លោក វរសេនីយ៍ឯកម៉ែន ភិរម្យ មេបញ្ជាការរងអ ហ ខេត្ត និងមន្ត្រីអ ហជាច្រើននាក់ រួមទាំងអាជ្ញាធរក្រុងជាពិសេសមានប្រជាពលរដ្ឋរស់នៅក្នុងក្រុងប៉ោយប៉ែតជាច្រើននាក់ផងដែរ។
លោកវរសេនីយ៍ឯក ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែត មានជន្មាយុ40ឆ្នាំ មានស្រុកកំនើតក្នុងខេត្តព្រៃវែង មានលំនៅដ្ឋានបច្ចុប្បន្នភូមិក្បាលស្ពាន1 សង្កាត់ប៉ោយប៉ែត លោកបានបម្រើការងារជាមន្ត្រីកងរាជអាវុធហត្ថតាំងពីឆ្នាំ1993 រហូតបានក្លាយជាមេបញ្ជាការកងរាជអាវុធហត្ថក្រុងប៉ោយប៉ែត បានរយះពេល4ឆ្នាំ រូបលោកជាមន្ត្រីស្រលាញ់ការងារ គោរពការងារ បម្រើជាតិមាតុភូមិ ស្មោះត្រង់ និងជាមនុស្សសូត្របូត សុភាពរាបសារ។
មបញ្ជាក់ថា លោកវរសេនីយ៍ឯក ហម ម៉ុត មេបញ្ជាការបានស្លាប់បាត់បង់ជីវិតនៅព្រឹកថ្ងៃទី08 ខែកក្កដា ឆ្នាំ 2014 នៅក្នុងសណ្ឋាគារ មីដលែន ដែលមានទីតាំងលេខ១៥០តាមបណ្តោយផ្លូវលេខ ៥១៦ ក្រុម៥២ ភូមិ១៣ សង្កាត់បឹងកក់១ ខណ្ឌទួលគោក រាជធានីភ្នំពេញ មានការភ្ញាក់ផ្អើលបានកើតឡើង បន្ទាប់ពីមានលោកបានធ្លាក់ស្លាប់ពីលើជាន់ទី៤។
សពត្រូវបានតម្កល់ទុកនៅមូលដ្ឋានកងរាជអាវុធហត្ថក្រុងប៉ោយប៉ែត ដើម្បីរៀបចំធ្វើគោរពបូជា តាមប្រពៃណីព្រះពុទ្ធសាសនា រយះពេលតម្កល់ទុករហូតដល់ថ្ងៃទី13 ខែកក្កដាខាងមុខនេះ ៕
ដោយចិន្តា
